នៅថ្ងៃទី១១ ខែកក្កដា ឆ្នាំ២០២២ នៅសាលាខេត្តសៀមរាប មានរៀបចំកិច្ចប្រជុំសាមញ្ញលើកទី៣៨ របស់ក្រុមប្រឹក្សាខេត្ត តាមរយៈប្រព័ន្ធវីដេអូ Zoom ដឹកនាំដោយឯកឧត្តម អ៊ាន ឃុន ប្រធានក្រុមប្រឹក្សា និងលោក អ៊ឹង គឹមលាង អភិបាលរង តំណាងឯកឧត្តមទៀ សីហា អភិបាលខេត្តសៀមរាប។ កិច្ចប្រជុំនេះរៀបចំ ដើម្បីពិនិត្យ ពិភាក្សា និងអនុម័តលើសេចក្ដីព្រាងកំណត់ហេតុកិច្ចប្រជុំសាមញ្ញលើកទី៣៧ របាយការណ៍ប្រចាំឆមាសទី១ ស្ដីពីការអនុវត្តការងាររបស់រដ្ឋបាលខេត្តសៀមរាប ព្រមទាំងទិសដៅការងារសំខាន់ៗ និងបញ្ហាប្រឈមក្នុងខេត្តមួយចំនួនទៀត។
បន្ទាប់ពីអនុម័តនូវរបៀបវារៈទាំងបី អង្គប្រជុំក៏បានលើកយកបញ្ហាផ្សេងៗ មកធ្វើការពិភាក្សា ជាមួយនោះ ឯកឧត្តម ទេស ច័ន្ទគីរី សមាជិកក្រុមប្រឹក្សាខេត្ត បានលើកឡើងថា កិច្ចការធ្វើអត្តសញ្ញាណបណ្ណជូនប្រជាពលរដ្ឋ មានសារសំខាន់ណាស់ ជាពិសេសពលរដ្ឋដែលត្រូវគ្រប់អាយុបោះឆ្នោត ។ ឯកឧត្តមបន្តថា កន្លងមក ការធ្វើអត្តសញ្ញាណបណ្ណសញ្ជាតិខ្មែរមានរយៈពេលយូរ ដែលបញ្ហានេះឯកឧត្តមបានទទូចសុំឲ្យមានការសម្របសម្រួលឱ្យបានលឿនជាងពេលកន្លងមកនេះ។
ក្នុងកិច្ចប្រជុំនេះដែរ អង្គប្រជុំក៏បានលើកឡើងពីកំណើនអ្នកទេសចរមកកម្សាន្តក្នុងខេត្តសៀមរាប មានប្រមាណជិតមួយលាននាក់ ក្នុងរយៈពេល៦ខែដើមឆ្នាំ២០២២នេះ ដែលចំនួននេះមានការកើនឡើង ៨៥ភាគរយ បើធៀបនឹងរយៈពេលដូចគ្នាក្នុងឆ្នាំ២០២១ អំឡុងពេលវិបត្តិជំងឺកូវីដ-១៩ បើយោងតាមរបាយការណ៍របស់រដ្ឋបាលខេត្ត។ ក្នុងនោះអ្នកទេសចរជាតិ មានចំនួនប្រមាណ ៨៥៥ ០០០នាក់ និងអ្នកទេសចរអន្តរជាតិ ចំនួន៥៥ ០៨៧នាក់ ។
ក្នុងការរៀបចំណាត់ថ្នាក់វិញ ទេសចរអន្តរជាតិដែលមានចំនួនច្រើនជាងគេ គឺជនជាតិចិន ដែលមានចំនួនជិត១០,០០០នាក់ ខណៈអ្នកទេសចរជនជាតិបារាំងឈរនៅចំណាត់ថ្នាក់លេខ២ មានចំនួនជិត៨,០០០នាក់។ ចំណែកឯ ព្រលានយន្តហោះអន្តរជាតិសៀមរាបក្នុងឆមាសទី១នេះ ក៏ទទូលបានជើងហោះហើរជិត៤០០ជើងដែរ និងមានអ្នកដំណើរជាង ៣៣,០០០នាក់៕
អត្ថបទ និងរូបភាព ៖ លោក ជា ស្រស់
កែសម្រួលអត្ថបទ ៖ លោក សេង ផល្លី
