កាលរសៀលថ្ងៃទី១២ ខែកក្កដា ឆ្នាំ២០២២ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន និងជាប្រធានក្រុមប្រឹក្សាជាតិអភិវឌ្ឍន៍ដោយចីរភាព និងលោកជំទាវ និងមានការចូលរួមពីលោក ពិន ប្រាកដ អភិបាលរងខេត្ត តំណាង ឯកឧត្ដម ទៀ សីហា អភិបាលខេត្តសៀមរាប ព្រមទាំងមន្ត្រីរាជការ កម្មសិក្សាការីសាលាភូមិន្ទរដ្ឋបាល អង្គការ សមាគម ប្រជាពលរដ្ឋក្នុងខេត្ត បានអបអរសាទរទិវាជីវៈចម្រុះអន្តរជាតិឆ្នាំ២០២២ និងដាំកូនឈើចម្រុះចំនួន ៨០០ដើម តាមបណ្ដោយផ្លូវឧទ្យានជាតិព្រះជ័យវរ្ម័ន នរោត្តម ភ្នំគូលែន នៃមជ្ឈមណ្ឌលសិក្សាស្រាវជ្រាវ និងអភិរក្សកេសរកូល សុខ អាន ភ្នំគូលែន ក្រោមប្រធានបទ “កសាងអនាគតរួមមួយសម្រាប់ទាំងអស់គ្នា (Building a shared future for all life។
ថ្លែងក្នុងឱកាសនោះ ឯកឧត្តម សាយ សំអាល់ មានប្រសាសន៍ថា ឧទ្យានជាតិព្រះជ័យវរ្ម័ន នរោត្តម ភ្នំគូលែន មិនត្រឹមតែជាតំបន់ដែលមានជីវៈចម្រុះគ្រប់ប្រភេទនោះទេ ថែមទាំងជាទឹកដីពោរពេញដោយសម្បត្តិវប្បធម៌ អរិយធម៌ពីបុរាណផងដែរ។ ដូចនេះ យើងនឹងធ្វើឱ្យឧទ្យានជាតិមួយនេះឱ្យក្លាយជាតំបន់ទេសចរណ៍ផ្សារភ្ជាប់នឹងទឹកដី ដោយធ្វើយ៉ាងណាបង្កើននូវចំណូលជូនប្រជាសហគមន៍ តាមរយៈអេកូទេសចរណ៍ ការចិញ្ចឹមសត្វ ដាំដំណាំកសិកម្ម និងការកសាងសេដ្ឋកិច្ចមូលដ្ឋាន ដែលមានសារៈសំខាន់ ចំពោះកិច្ចការពារអភិរក្សធនធានធម្មជាតិ។ ការកសាងជីវភាពក្នុងសហគមន៍បានរីកចម្រើន ប្រជាពលរដ្ឋនឹងមានការងារធ្វើ ជាមួយប្រាក់ចំណូល ដែលធ្វើឱ្យពួកគាត់ចៀសវាងពីការកាប់ឈើ ទន្ទ្រានដី ឬបរបាញ់សត្វបន្តទៀត។
ឯកឧត្តម រដ្ឋមន្ត្រី បន្តថា សម្រាប់ឧទ្យានជាតិព្រះជ័យវរ្ម័ន នរោត្តម ភ្នំគូលែន យើងបានបង្កើតស្ថានីយបន្សុទ្ធពូជជ្រូកកណ្តុរ សម្រាប់ចែកជូនដល់សហគមន៍ផ្សេងៗ ក្រៅពីទទួលប្រាក់ចំណូលពីអនុផលព្រៃឈើ និងបានជំរុញឱ្យពួកគាត់ចិញ្ចឹមសត្វ ដាំដំណាំបន្លែបង្ការផ្សេងៗរួមផ្សំ ដើម្បីបង្កើនប្រាក់ចំណូល និងធានាបាននូវសន្តិសុខស្បៀងសម្រាប់សហគមន៍ ក៏ដូចជាតំបន់ការពារធម្មជាតិដែលពួកគាត់រស់នៅ។
ទន្ទឹមនោះ ឯកឧត្ដម រដ្ឋមន្ត្រី ក៏បានបញ្ជាក់ផងដែរថា ការដើរកម្សាន្តរបស់ភ្ញៀវទេសចរគ្រប់ទីកន្លែងក្នុងប្រទេស ក៏ដូចជា ការអភិវឌ្ឍសព្វបែបយ៉ាងដូចពេលបច្ចុប្បន្ននេះ គឺបានមកពីកត្តាសុខសន្តិភាព ស្ថេរភាពនយោបាយ ដែលសម្តេចតេជោ ហ៊ុន សែន នាយករដ្ឋមន្ត្រី រកបានមកដោយលំបាក ហេតុនេះក្នុងនាមយើងជាមន្ត្រីរាជការស៊ីវិល និងអ្នកជំនាន់ក្រោយទាំងអស់ ត្រូវតែថែរក្សាសុខសន្តិភាព ដែលយើងកំពុងមាននេះ បន្តទៅមុខទៀត ដើម្បីបន្តការអភិវឌ្ឍរីកចម្រើននៃប្រទេសជាតិយើង។
អត្ថបទ និង រូបភាព៖ រដ្ឋបាលខេត្ត
កែសម្រួល៖ លោក សេង ផល្លី
