ថ្លែងក្នុងសិក្ខាសាលាផ្សព្វផ្សាយសៀវភៅណែនាំ ស្តីពីការអភិវឌ្ឍន៍សហគមន៍សំណង់ លំនៅឋានបណ្តោះអាសន្ន និងការកសាងភាពជាដៃគូចម្រុះ ព្រឹកថ្ងៃទី១៣ ខែកក្កដា ឆ្នាំ២០២២ លោក លី សំរិទ្ធ អភិបាលរងខេត្តសៀមរាប លើកឡើងថា ក្រុងសៀមរាបត្រូវការប្រើពេលប្រមាណពី៥ ទៅ១០ឆ្នាំទៀត ដើម្បីក្លាយជាក្រុងវៃឆ្លាត ដូចបណ្តាទីក្រុងវៃឆ្លាតនៃបណ្ដាប្រទេសដទៃទៀតក្នុងតំបន់អាស៊ាន។
លោក លី សំរិទ្ធ បានរំលឹកថា ចាប់តាំងពីឆ្នាំ២០១៨ រាជរដ្ឋាភិបាលកម្ពុជា បានកំណត់ទីក្រុងចំនួនបីរបស់កម្ពុជា រួមមាន រាជធានីភ្នំពេញ ក្រុងបាត់ដំបង និងក្រុងសៀមរាប ជាទីក្រុងវៃឆ្លាតអាស៊ាន ខណៈបណ្តាប្រទេសក្នុងតំបន់អាស៊ានទាំង១០ មានទីក្រុងប្រមាណជិត៣០ បានក្លាយជាសមាជិកទីក្រុងវៃឆ្លាតអាស៊ាន។
លោកអភិបាលរងខេត្ត លើកឡើងថា ពាក្យថាទីក្រុងវៃឆ្លាត វាមិនចម្លែកទេសម្រាប់ប្រជាពលរដ្ឋប្រទេសផ្សេងៗ ក្រៅពីកម្ពុជា។ ប៉ុន្តែសម្រាប់កម្ពុជា យើងពុំទាន់យល់ដឹងថា តើទីក្រុងវៃឆ្លាតមានរូបរាងដូចម្ដេច? មានតួនាទីបែបណាខ្លះ? ដូច្នេះ យើងចាំបាច់ត្រូវប្រើពេលបន្ថែមទៀត ដើម្បីឆ្ពោះទៅរកគោលដៅ ដូចបណ្តាទីក្រុងវៃឆ្លាតដទៃទៀតក្នុងតំបន់។
លោកអភិបាលរងខេត្ត បន្ថែមថា ដើម្បីជំរុញកិច្ចខិតខំប្រឹងប្រែងក្នុងការប្រែក្លាយទីក្រុងសៀមរាប ជាទីក្រុងឆ្លាតវៃអាស៊ាន រាជរដ្ឋាភិបាលកម្ពុជា បានផ្តល់នូវថវិកាប្រមាណ ១៥០លានដុល្លាអាមេរិក សម្រាប់ការរៀបចំហេដ្ឋារចនាសម្ព័ន្ធផ្លូវថ្នល់ចំនួន៣៨ខ្សែ រួមជាមួយការស្តារឡើងវិញនូវប្រព័ន្ធលូទឹកភ្លៀង លូទឹកកខ្វក់ ស្តារសោភណ្ឌភាពដងស្ទឹងសៀមរាបជាដើម។
ជាមួយនោះ លោក លី សំរិទ្ធ ក៏បានបញ្ជាក់ដែរថា នាពេលកន្លងមក រដ្ឋបាលខេត្តសៀមរាប បានដោះស្រាយ និងយកចិត្តទុកដាក់ខ្ពស់ ចំពោះការសម្របសម្រួល ដល់ប្រជាពលរដ្ឋ ដែលរស់នៅក្នុងសំណង់មិនរៀបរយ លើដីចំណីផ្លូវ លើផ្លូវសាធារណៈ និងតាមមាត់ស្ទឹងសៀមរាប ប្រមាណជិតមួយពាន់គ្រួសារ ដើម្បីទទួលបានដីលំនៅឋានសមរម្យ និងជាកម្មសិទ្ធស្របច្បាប់សម្រាប់ពួកគាត់។ តែទោះជាយ៉ាងនេះក្តី ក្រុងសៀមរាប ក៏នៅមានប្រជាពលរដ្ឋដែលរស់នៅលើសំណង់មិនរៀបរយប្រមាណជា ៥ពាន់គ្រួសារទៀត ដែលទាមទារឱ្យមានការចូលរួមពីគ្រប់ភាគីពាក់ព័ន្ធ ដើម្បីដោះស្រាយបញ្ហានេះប្រកបដោយប្រសិទ្ធភាព។
អត្ថបទ និង រូបភាព៖ លោក ជា ស្រស់
កែសម្រួល៖ លោក សេង ផល្លី
