គិតត្រឹមម៉ោង ៤រសៀល ថ្ងៃទី១២ ខែកក្កដានេះ ការចូលរួមសរសេរសាររំលែកមរណទុក្ខ ជូនដល់អតីតនាយករដ្ឋមន្ដ្រីជប៉ុនឯកឧត្ដម អេបេ ស៊ីនហ្សូ នៅការិយាល័យកុងស៊ុលជប៉ុនប្រចាំខេត្ដសៀមរាប ស្ថិតក្នុងសណ្ឋាគារសុខាសៀមរាប នឹងត្រូវបញ្ចប់ បន្ទាប់ពីស្ថានទូនជប៉ុនប្រចាំកម្ពុជាបានជូនដំណឹងនេះជាសាធារណៈកាលពីថ្ងៃអាទិត្យចុងសប្ដាហ៍កន្លងទៅនេះ។
គួររំលឹកថា ឯកឧត្ដម អាបេ ស៊ីនហ្សូ ក្នុងវ័យ៦៧ឆ្នាំ ត្រូវបានខ្មាន់កាំភ្លើងបាញ់សម្លាប់កាលពីថ្ងៃទី៨ ខែកក្កដា ឆ្នាំ២០២២ ខណៈឯកឧត្ដម កំពុងថ្លែងសន្ទរកថា នៅតាមដងផ្លូវសាធារណៈក្នុងទីក្រុង Nara ភាគខាងលិចប្រទេសជប៉ុន។
សូមជម្រាបដែរថា កាលពីរសៀលថ្ងៃទី១១ ខែកក្កដាម្សិលមិញនេះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអញ្ជើញដឹកនាំមន្ត្រីជាន់ខ្ពស់រាជរដ្ឋាភិបាល ចូលរួមគោរពវិញ្ញាណក្ខន្ធ ឯកឧត្ដម អាបេ ស៊ីនហ្សូ អតីតនាយករដ្ឋមន្ត្រីជប៉ុន នៅស្ថានទូតជប៉ុនប្រចាំកម្ពុជា និងបានសរសេរសាររំលែកទុក្ខផ្ទាល់ដៃ ដែលបង្ហាញពីកាយវិការដ៏សប្បុរស និងមនោសញ្ចេតនាដ៏ស្មោះស្ម័គ្រ។ ដោយសម្ដេចតេជោ បានបញ្ជាក់ថា មរណភាពរបស់ឯកឧត្ដម អាបេ ស៊ីនហ្សូ មិនគ្រាន់តែជាការបាត់បង់នូវវីរជនស្នេហាជាតិម្នាក់របស់ជប៉ុន ដែលបានដឹកនាំឱ្យមានការរីកចម្រើន និងលើកកម្ពស់តួនាទីរបស់ជប៉ុន នៅលើឆាកអន្តរជាតិ និងតំបន់ប៉ុណ្ណោះទេ តែការបាត់បង់នូវមិត្តភក្ដិដ៏ល្អពិតប្រាកដមួយរូបរបស់ប្រជាជនកម្ពុជា និងរូបសម្ដេចផ្ទាល់ ដែលបានរួមចំណែកក្នុងការលើកកម្ពស់ទំនាក់ទំនងទ្វេរភាគី កម្ពុជា-ជប៉ុន រហូតដល់ភាពជាដៃគូយុទ្ធសាស្រ្ដ កាលពីឆ្នាំ ២០១៣ ក៏ដូចជាបានជំរុញការផ្ដល់ជំនួយគាំទ្រ ដល់ការអភិវឌ្ឍនៅកម្ពុជាផងដែរ។
ទន្ទឹមនោះ ការបើកឱ្យសាធារណជនទូទៅ ចូលរួមសរសេរសាររំលែកនៅស្ថានទូនជប៉ុនប្រចាំកម្ពុជា និងការិយាល័យកុងស៊ុលជប៉ុនប្រចាំខេត្ដសៀមរាបនេះ ធ្វើឡើងបន្ទាប់ពីប្រជាពលរដ្ឋខ្មែរ បានបង្ហាញនូវការគោរព និងសម្ដែងមរណទុក្ខតាមរូបភាពផ្សេងៗជាច្រើន ជូនចំពោះឯកឧត្ដម អាបេ ស៊ីនហ្សូ។
លោក កាវ៉ាកុជិ ម៉ាសាគិ (Kawaguchi Masaki) ប្រធានការិយាល័យកុងស៊ុលជប៉ុន ប្រចាំខេត្ដសៀមរាប លើកឡើងថា ការចូលរួមរំលែកទុក្ខនេះ បានបង្ហាញឱ្យឃើញពីទឹកចិត្ដប្រជាពលរដ្ឋខ្មែរ ជូនអតីតនាយករដ្ឋមន្ដ្រី ស៊ីហ្សូ អាបេ ជាពិសេសបង្ហាញឱ្យឃើញពីមិត្ដភាពកាន់តែយូរអង្វែងរវាងប្រទេសទាំងពីរ កម្ពុជា-ជប៉ុន ។ លោកក៏បានថ្លែងអំណរគុណចំពោះសណ្ដានចិត្ដរបស់ប្រជាពលរដ្ឋខ្មែរ ជាមួយប្រជាជនជប៉ុនក្នុងឱកាសនេះផងដែរ។
អត្ថបទ និងរូបភាព ៖ លោក បូ សាវី
កែសម្រួលអត្ថបទ ៖ លោក សេង ផល្លី
