នៅថ្ងៃទី០៩ ខែកក្កដា ឆ្នាំ២០២២នេះ នៅសាកលវិទ្យាល័យបញ្ញាសាស្ត្រកម្ពុជាសាខាខេត្តសៀមរាប បានរៀបចំពិធីប្រគល់សញ្ញាបត្រដល់និស្សិតជ័យលាភីចំនួន ៣៤៤រូប ក្នុងនោះមានទាំងកម្រិតបរិញ្ញាបត្រជាន់ខ្ពស់ បរិញ្ញាបត្រ និងបរិញ្ញាបត្ររង ផងដែរ។ ពិធីនេះបានប្រព្រឹត្តិទៅ ក្រោមព្រះអធិបតីភាព ព្រះមហាវិមលធម្ម សិរីសុវណ្ណោ ពិន សែម ព្រះរាជាគណ:ថ្នាក់ទោ សមាជិកថេរសភាសង្ឃ ឧត្តមទីប្រឹក្សាគណ:សង្ឃនាយក នៃព្រះរាជាណាចក្រកម្ពុជា និងជាព្រះគ្រូចៅអធិការវត្តរាជបូណ៌ លោក អុឹង គឹមលាង អភិបាលរងខេត្ត តំណាងដ៏ខ្ពង់ខ្ពស់ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប និងវត្តមានចូលរួមពីលោកតាបណ្ឌិត កុល ផេង បិតាស្ថាបនិក និងជាសាកលវិទ្យាធិការ នៃសាកលវិទ្យាល័យបញ្ញាសាស្ត្រកម្ពុជា និងប្រធានការិយាល័យកុងស៊ុលជប៉ុន និងការិយាល័យកុងស៊ុលចិនប្រចាំខេត្តសៀមរាប និងថ្នាក់ដឹកនាំអង្គភាពមន្ទីរស្ថាប័នពាក់ព័ន្ធមួយចំនួន ក្នុងខេត្ត លោក លោកស្រីជា ក្រុមប្រឹក្សាភិបាល គណ:គ្រប់គ្រង បុគ្គលិកសាស្ត្រាចារ្យនិស្សិត មាតាបិតា អាណាព្យាបាលជាច្រើនរូបទៀតផងដែរ។
ក្នុងរបាយការណ៍របស់លោកឈួន សំឡី នាយកសាខាសាកលវិទ្យាល័យបញ្ញាសាស្ត្រកម្ពុជាខេត្តសៀមរាប ថា៖ សាខានេះទទួលបានការអនុញ្ញាតពីករសួងអប់រំ យុវជន និងកីឡា តាមរយ:ប្រកាសលេខ៥៦ អ.យ.ក.ប្រ.កចុះថ្ងៃទី១៥ខែមករាឆ្នាំ២០១០ ដើម្បីចូលរួមបណ្តុះបណ្តាលចំណេះដឹង និងអភិវឌ្ឍធនធានមនុស្សដល់យុវជន។ បច្ចុប្បន្នសាខានេះ មានបុគ្គលិក និងសាស្ត្រាចារ្យសរុបចំនួន ៨២នាក់ និងមាននិស្សិតសិក្សាក្នុងដំណាក់កាលជំងឺកូវីដ-១៩ ចំនួន ១,៤៩៦នាក់ ក្នុងនោះកំពុងសិក្សាថ្នាក់បរិញ្ញាបត្រជាន់ខ្ពស់ចំនួន ៤៧នាក់ បរិញ្ញាបត្រ និងបរិញ្ញាបត្ររងចំនួន ៤៩៩នាក់ និងកំពុងរៀនត្រៀមថ្នាក់ភាសាអង់គ្លេសចំនួន ៩៥០នាក់។លោកតាបណ្ឌិត កុល ផេង បិតាស្ថាបនិក និងជាសាកលវិទ្យាធិការ នៃសាកលវិទ្យាល័យបញ្ញាសាស្ត្រកម្ពុជា បានផ្តាំផ្ញើដល់និស្សិតជ័យលាភីទាំងអស់ឱ្យប្រឹងប្រែងហាត់ពត់លត់ដំខ្លួន និងយកចំណេះដឹងទាំងអម្បាលមាណចូលរួមបំរើការងារតាមបណ្តាអង្គភាពស្ថាប័ននានាឱ្យស្របតាមចំណេះជំនាញសមត្ថភាពរបស់ខ្លួន ត្រូវចេះកោតក្រែងគោរពឱនលំទោនជាមួយអ្នកមានគុណ ចាស់ព្រឹទ្ធាចារ្យ ត្រូវចេះគោរពដឹងគុណចំពោះព្រះពុទ្ឋសាសនា គោរពព្រះមហាក្សត្រ និងគោរពដឹងគុណប្រមុខថ្នាក់ដឹកនាំរាជរដ្ឋាភិបាល ដែលបានដឹកនាំប្រទេសជាតិឱ្យមានសន្តិភាព និងភាពរីកចម្រើនលើគ្រប់វិស័យ និងកុំភ្លេចដឹងគុណចំពោះលោក គ្រូអ្នកគ្រូ ដែលខិតខំផ្ទេរចំណេះវិជ្ជាទៅដល់ក្មួយៗជាពិសេសត្រូវគោរព និងតបគុណសម្តែងនូវកត្តញ្ញូចំពោះអ្នកមានគុណរបស់ខ្លួនមានមាតាបិតាអាណាព្យាបាលផងទាំងពួង ដែលពួកគាត់ខិតខំចិញ្ចឹមបីបាច់តាំងពីតូចដល់ធំ និងបានប្រឹងប្រែង ផ្គត់ផ្គង់សព្វសារពើ ដោយបានលះបង់អ្វីៗសព្វបែបយ៉ាងដើម្បីកូនៗរៀនសូត្របានខ្ពង់ខ្ពស់ មានអនាគតល្អ។ លោក អុឹង គឹមលាង អភិបាលរងខេត្ត បានផ្តល់អនុសាសន៍គន្លឺះមួយចំនួន សម្រាប់និស្សិតក្នុងឱកាសនេះយកទៅអនុវត្តឱ្យបានជោគជ័យនាពេលអនាគត។
លោក មានប្រសាសន៍បន្តថា៖ សញ្ញាបត្រដែលទទួលបាននៅពេលនេះបញ្ជាក់ពីលទ្ធផលនៃការខិតខំប្រឹងប្រែងរបស់ប្អូនៗយកចិត្តទុកដាក់ក្នុងការសិក្សា និងការប្រឹងប្រែងយកចិត្តទុកដាក់របស់គណ:គ្រប់គ្រង លោកគ្រូ អ្នកគ្រូក្នុងការចងក្រងស្រាវជ្រាវឯកសារមេរៀនសម្រាប់ផ្ទេរចំណេះដឹងមកឱ្យប្អូនៗ ហើយប្អូនៗក៏ទទួលការទំនុកបំរុង គាំទ្រទាំងកម្លាំងកាយចិត្ត និងធនធានថវិកាពីមាតាបិតា អាណាព្យាបាល និងក្រុមគ្រួសារបងប្អូនសាច់ញាតិ ទាំងនេះសុទ្ធតែជាកត្តាមិនអាចខ្វះបាន ដែលបានជួយរុញប្អូនៗឱ្យទទួលបានជោគជ័យ ពិសេសជាងនេះទៀត កត្តាប្រទេសជាតិមានសុខសន្តិភាព ជាកត្តាចម្បងដែលរឹតតែត្រូវការជាចាំបាច់។ លោក អុឹង គឹមលាង បានចាត់ទុកការបញ្ចប់ការសិក្សានៅសាកលវិទ្យាល័យថាជាទុនសម្រាប់ប្អូនៗ បន្តទៅ រៀបចំផែនការនៃការគ្រប់គ្រង និងតម្រង់ទិសសម្រាប់គោលដៅជីវិតរៀងៗខ្លួន ឱ្យច្បាស់លាស់ តាមរយ:ការរៀបចំផែនការយុទ្ធសាស្ត្រទៅតាមឆន្ទ: និងសមត្ថភាពរបស់ខ្លួន ដើម្បីបំរើប្រយោជន៍ផ្ទាល់ខ្លួន បំរើគ្រួសារ និងឧត្តមប្រយោជន៍សម្រាប់សង្គមជាតិ ទាំងអស់គ្នា។ លោកអភិបាលរងខេត្តបញ្ជាក់ថា៖រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ជាប្រមុខដឹកនាំដ៏ឈ្លាសវៃនិងប្រកបដោយគតិបណ្ឌិត បានយកចិត្តទុកដាក់យ៉ាងខ្លាំងក្នុងការបន្តកសាង និងអភិវឌ្ឍធនធានមនុស្សលើគ្រប់ផ្នែក ប្រកបដោយគុណភាព ដែលឆ្លើយតបបានទៅនឹងសំណូមពរ នៃការអភិវឌ្ឍសេដ្ឋកិច្ចសង្គម ដើម្បីកសាងកម្ពុជាឱ្យក្លាយជាសង្គមរីកចម្រើនជឿនលឿន ដោយផ្អែកលើមូលដ្ឋានចំណេះដឹងលើគ្រប់វិស័យទាំងវិទ្យាសាស្ត្របច្ចេកទេស និងចំណេះធ្វើ ដើម្បីដើរស្របជាមួយនឹងការរីកចម្រើន នៃបណ្តាប្រទេសក្នុងតំបន់ និងពិភពលោក៕
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
