ថ្លែងក្នុងឱកាសបិទវគ្គបណ្តុះបណ្តាលផ្នែកផលិតព័ត៌មាន (សសេរព័ត៌មានបឋម) នៅសាលាខេត្តសៀមរាប ដែលបានសហការរៀបចំឡើងដោយមន្ទីរព័ត៌មានខេត្ត នៅព្រឹកថ្ងៃទី២១ ខែកក្កដា ឆ្នាំ២០២២ លោក លីសំរិទ្ឋ អភិបាលរងខេត្តសៀមរាប បានជម្រុញដល់សិក្ខាកាមទាំងអស់ដែលមកពីតាមស្ថាប័ន មន្ទីរ អង្គភាព រដ្ឋបាលក្រុង-ស្រុក ដែលបានចូលរួមក្នុងវគ្គបណ្តុះបណ្ដាលនេះ ត្រូវយកចំណេះដឹងដែលទទួលបានពីការសិក្សានេះ ទៅអនុវត្តក្នុងស្ថាប័នរបស់ខ្លួន ឱ្យមានប្រសិទ្ធភាព ហើយត្រូវសហការឲ្យបានល្អទៅលើបញ្ជូនរបាយការណ៍លទ្ធផលសកម្មភាពការងាររបស់ខ្លួនដែលសម្រេចបាន និងកំពុងបន្តអនុវត្ត មករដ្ឋបាលខេត្ត និងមន្ទីរព័ត៌មាន ដើម្បីសម្រួលផ្សព្វផ្សាយឱ្យបានទូលំទូលាយ ជូនដល់រាជរដ្ឋាភិបាល ក៏ដូចជាប្រជាពលរដ្ឋទៅ ចំពោះសមទ្ធិផល ក៏ដូចជាក្តីកង្វល់ បញ្ហាប្រឈម និងសុំណូមពរនានា ពីប្រជាពលរដ្ឋមករាជរដ្ឋាភិបាលដើម្បីធ្វើការដោះស្រាយ។
ក្នុងឱកាសនោះដែរ លោកអភិបាលរងខេត្ត បានសម្តែងនូវការកោតសរសើរចំពោះថ្នាក់ដឹកនាំមន្ទីរព័ត៌មានខេត្ត ដែលបានសហការជាមួយរដ្ឋបាលខេត្ត រៀបចំបើកវគ្គបណ្តុះបណ្តាលនេះឡើង ក្នុងគោលបំណងឲ្យមន្ត្រីព័ត៌មាន មន្ទីរ-អង្គភាព និងរដ្ឋបាលក្រុង-ស្រុក ក្នុងខេត្ត មានសមត្ថភាពក្នុងការសរសេរព័ត៌មាន ប្រកបដោយគុណភាព ប្រសិទ្ធភាព តម្លាភាព និងមានវិជ្ជាជីវៈតាមស្តង់ដារ។ ជាក់ស្ដែងបច្ចុប្បន្ននេះ ស្ថានភាពសកលលោកកំពុងប្រឈមទៅនឹងព័ត៌មានក្លែងក្លាយ ការញុះញង់ បញ្ជេះកំហឹង ការជេរប្រមាថ នាំឱ្យមានការស្អប់ខ្ពើម និងឧក្រិដ្ឋកម្មព័ត៌មានវិទ្យា ដូចជាការចាប់ជំរិតទារប្រាក់ ការចូលបំផ្លាញឯកសារ និងការរំលោភលើសិទ្ធិបុគ្គលជាដើម-ល- បាននឹងកំពុងគំរាមដល់សន្តិសុខនៅលើសកលលោក។ ដូចនេះតម្រូវឲ្យភាគីពាក់ព័ន្ធទាំងអស់ រួមគ្នាបង្កើតនូវកិច្ចសហប្រតិបត្តិការណ៍ឲ្យកាន់តែជិតស្និតថែមទៀត ទាំងក្របខណ្ឌរដ្ឋ វិស័យឯកជន និងអង្គការក្រៅរដ្ឋាភិបាល ដើម្បីប្រយុទ្ធប្រឆាំងទៅនឹងព័ត៌មានក្លែងក្លាយ និងឧក្រិដ្ឋកម្មព័ត៌មានវិទ្យានេះ។ ជាមួយគ្នានេះ រាជរដ្ឋាភិបាលកម្ពុជាបាននឹងកំពុងយកចិត្តទុកដាក់យ៉ាងខ្លាំង លើបញ្ហាធ្វើវិសោធទនកម្មច្បាប់ ស្តីពីរបបសារព័ត៌មានហើយសេចក្តីព្រាងច្បាប់ស្តីពីសិទ្ធិទទួលបានព័ត៌មាន ក៏និងដាក់ចេញឱ្យប្រើប្រាស់នាពេលឆាប់ៗខាងមុននេះ ដើម្បីឱ្យស្របនឹងបរិបទនៃការរីកចំរើនរបស់បច្ចេកវិទ្យាព័ត៌មានក្នុងយុគសម័យ Digital ។
សូមជម្រាបថា វគ្គបណ្តុះបណ្តាលផ្នែកផលិតព័ត៌មាន (សសេរព័ត៌មានបឋម) មានរយៈពេល០១ថ្ងៃកន្លះ គឺថ្ងៃទី២០ និង២១ ខែកក្កដា ឆ្នាំ២០២២នេះ ដោយផ្តោតលើមូលដ្ឋានសំខាន់២ គឺមូលដ្ឋានគ្រឹះនៃការសសេរដំណឹង និងមូលដ្ឋានគ្រឹះនៃការថតរូប។ វគ្គបណ្តុះបណ្ដាលនេះធ្វើឡើងនៅសាលាខេត្តសៀមរាប ក្រោមកិច្ចសហការរៀបចំឡើងដោយមន្ទីរព័ត៌មានខេត្ត និងរដ្ឋបាលខេត្ត ដែលមានសិក្ខាកាមចំនួន ៩៨នាក់ មកពី ៥៨ស្ថាប័នបានចូលរួម មាន៖ មន្ទីរ-អង្គភាព រដ្ឋបាលក្រុង-ស្រុក ទូទាំងខេត្តសៀមរាប។
ផ្អែកតាមការវាយតម្លៃរបស់គណៈគ្រប់គ្រងវគ្គបណ្តុះបណ្ដាលនេះ លោក លីវ សាន្ត ប្រធានស្តីទីនៃមន្ទីរព័ត៌មានខេត្ត បានពិនិត្យឃើញថា ក្នុងវគ្គបណ្ដាលនេះ មានសិក្ខាកាមចំនួន ៧០ភាគរយ ហាក់បានយល់ដឹងខ្ពស់ និងសិក្ខាកាម ចំនួន ៣០ភាគរយ បានយល់ដឹងបង្កួរ។ ក្នុងនោះលោកក៏បានស្នើសុំឱ្យថ្នាក់ដឹកនាំស្ថាប័ន មន្ទីរ-អង្គភាព រដ្ឋបាលក្រុង-ស្រុក យកចិត្តទុកដាក់គាំទ្រ ដោយជំរុញឱ្យមន្ត្រីដែលបានចូលរួមវគ្គបណ្តុះបណ្តាលយកចំណេះដឹងដែលទទួលបានពីការសិក្សានេះ ទៅអនុវត្តប្រកបកដោយប្រសិទ្ធភាព តម្លាភាព សំដៅចែករំលែកព័ត៌មាន ជូនដល់រាជរដ្ឋាភិបាល និងប្រជាពលរដ្ឋ និងសហការផ្តល់ព័ត៌មានដល់អ្នកសារព័ត៌មាន តាមលទ្ធភាពដែលអាចផ្តល់ជូនបាន។
លោកប្រធានមន្ទីរព័ត៌មានខេត្តស្តីទី ក៏បានបញ្ជាក់ដែរថា កន្លងមកមន្ទីរព័ត៌មានខេត្ត បានបើកវគ្គបណ្តុះបណ្តាល វគ្គបំប៉នសសេរព័ត៌មាន ថតរូបភាព ផ្នែកអានព័ត៌មាន លិខិតជូនដំណឹង លិខិតបទដ្ឋាន សារអប់រំ អត្ថាធិប្បាយ ដល់អ្នកសារព័ត៌មាន និងមន្ត្រីរបស់វិទ្យុ និងទូទស្សន៍ ជាតិខេត្តសៀមរាប ចំនួន ៤លើក និងបានសហការជាមួយអង្គការដៃគូរនានា ក្នុងការសម្របសម្រួលបើកវគ្គបណ្តុះបណ្តាល ស្តីពីច្បាប់របបសារព័ត៌មាន និងក្រមសីលធម៌វិជ្ជាជីវៈសារព័ត៌មានចំនួន ០៣លើកផងដែរ៕
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
