តំណាងគណៈកម្មាធិការជាតិប្រឆាំងភេរវកម្មរបស់កម្ពុជា គូសបញ្ជាក់ថា សៀវភៅផែនការជាតិ ប្រឆាំងភេរវកម្ម ជាសមិទ្ធផលថ្មីមួយរបស់រាជរដ្ឋាភិបាល ក្នុងការនាំយកកម្ពុជាឲ្យចាកចេញផុតពីគោលដៅរបស់ភេរវនិយម និងបង្ហាញថា កម្ពុជាមិនគាំទ្រដល់អំពើភេរវកម្ម។
ថ្លែងក្នុងសិក្ខាសាលាផ្សព្វផ្សាយ អំពីសៀវភៅផែនការជាតិប្រឆាំងភេរវកម្ម ដែលធ្វើឡើងនៅសាលាខេត្តសៀមរាប នាថ្ងៃទី២២ ខែកក្កដាឆ្នាំ២០២២នេះ ឯកឧត្តម ប៉ឹល ច័ន្ទវីរៈ សមាជិកលេខាធិការដ្ឋាន គណៈកម្មាធិការជាតិប្រឆាំងភេរវកម្ម លើកឡើងថា ក្នុងនាមជាប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានយកចិត្តទុកដាក់យ៉ាងខ្លាំង ក្នុងការប្រយុទ្ធប្រឆាំងនឹងអំពើភេរវកម្ម ដូចជាការអនុម័តច្បាប់ប្រឆាំងនឹងអំពើភេរវកម្ម ច្បាប់ប្រឆាំងការសម្អាតប្រាក់ និងហិរញ្ញប្បទានភេរវកម្មជាដើម។ សៀវភៅផែនការជាតិប្រឆាំងភេរវកម្មនេះដែរបង្កើតឡើង ក្នុងគោលបំណងនាំយកកម្ពុជាចេញពីគោលដៅរបស់ក្រុមភេរវនិយម ក៏ដូចជាការទប់ស្កាត់ចរន្តសាច់ប្រាក់របស់ក្រុមភេរវកម្មផងដែរ។
លោក អ៊ឹង គឹមលាង អភិបាលរងខេត្តសៀមរាប លើកឡើងថា សៀវភៅផែនការជាតិប្រឆាំងភេរវកម្មនេះ ពិតជាមានសារសំខាន់ ដែលនឹងជួយយើងអាចបំផ្លាញចោលរចនាសម្ព័ន្ធ ក៏ដូចជាគោលដៅវាយប្រហាររបស់ក្រុមភេរវកម្មផងដែរ។
ព័ត៌មានជាតិ ថ្មីៗ
ក្នុងខ្លឹមសារបទបង្ហាញ នៃសិក្ខាសាលានេះដែរ បង្ហាញថា សកម្មភាពភេរវកម្មបង្កឡើងដោយភេរវជន ឬអង្គការ ចាត់តាំងរករវកម្ម តាមរយៈនៃការប្រើប្រាស់មធ្យោបាយជាច្រើន ដូចជាការក្លែងឯកសារសាធារណៈ ហិរញ្ញប្បទានភេរវកម្ម ការបណ្តុះមនោគមវិជ្ជាតាមបណ្ដាញទំនាក់ទំនងសង្គមទំនើប(Facebook, Twitter, Whatsapp Telegram Rocket, Chat… ក្នុងការអូសទាញកម្លាំងចូលរួមក្នុងសកម្មភាពភេរវកម្ម ការធ្វើបដិវត្តពណ៌ ឧក្រិដ្ឋកម្មឆ្លងដែន បទល្មើសបច្ចេកវិទ្យា ការវាយប្រហារដោយការដាក់បំផ្ទុះ និងមធ្យោបាយដទៃៗទៀត៕
អត្ថបទ និង រូបភាព៖ លោក ជា ស្រស់
កែសម្រួល៖ លោក សេង ផល្លី
