នាសណ្ឋាគារ អង្គរប៉ារ៉ាឌីស ខេត្តសៀមរាប ថ្ងៃទី ២២ ខែកក្កដា ឆ្នាំ ២០២២ ក្រសួងសេដ្ឋកិច្ច និងហិរញ្ញវត្ថុ សហការជាមួយនឹងធនាគារអភិវឌ្ឍន៍អាស៊ី (ADB) បានរៀបចំសិក្ខាសាលាស្តីពី “ឥទ្ធិពលនៃការអភិវឌ្ឍទីផ្សារមូលធននិរន្តរភាពក្នុងតំបន់អាស៊ាន សម្រាប់ការអភិវឌ្ឍទីផ្សារសញ្ញាបណ្ណនិរន្តរភាពនៅកម្ពុជា” ដែលមានអ្នកចូលរួមដោយផ្ទាល់ និងតាមប្រព័ន្ធវីដេអូចំនួន ១៨៥រូប មកពីវិស័យរដ្ឋ និងឯកជនដែលពាក់ព័ន្ធលើវិស័យមូលបត្រ និងហិរញ្ញវត្ថុ។
សិក្ខាសាលានេះ រៀបចំឡើងក្នុងគោលបំណង លើកកម្ពស់ការយល់ដឹងពាក់ព័ន្ធនឹងហិរញ្ញវត្ថុនិរន្តរភាព ជាពិសេសទីផ្សារមូលធននិរន្តរភាព ក្នុងតំបន់អាស៊ានទៅដល់និយ័តករ និងតួអង្គពាក់ព័ន្ធសំខាន់ៗនៅក្នុងទីផ្សារ និងកិច្ចគាំទ្រដែលផ្តល់ដោយធនាគារអភិវឌ្ឍន៍អាស៊ី ក៏ដូចជាដើម្បីជំរុញការអភិវឌ្ឍទីផ្សារសញ្ញាបណ្ណនិរន្តរភាពនៅកម្ពុជា។
ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា (ន.ម.ក.) លើកឡើងថា ការផ្តល់ហិរញ្ញប្បទានគ្រប់គ្រាន់គឺត្រូវការជាចាំបាច់ ដើម្បីសម្រេចបាននូវគោលដៅរួមនៃការអភិវឌ្ឍន៍ប្រកបដោយនិរន្តរភាពរបស់យើង។ ទន្ទឹមនឹងនេះ មានផ្នែកជាច្រើននៃពិភពលោកកំពុងប្រឈមមុខនឹងគម្លាតនៃការវិនិយោគ ដើម្បីផ្តល់មូលនិធិដល់ការអភិវឌ្ឍន៍ប្រកបដោយនិរន្តរភាពដែលចង់បាននេះ។ ដូច្នេះហើយ នៅក្នុងផែនការសកម្មភាព ២០២១-២០២៥ របស់វេទិកាទីផ្សារមូលធនអាស៊ាន (ACMF) បានធ្វើឱ្យការលើកកម្ពស់ហិរញ្ញវត្ថុប្រកបដោយនិរន្តរភាព ជារបៀបវារៈអាទិភាពដ៏សំខាន់មួយ។ ដើម្បីគាំទ្រដល់ហិរញ្ញវត្ថុប្រកបដោយនិរន្តរភាព និងការអភិវឌ្ឍប្រកបដោយចីរភាព វេទិកាទីផ្សារមូលធនអាស៊ាន (ACMF) បានអនុម័តគំនិតផ្តួចផ្តើមជាច្រើន ដែលរួមមានស្តង់ដារសញ្ញាបណ្ណអាស៊ាន បៃតង សង្គម និងនិរន្តរភាព និងផែនទីបង្ហាញផ្លូវសម្រាប់ទីផ្សារមូលធនប្រកបដោយនិរន្តរភាពអាស៊ាន។
ឯកឧត្តមបន្ថែមថា៖ សិក្ខាសាលានេះ ក៏មានគោលបំណងបំភ្លឺបន្ថែមលើប្រធានបទផ្សេងៗ និងជាពិសេសដើម្បីផ្សព្វផ្សាយព័ត៌មានស្តីពីគំនិតផ្តួចផ្តើមសំខាន់ៗ ដោយវេទិកាទីផ្សារមូលធនអាស៊ាន (ACMF) និងរបៀបដែលកម្ពុជា និងក្រុមហ៊ុនកម្ពុជាអាចរៀន និងទទួលបានអត្ថប្រយោជន៍ពីពួកគេ។ ប្រធានបទទាំងនេះរួមមាន ការអភិវឌ្ឍនៃនិក្ខេបបទហិរញ្ញវត្ថុប្រកបដោយនិរន្តរភាពអាស៊ាន ការលើកកម្ពស់ស្តង់ដារសញ្ញាប័ណ្ណបៃតង សង្គម និងនិរន្តរភាពអាស៊ាន ផែនទីបង្ហាញផ្លូវសម្រាប់ទីផ្សារមូលធននិរន្តរភាពអាស៊ាន ការគាំទ្រផ្នែកបច្ចេកទេសដែលមានដោយ ADB ដំណើរការចេញមូលបត្របំណុលបៃតង និងការរកឃើញរបស់ ការស្ទង់មតិទីផ្សារមូលបត្របំណុលបៃតង ផលប៉ះពាល់នៃសញ្ញាប័ណ្ណនិរន្តរភាពក្នុងអាស៊ាន និងកម្ពុជា ក៏ដូចជាមូលហេតុដែលក្រុមហ៊ុនគួរតែចេញសញ្ញាប័ណ្ណបៃតង សង្គម ឬនិរន្តរភាព។
ឯកឧត្តម ក៏បានជំរុញឱ្យអ្នកចូលរួមទាំងអស់ ចូលរួម និងផ្លាស់ប្តូរទស្សនៈដោយបើកចំហ ហើយសង្ឃឹមថា តាមរយៈសិក្ខាសាលានេះ នឹងផ្តល់ឱកាសដ៏ល្អដល់មនុស្សគ្រប់គ្នាក្នុងការចូលរួម និងពិភាក្សា ដើម្បីរួមចំណែកដល់ការអភិវឌ្ឍបន្ថែមទៀតនៃក្របខ័ណ្ឌហិរញ្ញវត្ថុប្រកបដោយនិរន្តរភាពនៅក្នុងអាស៊ាន ក៏ដូចជាទីផ្សារមូលធននៅកម្ពុជា៕
អត្ថបទ និង រូបភាព៖ លោក យូ វង្ស
កែសម្រួល៖ លោក សេង ផល្លី
