ព្រះសច្ចានុបាល នឿម វុទ្ឍី ព្រះរាជាគណៈថ្នាក់កិត្តិយស និងជាព្រះចៅអធិការវត្តបារាយមហានទី ហៅវត្តស្វាយរមៀត ក្រុងសៀមរាប រួមនឹងព្រះរាជាគណៈ និងចៅអធិការមួយចំនួន ក្នុងខេត្តសៀមរាប ប្រជាពុទ្ឋបរិស័ទក្នុងខេត្តជាង ១៥០នាក់ កាលពីថ្ងៃចុងសប្ដាហ៍កន្លងទៅនេះ បាននាំយកគម្ពីរព្រះត្រៃបីដក ចំនួន ១១០ក្បាល និងអដ្ឋកថា ៨០ក្បាល យកមកតម្កល់ទុកនៅបណ្ណាល័យប្រវត្តិសាស្ត្រ កងពលតូចថ្មើរជើងលេខ៤១ ស្ថិតក្នុងស្រុកអន្លង់វែង ខេត្តឧត្តរមានជ័យ។
លោកវរសេនីយ៍ឯក ឯម វាសនា មេបញ្ជាការរង និងជាប្រធានក្រុមការងារប្រវត្តិសាស្ត្រយោធាកងពលតូចថ្មើរជើងលេខ៤១ បានសម្តែងនូវការដឹងគុណ អរព្រះគុណ និងអរគុណយ៉ាងក្រៃលែង ចំពោះព្រះសង្ឃ និងពុទ្ធបរិស័ទទាំងអស់ ដែលបានដង្ហែរគម្ពីរព្រះត្រៃបិដក និងសៀវភៅអដ្ឋកថា ដែលជាច្បាប់បញ្ញត្តិរបស់ព្រះសម្មាសម្ពុទ្ធសម្រាប់តម្កល់ទុក ដើម្បីចែករំលែកចំណេះដឹងទៅដល់ព្រះសង្ឃ សមណសិស្ស ពុទ្ធបរិស័ទជិតឆ្ងាយ និងសាធារណជនបានមកស្រាវជ្រាវសិក្សារៀនសូត្រនៅទីនេះ។ សម្រាប់អគារបណ្ណាល័យ និងសារមន្ទីរប្រវត្តិសាស្ត្រ កងពលតូចថ្មើរជើងលេខ៤១ គឺកសាងឡើងក្នុងគោលបំណងប្រមូលផ្តុំ និងតម្កល់ទុកនូវសៀវភៅប្រវត្តិសាស្ត្រខ្មែរគ្រប់ជំនាន់ សៀវភៅប្រវត្តិសាស្ត្រយោធា សៀវភៅចំណេះដឹងទូទៅ ដើម្បីជាប្រយោជន៍សម្រាប់កងទ័ព មន្ត្រីរាជការ សិស្ស និស្សិត និងសាធារណជនមកសិក្សាស្រាវជ្រាវរៀនសូត្រ។
មានសង្សដីកានាឱកាសនោះ ព្រះសច្ចានុបាល នឿម វុទ្ធី មូលហេតុដែលព្រះអង្គដឹកនាំពុទ្ធបរិស័ទដង្ហែរគម្ពីរធម៌មកតម្កល់ទុកនៅបណ្ណាល័យនាពេលនេះ ដោយកន្លងមកព្រះអង្គបានដឹកនាំមន្ត្រីសង្ឃមកសូត្រមន្តបញ្ចុះបឋមសិលាសាងសង់អគារ ២ជាន់ នៅទីបញ្ជាការកងពលតូចថ្មើរជើងលេខ៤១ តាមការនិមន្តរបស់ មេបញ្ជាការ កងពលតូចថ្មើរជើងលេខ៤១ ហើយត្រូវបានថ្នាក់ដឹកនាំកងពលនិមន្តព្រះអង្គឲ្យចូលទស្សនាអគារបណ្ណាល័យ និងសារមន្ទីរប្រវត្តិសាស្ត្រ កងពលតូចថ្មើរជើងលេខ៤១ ធ្វើឲ្យព្រះអង្គកើតមានសេចក្តីជ្រះថ្លាដោយឃើញការស្ថាបនាអគារបណ្ណាល័យ និងសារមន្ទីរប្រវត្តិសាស្ត្ររបស់កងទ័ពនេះ មានភាពស្រស់ស្អាតរចនាបទបែបបុរាណ និងមានភាពទាក់ទាញ ទើបព្រះអង្គសម្រេចព្រះទ័យអំពាវនាវដល់ពុទ្ធបរិស័ទជិតឆ្ងាយ ហើយក៏មានពុទ្ធបរិស័ទ ក្នុងខេត្តសៀមរាប និងបណ្តាខេត្តមួយចំនួន ព្រមទាំងមានសប្បុរសជនមកពីក្រៅប្រទេស កើតមានសទ្ធាជ្រះថ្លារួមគ្នាជាវគម្ពីរធម៌ និងបានដង្ហែរមកតម្កល់ទុក នៅក្នុងបណ្ណាល័យនៅពេលនេះតែម្តង។
សូមជម្រាបដែរថា ក្នុងឱកាសនោះក្រុមមន្ត្រីសង្ស ក៏បាននាំយកនូវគ្រឿងឧបភោគបរិភោគមួយចំនួន រួមមាន៖ មី ៥៧កេះ ,ភេសជ្ជៈ ១៤កេស ,ត្រីខ ២៨០កំប៉ុង, ទឹកត្រី ១៤យួរ, ទឹកស៊ីអ៊ីវ ២៦យួរ, ស្ករស ១០គីឡូក្រាម, សៀង ៤គីឡូក្រាម, ផ្អកត្រីប្រា ផ្អកពងត្រី ៨គីឡូក្រាម និងថវិកា ១លានរៀល ប្រគល់ជូនដល់កងពលតូចថ្មើរជើងលេខ៤១ ផងដែរ៕
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
