ការអភិវឌ្ឍន៍ប្រទេស ដែលល្អត្រូវពឹងផ្អែកលើទិន្ន័យស្ថិតិ មិនថាវិស័យណាក៏ដោយ ព្រោះទិន្នន័យផ្ដល់អត្ថប្រយោជន៍ ជារបាយការណ៍វិភាគស៊ីជម្រៅ ជាកិច្ចការសំខាន់ មានអាទិភាពខ្ពស់សម្រាប់ការប្រើប្រាស់តាមវិស័យផ្សេងៗ នេះបើតាមការលើកឡើង របស់ឯកឧត្តម លេង ផាលី រដ្ឋលេខាធិការក្រសួងផែនការ តំណាងឯកឧត្តមកិត្តិសេដ្ឋាបណ្ឌិត ឆាយ ថន ទេសរដ្ឋមន្តី រដ្ឋមន្ត្រីក្រសួងផែនការ នៅក្នុងសិក្ខាសាលាផ្សព្វផ្សាយរបាយការណ៍ វិភាគស៊ីជម្រៅលើប្រធានបទផ្អែកតួលេខជំរឿនទូទៅប្រជាជនកម្ពុជាឆ្នាំ២០១៩ នាសាលាខេត្តសៀមរាប ថ្ងៃទី ២៥ ខែកក្កដា ឆ្នាំ ២០២២។
ឯកឧត្តម លេង ផាលី គូសបញ្ជាក់ថា ជំរឿនប្រជាជនគឺជាប្រភពព័ត៌មាន ដ៏សម្បូរបែប ដែលផ្តល់នូវចំនួន និងចរិតលក្ខណៈប្រជាជន សម្រាប់ការប្រើប្រាស់តាមវិស័យផ្សេងៗ ដូចជាវិស័យនគររូបនីយកម្ម និងសំណង់ វិស័យសេដ្ឋកិច្ច ការងារ និងមុខរបរ វិស័យអប់រំ វិស័យសុខភាពសាធារណៈ វិស័យសុខុមាលភាពសង្គមកិច្ច វិស័យគ្រប់គ្រងរដ្ឋបាល វិស័យទឹកស្អាត និងអនាម័យ វិស័យវិសមភាពយេនឌ័រជាដើម ។
ឯកឧត្តម រដ្ឋលេខាធិការ បន្ថែមថា ការធ្វើជំរឿនប្រជាជននេះដែរ ក៏នឹងក្លាយជាមូលដ្ឋានគ្រឹះ សម្រាប់ការធ្វើចំណោល ឬព្យាករណ៍ប្រជាជន សម្រាប់ការរៀបចំផែនការរយៈពេលវែង និងការធ្វើចំណាត់ថ្នាក់ឡើងវិញនៅទីប្រជុំជនតាមបទដ្ឋានជាតិ និងអន្តរជាតិ។ ទន្ទឹមនោះ ទិន្នន័យទាំងអស់នោះ ក៏នឹងផ្តល់នូវការប្រៀបធៀប សម្រាប់ជាសូចនាករមូលដ្ឋាន ក្នុងការអភិវឌ្ឍលើប្រធានបទជាច្រើនទៀត ទៅតាមវិស័យនានា។
ជាមួយនោះ ឯកឧត្តម បានថ្លែងកោតសរសើរ ដល់ គណៈកម្មាធិការជំរឿនទូទៅប្រជាជនរាជធានីខេត្ត គណៈកម្មការ បច្ចេកទេសជំរឿនទូទៅប្រជាជននៅព្រះរាជាណាចក្រកម្ពុជា គណៈកម្មការឃោសនាជំរឿនទូទៅប្រជាជននៅ ព្រះរាជាណាចក្រកម្ពុជា ក្រសួងផែនការ វិទ្យាស្ថានជាតិស្ថិតិ ព្រមទាំងមន្រ្តីជំរឿនរាប់ម៉ឺននាក់ និងប្រជាជន កម្ពុជាដែលបានបំពេញកិច្ចការនេះប្រកបដោយជោគជ័យ ។
ថ្លែងក្នុងឱកាសនោះ លោក ពិន ប្រាកដ អភិបាលរងខេត្តសៀមរាប លើកឡើងថា សិក្ខាសាលានាពេលនេះ ពិតជាជួយដល់សិក្ខាកាមយល់ដឹងពីសារៈប្រយោជន៍ ក្នុងការប្រើប្រាស់ទិន្នន័យពាក់ព័ន្ធនឹងប្រជាជនកាន់តែច្បាស់ ហើយក៏ជា បទពិសោធន៍ថ្មីបន្ថែមទៀត ក្នុងការចូលរួម ជាមតិយោបល់ពិភាក្សាស៊ីជម្រៅទៅលើខ្លឹមសារវិធីសាស្រ្ត បច្ចេកទេស ដែលពាក់ព័ន្ធដល់ការអភិវឌ្ឍនៅមូលដ្ឋាន។
សូមជម្រាបថា យោងតាមរបាយការណ៍ជំរឿនទូទៅប្រជាជនកម្ពុជាឆ្នាំ២០១៩ ប្រជាជនសរុបទូទាំងប្រទេសមានចំនួន ១៦.០៧៨.៦៦៦នាក់ ក្នុងនោះខេត្តសៀមរាបមានចំនួន ១.១៦៦.៤៩៣នាក់ ក្នុងនោះស្រីចំនួន ៥៩០.១៥៤នាក់។ អាត្រាកំណើនប្រជាពលរដ្ឋក្នុងខេត្តប្រចាំឆ្នាំ ២.៥៣%។ មុខរបរចម្បងរបស់ប្រជាពលរដ្ឋក្នុងខេត្ត រួមមាន ផ្នែកកសិកម្ម៦៩% សេវាកម្ម៣០% និងសិប្បកម្ម១%។ បន្ថែមពីនេះ យោងតាមទិន្នន័យមូលដ្ឋានឃុំសង្កាត់ បានបង្ហាញថា អត្រាភាពក្រីក្រក្នុងខេត្តពី១៣.៩២% នៅឆ្នាំ២០១៩ ថយចុះមកនៅត្រឹម១០.៩១% នៅឆ្នាំ២០២១។ នៅឆ្នាំ២០២២នេះ អត្រាភាពក្រីក្រនៅក្នុងខេត្តមានការថយចុះមកត្រឹម១០.៣៧% នៃគ្រួសារសរុបក្នុងខេត្ត។
អត្ថបទ និង រូបភាព៖ លោក ធន់ ពូថេ
កែសម្រួល៖ លោក សេង ផល្លី
