គណ:កម្មាធិការព្រំដែនថ្នាក់យោធភូមិភាគទី៤ នៃប្រទេសកម្ពុជា និងយោធភូមិភាគទី២ នៃប្រទេសថៃ បានបើកកិច្ចប្រជុំលើកទី២៣ របស់ខ្លួន ដើម្បីរឹតចំណងកិច្ចសហប្រតិបត្តិការឱ្យកាន់ល្អ រវាងភាគីទាំងពីរ តាមបណ្តោយព្រំដែន។កិច្ចប្រជុំនេះធ្វើឡើងនៅខេត្ដសៀមរាប ប្រទេសកម្ពុជា នាល្ងាចថ្ងៃទី២៥ ខែកក្កដាឆ្នាំ២០២២ ដឹកនាំដោយលោកឧត្តមសេនីយ៍ឯក ពៅ ហេង មេបញ្ជាការរង កងទ័ពជើងគោក និងជាមេបញ្ជាការយោធភូមិភាគទី៤ និងជាប្រធានគណ:កម្មាធិការព្រំដែន ថ្នាក់ យោធភូមិភាគ កម្ពុជា-ថៃ ជាមួយឯកឧត្តម ឧត្តមសេនីយ៍ទោ សវ:រ៉ាត សែងផុន មេបញ្ជាការយោធភូមិភាគទី២ ប្រធានគណ:កម្មាធិការព្រំដែន ថ្នាក់យោធភូមិភាគ ថៃ-កម្ពុជា។
លោកឧត្ដមសេនីយ៍ឯក ពៅ ហេង មានប្រសាសន៍ថា កិច្ចប្រជុំនេះបានប្រកាន់ខ្ជាប់តាមក្របខ័ណ្ឌ នៃកិច្ចសហប្រតិបត្តិការរបស់គណ:កម្មាធិការព្រំដែនទូទៅ ប្រទេសកម្ពុជា-ថៃ កម្ពុជា ដើម្បីរឹតចំណងកិច្ចសហប្រតិបត្តិការដ៏ល្អ របស់ភាគីទាំងពីរ និងលើកស្ទួយវិស័យសន្តិសុខ ក្នុងតំបន់ភូមិសាស្ត្រ តាមបណ្តោយព្រំដែន បង្កើតបានកិច្ចសហប្រតិបត្តិការដោះស្រាយនូវបញ្ហាដែលកើតឡើង បានយ៉ាងឆាប់រហ័ស ជាពិសេសអាចបញ្ចប់បញ្ហាបានពីថ្នាក់មូលដ្ឋាន កសាងសន្តិសុខ ស្ថិរភាព ក្នុងជីវភាពរស់នៅ និងទ្រព្យសម្បត្តិ លើកស្ទូយសេដ្ឋកិច្ចព្រំដែន ជូនដល់ប្រជាពលរដ្ឋ នៃប្រទេសទាំងពីរយ៉ាងល្អប្រសើរ។ លោកឧត្ដមសេនីយ៍ឯក បានបន្ដថា កម្ពុជា និងថៃ មានកិច្ចសហប្រតិបត្តិការដោះស្រាយនូវរាល់បញ្ហាសន្តិសុខ ក្នុងភូមិសាស្រ្តតំបន់ព្រំដែន ជាអាទ៌ ការបង្ក្រាប ទប់ស្កាត់គ្រឿងញៀន, ការរៀបចំសណ្តាប់ធ្នាប់ច្រកឆ្លងដែន និងការដោះមីន, គាំទ្រកិច្ចដំណើរការ តាមឋានានុក្រម ដើម្បីឈានឆ្ពោះទៅការលើកកំពស់ តំឡើងច្រកតំបន់សម្រាប់ការផ្លាស់ប្តូរទំនិញ ឱ្យក្លាយជាច្រកអន្តរជាតិ តាមនយោបាយរបស់រាជរដ្ឋាភិបាល និងបានកំណត់ចាត់តាំងក្រុមការងារ ក្នុងការទំនាក់ទំនង ដោយសហប្រតិបត្តិការ ដោះស្រាយបញ្ហាបន្ទាន់ចំពោះមុខផងដែរ។ ក្រៅពីនោះនៅថ្នាក់យោធភូមិភាគ បានកំណត់ឱ្យមានការជួបប្រាស្រ័យទាក់ទងគ្នារៀងរាល់បីខែម្តង។ កិច្ចសហប្រតិបត្តិការនេះ បានលើកស្ទួយជីវភាពរស់នៅដ៏ល្អ ជូនដល់ប្រជាពលរដ្ឋ ដែលរស់នៅតាមព្រំដែននៃប្រទេសទាំងពីរ ទាំងវិស័យសេដ្ឋកិច្ច សង្គមកិច្ច អប់រំ សុខាភិបាល ការសង្គ្រោះគ្រោះមហន្តរាយ និងវិស័យបរិស្ថាន ជាពិសេសការថែរក្សាធនធានព្រៃឈើ ក្រៅពីនោះនៅមាន កិច្ចសហប្រតិបត្តិការក្នុងការផ្លាស់ប្តូរបទពិសោធន៍ តាមទស្សនវិជ្ជា នៃសេដ្ឋកិច្ចគ្រប់គ្រាន់ផងដែរ។
បើតាមសេចក្ដីថ្លែការណ៍ របស់ភាគី នៃប្រទេសទំាងពីរកម្ពុជា ថៃ បានបង្ហាញថា លទ្ធផលនៃកិច្ចប្រជុំលើកនេះ បានរឹតចំណងកិច្ចសហប្រតិបត្តិការយ៉ាងល្អ រវាងកងឯកភាពយោធា និងកងឯកភាពថ្នាក់សន្តិសុខ នៃប្រទេសទាំងពីរ ឱ្យមានភាពស្អិតរមួត យល់ចិត្តគ្នាទៅវិញទៅមក ប្រាសចាកភាពទាស់ទែង លើកស្ទួយការអភិវឌ្ឍភូមិសាស្រ្ត តំបន់ព្រំដែន ទទួលបានសន្តិសុខ សុវត្ថិភាព ជូនដល់ប្រជាពលរដ្ឋ តាមទិសដៅរបស់រាជរដ្ឋាភិបាល នៃប្រទេសទាំងពីរ រួមទាំងការលើកស្ទួយគាំទ្រកិច្ចសហប្រតិបត្តិការ របស់សហគមន៍អាស៊ាន ឱ្យមានភាពរឹងមាំ គង់វង្ស និងយូអង្វែងតទៅ។សេចក្ដីថ្លែងការណ៍បញ្ជាក់ថា មេបញ្ជាការយោធភូមិភាគទី២ នៃកងទ័ពភូមិន្ទថៃ ដែលកន្លងមកនេះ បានផ្ដល់នូវ កិច្ចសហប្រតិបត្តិការដ៏ល្អប្រសើរ ជាមួយយោធភូមិភាគទី៤ របស់កម្ពុជា ក្នុងការដោះស្រាយបញ្ហាព្រំដែន៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!!
