សៀមរាប៖ មន្ត្រីជាន់ខ្ពស់កម្ពុជា និងអាស៊ាន បានអះអាងថា កម្មវិធីកិច្ចសន្ទនាយុវជនអាស៊ាន ជាវេទិការមួយដែលបានបង្កើតឱកាសដល់យុវជនយល់ដឹងនូវបញ្ហាផ្សេងៗដើម្បីចូលរួមនៅក្នុងការរៀបចំគោលនយោបាយ និងការផ្តល់អនុសាសន៍ផ្សេងៗដល់ថ្នាក់ដឹកនាំរបស់ខ្លួនបានយកទៅពិចារណា។
មានប្រសាសន៍នៅក្នុង សន្និសីទសារព័ត៌មាន ក្រោយពេលបិទបញ្ចប់កម្មវិធី នារសៀលថ្ងៃទី២៦ កក្កដា នេះ ឯកឧត្តម ហង់ជួន ណារ៉ុន បានលើកឡើងថា កម្មវិធីកិច្ចសន្ទនាយុវជនអាស៊ាននេះ ពិតជាមានសារសំខាន់សម្រាប់យុវជន ដែលជាការផ្តល់ឱកាសដល់តំណាងយុវជនមកពីប្រទេសទាំង១០ ដែលជាសមាជិកសមាគមអាស៊ាន និងយុវជនមកពីប្រទេសកូរ៉េខាងត្បូង អាចជជែកទល់មុខជាមួយរដ្ឋមន្ត្រីយុវជនអាស៊ាន និងមន្ត្រីជាន់ខ្ពស់នានាស្តីពីការផ្ដល់ អំណាចដល់យុវជន ចូលរួមឆ្លើយតបនឹងជំងឺរាតត្បាតកូវីដ-១៩ និងធ្វើសមាហរណកម្ម ក្នុងតំបន់។ កិច្ចសន្ទនាផ្តោតសំខាន់លើប្រធានបទស្នូលចំនួន៨ ផ្នែក ដូចជា ទី១ ផ្នែកអភិបាលកិច្ចល្អ ទី២ ផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ ទី៣ការបង្កើតការងារ សម្រាប់អនាគត់ ទី៤ ផ្នែកហេដ្ឋារចនាសម្ព័ន្ធ និងការតភ្ជាប់ ទី៥ កំណើនប្រកបដោយបរិយាប័ន្ន ទី៦ ការប្រែប្រួលអាកាសធាតុ ទី៧ កាត់បន្ថយគម្លាតអភិវឌ្ឍនៃប្រទេសអាស៊ាន និងទី៨ ការផ្លាស់ប្តូររវាងប្រទេសនិងប្រទេស។
ឯកឧត្តមបន្តថា ជាមួយគ្នានេះ យុវជនក៏អាចយល់ដឹងនូវអ្វីដែលអាស៊ានកំពុងធ្វើ អាស៊ានធ្វើអ្វី គឺធ្វើដើម្បីប្រជាជន មិនមែនធ្វើត្រឹមដើម្បីសហប្រតិបត្តិការ ខាងផ្នែកសេដ្ឋកិច្ចឬក៏ ខាងផ្នែកហិរញ្ញវត្ថុ ឬក៏នយោបាយនោះទេ។ អីចឹងសម្រាប់អនាគត យុវជនក៏ត្រូវត្រៀមខ្លួនជាពិសេសនៅក្នុងយុគសម័យដែលកំពុងមានការប្រកួតប្រជែង ។
លោកតេង ច័ន្ទគរុរដ្ឋា តំណាងយុវជន កម្ពុជា និងកញ្ញា គីម ស៊ូយុន (Suhyun Kim) តំណាងយុវជនមកពីប្រទេសកូរ៉េខាងត្បូង បានទទួលស្គាល់ថា កិច្ចសន្ទនាយុវជនអាស៊ាននេះ ពិតជាសំខាន់សម្រាប់យុវជននៅក្នុងការអភិវឌ្ឍន៍ខ្លួនឲ្យស្របតាមបរិបទ បដិវត្តឧស្សាហកម្ម៤.០។
កម្មវិធីកិច្ចសន្ទនាយុវជនអាស៊ាន បានធ្វើឡើងរយៈពេល២ថ្ងៃ គឺថ្ងៃទី២៥ និងទី២៦ ខែកក្កដា ឆ្នាំ២០២២ នៅក្រុងសៀមរាប ក្រោមប្រធានបទ“យុវជនក្នុងយុគសម័យ បដិវត្តន៍ឧស្សាហកម្មទី៤ ៖ ឱកាស និងបញ្ហាប្រឈមក្នុងការស្តារឡើងវិញក្រោយ ជំងឺរាតត្បាតកូវីដ-១៩”។
ឯកឧត្តម ដាតូ លឹមចុកហ៊យ(H.E. Dato Lim Jock Hoi) អគ្គលេខាធិការអាស៊ាន បានលើកឡើងថា បដិវត្តន៍ឧស្សាហកម្ម៤.០ ពិតជាមានសារសំខាន់យ៉ាងខ្លាំងសម្រាប់យុវជនជាពិសេសលើវិស័យអប់រំ ដោយសារតែបច្ចុប្បន្ន ការសិក្សាភាគច្រើនបានផ្តោតលើផ្នែកអនឡាញ ហើយក៏សំខាន់ផងដែរលើផ្នែកសេដ្ឋកិច្ចពាណិជ្ជកម្ម។ ប៉ុន្តែយ៉ាងណាមិញវាក៏មានបញ្ហាប្រឈមដែរ ដោយសារបច្ចុប្បន្នវិស័យឌីជីថល ឬតិចណូឡូជី នៅតែមានគម្លាតយ៉ាងខ្លាំងរវាងប្រជាពលរដ្ឋ ឬយុវជននៅតាមតំបន់ដាច់ស្រយាល ដែលពួកគាត់ពុំអាចទទួលបាននូវការចូលរួមជាមួយអ្នកដទៃ ក៏ដូចជាឧក្រិដ្ឋកម្មតាមអ៊ីធឺណិតជាដើម៕
អត្ថបទ និង រូបភាព៖ លោក ជា ស្រស់ និង លោក យូ វង្ស
