សកម្មភាពគណ:កម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប និងអង្គការដៃគូ អាជ្ញាធរមូលដ្ឋាន បានបន្តសកម្មភាពការងារទៅតាមផែនការដែលបានគ្រោងទុក បើទោះបីជាប្រឈមនឹងសភាពការណ៍ថ្មី នៃជំងឺកូវីដ-១៩ ដែលបានរាតត្បាតជាសកល និងធ្វើឲ្យមានការធ្លាក់ចុះ នៃសេដ្ឋកិច្ចពិភពលោក ក៏ដូចជា ក្នុងតំបន់ និងក្នុងប្រទេសយើងយ៉ាងណាក្តី ក៏ក្រុមការងារយើងសម្រេចបានលទ្ធផលល្អប្រសើរផងដែរ ។
ចាប់តាំងពីខែមីនា ឆ្នាំ២០២០មក រដ្ឋបាលខេត្ត និងគ្រប់មន្ទីរ អង្គភាព អាជ្ញាធរ ក្រុង-ស្រុក ឃុំ-សង្កាត់ អង្គការដៃគូជាតិ-អន្តរជាតិ បានប្ដូរទិសដៅការងារ ដោយផ្តោតលើការយកចិត្តទុកដាក់លើបញ្ហាកើតចេញពីវិបត្តិជំងឺកូវីដ-១៩ ដែលបានជះឥទ្ធិពលដល់សកម្មភាពលើគ្រប់វិស័យ ធ្វើឲ្យរាំងស្ទះដោយអន្លើ ដែលទាមទារឱ្យមានការដោះស្រាយជាបន្ទាន់ ទៅលើផលប៉ះពាល់នៃជីវភាពរស់នៅរបស់ប្រជាពលរដ្ឋ ពិសេសបងប្អូនខ្មែរ ដែលត្រឡប់មកពីធ្វើការនៅក្រៅប្រទេស ហើយភាគច្រើនជាអ្នកខ្វះលទ្ធភាពសម្រាប់ការទ្រទ្រង់ជីវភាព និងងាយរងគ្រោះ។
ព័ត៌មានជាតិ ថ្មីៗ
លោកស្រី យូ សុភា អភិបាលរងខេត្ត និងជាប្រធានលេខាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប បានថ្លែងនៅក្នុងកិច្ចប្រជុំគណ:កម្មាធិការប្រយុទ្ធប្រឆាំងអំពើជួញដូរមនុស្សខេត្ត (គ.ខ.ប.ជ) នាព្រឹកថ្ងៃទី២៦ ខែកក្កដា ឆ្នាំ២០២២នេះ ស្ថិតនៅសាលប្រជុំធំ នៃរដ្ឋបាលខេត្តសៀមរាបថា ដើម្បីឆ្លើយតបទៅនឹងបញ្ហានេះ គណ:កម្មាធិការ (គ.ខ.ប.ជ) បានសហការជាមួយសមត្ថកិច្ចជំនាញ ពាក់ព័ន្ធទទួលពលរដ្ឋខ្មែរ ដែលធ្វើការនៅក្រៅប្រទេសបានត្រឡប់មកវិញ ដោយបានប្រចាំការនៅតាមព្រំដែន ច្រកអន្តរជាតិប៉ោយប៉ែត-ម៉ាឡៃ-អូរបីជាន់ ខេត្តបន្ទាយមានជ័យ ច្រកអន្តរជាតិដូង ខេត្តបាត់ដំបង និងច្រកអន្តរជាតិអូស្មាច់ ខេត្តឧត្តរមាជ័យ ដើម្បីធ្វើការសម្របសម្រួលការងារទាំងយប់ទាំងថ្ងៃ ដោយអនុវត្តតាមវិធានការសុខាភិបាល ស្ទង់កំដៅ សំអាតអនាម័យ ពិនិត្យសុខភាព អនុវត្តគោលការណ៍ចត្តាឡីស័ក្ដិ ផ្តល់អាហារ និងមធ្យោបាយ ដឹកជញ្ជូនទៅតាមមូលដ្ឋាន ហើយបន្តតាមដានសុខភាព ជីវភាពរស់ព្រមទាំងផ្តល់សេវាតាមតម្រូវការផ្សេងៗ ជូនពួកគាត់។ លោកស្រី បានបន្តថា ចំពោះលទ្ធផលការងាររបស់ (គ.ខ.ប.ជ) ខេត្តសៀមរាប នៅក្នុងខែកក្កដា ឆ្នាំ២០២២នេះ គណ:កម្មាធិការ (គ.ខ.ប.ជ) ខេត្ត បានអនុវត្តយ៉ាងយកចិត្តទុកដាក់នូវទិសដៅ និងភារកិច្ចរបស់ខ្លួនតាមការគ្រោងទុក ដោយមានការចូលរួមកាន់តែសកម្មពីមន្ត្រីអនុវត្តតាមបណ្តាមន្ទីរ អង្គភាពពាក់ព័ន្ធ អាជ្ញាធរមូលដ្ឋាន និងអង្គការមិនមែនរដ្ឋាភិបាលជាតិ-អន្តរជាតិ និងទីភ្នាក់ងារសហប្រជាជាតិ សម្រេចបានលទ្ធផលយ៉ាងច្រើន។ ការអនុវត្តយុទ្ធសាស្ត្រប្រឆាំងការជួញដូរមនុស្ស លេខាធិការដ្ឋាន (គ.ខ.ប.ជ) ខេត្ត មន្ទីរ-អង្គភាពពាក់ព័ន្ធ អាជ្ញាធរក្រុង-ស្រុក និង អង្គការដៃគូនានា បានផ្សព្វផ្សាយច្បាប់ ស្តីពីការបង្ក្រាបប្រយុទ្ធប្រឆាំងអំពើជួញដូរមនុស្ស និងអំពើធ្វើអាជីវកម្មផ្លូវភេទ និងច្បាប់ពាក់ព័ន្ធតាមការផ្សព្វផ្សាយភូមិ-ឃុំ មានសុវត្ថិភាព វេទិកាសាធារណ: ច្បាប់ទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ ការធ្វើចំណាកស្រុកប្រកបដោយសុវត្ថិភាព និងផ្សព្វផ្សាយតាមប៉ុស្តិ៍វិទ្យុ ទូរទស្សន៍ បានចំនួន ២៦៤លើក ដែលមានអ្នកចូលរួមសរុប ១៦,៥២៨នាក់ ស្រី ៩,៥៧១នាក់ និងបានចែកខិតប័ណ្ណសរុប ១០៦ខិតប័ណ្ណនៅតាមបណ្តាស្រុកមួយចំនួន។
ដោយឡែក រដ្ឋបាលស្រុក អង្គរធំ អង្គរជុំ ស្វាយលើ វ៉ារិន ស្រុកក្រឡាញ់ បានធ្វើការផ្សព្វផ្សាយគោលនយោបាយភូមិឃុំ មានសុវត្ថិភាព បានចំនួន ២២២លើក ដែលមានអ្នកចូលរួមសរុប ១៤,២០៩នាក់ ស្រី ៨,៣៥៧នាក់។ លោកស្រី បានបញ្ជាក់ទៀតថា ចំពោះមន្ត្រីអនុវត្តច្បាប់តាមបណ្តាមន្ទីរ អង្គភាពពាក់ព័ន្ធ ប៉ូលីស តុលាការ អាជ្ញាធរមូលដ្ឋាន និងអង្គការមិនមែនរដ្ឋាភិបាលជាតិ-អន្តរជាតិ និងទីភ្នាក់ងារសហប្រជាជាតិ យើងបានធ្វើការយ៉ាងសកម្ម ស៊ីជម្រៅរវាងគ្នានឹងគ្នា។ លោកស្រី បានសំណូមពរថា សូមធ្វើការងារឲ្យច្បាស់លាស់ ជាពិសេស គឺតួលេខនីមួយៗ ពាក់ព័ន្ធនឹងករណីអ្វីមួយដែលបានកើតឡើងកន្លងមក យើងត្រូវស្គាល់ឲ្យច្បាស់ពីតួនាទីរៀងៗខ្លួន ដើម្បីងាយស្រួលក្នុងការសហការណ៍គ្នាបានល្អប្រសើរថែមទៀត៕
អត្ថបទ និងរូបភាព: លោកស៊ាន សុផាត កែសម្រួលដោយ លីវសុខុន!!
