នៅសាលាខេត្តសៀមរាប ថ្ងៃទី២៥ ខែកក្កដា ឆ្នាំ២០២២ ឯកឧត្តម លេង ផាលី រដ្ឋលេខាធិការក្រសួងផែនការ តំណាងដ៏ខ្ពង់ខ្ពស់ឯកឧត្តមកិត្តិសេដ្ឋាបណ្ឌិត ឆាយ ថន ទេសរដ្ឋមន្តី រដ្ឋមន្ត្រីក្រសួងផែនការ និងលោក លោក ពិន ប្រាកដ អភិបាលរងខេត្ត តំណាងឯកឧត្ដម ទៀ សីហា អភិបាលខេត្តសៀមរាប អញ្ជើញជាអធិបតីបើក សិក្ខាសាលាផ្សព្វផ្សាយ របាយការណ៍វិភាគស៊ីជម្រៅលើប្រធានបទផ្អែកតួលេខជំរឿនទូទៅប្រជាជនកម្ពុជាឆ្នាំ២០១៩ ជូនដល់សិក្ខាកាមមកពីខេត្តចំនួន៩ រួមនិងអង្គការសង្គមស៊ីវិលផងដែរ។
គោលបំណង នៃការរៀបចំសិក្ខាសាលានេះឡើង ដើម្បីសិក្ខាសាលាផ្សព្វផ្សាយ របាយការណ៍វិភាគស៊ីជម្រៅតាមប្រធានបទផ្អែកលើលទ្ធផលជំរឿនប្រជាជនកម្ពុជាឆ្នាំ ២០១៩ សម្រាប់ប្រើប្រាស់ក្នុងការរៀបចំកម្មវិធី គោលនយោបាយតាមវិស័យ ដែលបានរៀបចំដោយក្រុមការងារបច្ចេកទេសរបស់វិទ្យាស្ថានជាតិស្ថិតិ ក្រោមការតំរង់ទិស និងផ្ដល់ជំនួយបច្ចេកទេសរបស់ជំនាញការអន្តរជាតិ សម្រាប់ផ្តល់ទិន្នន័យដែលបានវិភាគលក្ខណៈគ្រប់ជ្រុងជ្រោយ និងធានាបាននូវគុណភាព ក្នុងការប្រើប្រាស់ប្រកបដោយប្រសិទ្ធភាពទៅលើប្រធានបទទាំង១៦ ។
តាមការបង្ហាញរបស់ ឯកឧត្តម លេង ផាលី លទ្ធផលនៃការធ្វើជំរឿនទូទៅប្រជាជនកម្ពុជានៅឆ្នាំ២០១៩ មានចំនួនសរុប ១៦.០៧៨.៦៦៦នាក់ និងនៅឆ្នាំ២០២២នេះ មានចំនួនប្រជាជន ១៦.៨៤៣.៣៣៣នាក់។
ឯកឧត្តម រដ្ឋលេខាធិការ បញ្ជាក់ថា ទិន្នន័យ និងព័ត៌មានផ្សេងៗទៀត ដែលទាក់ទិននឹងជំរឿនពីមួយដំណាក់កាលទៅមួយដំណាក់កាល បានផ្ដល់ជាមូលដ្ឋានក្នុងការអនុវត្តផែនការយុទ្ធសាស្ត្រជាតិ ស្របទៅតាមភាពជាក់ស្ដែងនិងលទ្ធភាពទទួលបានធនធាន ក្នុងការឈានទៅសម្រេចគោលដៅរួមចុងក្រោយនោះ គឺការកាត់បន្ថយភាពក្រីក្រ និងការធ្វើឱ្យប្រសើរឡើងនូវគុណភាពជីវិតរបស់ប្រជាជនកម្ពុជា ដែលកំពុងឈានទៅរកភាពស៊ីវីល័យ និងភាពសម្បូរបែបរុងរឿងប្រកបដោយសេចក្ដីថ្លៃថ្នូរ។
ឯកឧត្តម រដ្ឋលេខាធិការ បញ្ជាក់បន្ថែមថា ឥឡូវនេះយើងមានកាលានុវត្តភាពធំធេង តាមរយៈការប្រើលទ្ធផល វិភាគស៊ីជម្រៅតាមវិស័យ ផ្អែកលើលទ្ធផលជំរឿន ដែលជាមូលដ្ឋានគ្រឹះដ៏រឹងមាំ សម្រាប់ផ្ដល់នូវសូចនាករផ្ទាល់សម្រាប់តាមដានត្រួតពិនិត្យគោលដៅតាមវិស័យដូចជា ១. លទ្ធភាពបង្កកំណើត និងអាពាហ៍ពិពាហ៍ ២. មរណភាព និងមរណៈភាពមាតា ៣. កំណើនប្រជាជន និងបម្រែបម្រួលរបាយប្រជាជន ៤. របាយប្រជាជន និងទីប្រជុំជន ៥. សមាសភាពភេទ និងអាយុ ៦. ពិការភាព ៧. ជនជាតិដើមភាគតិច ៨. ចំណាកស្រុក ៩. អក្ខរភាព និងការអប់រំ ១១. កម្លាំងពលកម្ម និងការងារ ១១. សម្ភារៈប្រើប្រាស់ក្នុងគ្រួសារ ១២. ភាពស្អាត និងអនាម័យ ១៣. ចំណោលប្រជាជនកម្ពុជា ១៤. យេនឌ័រនៅកម្ពុជា ១៥. មនុស្សចាស់និងស្ថានភាពរស់នៅ ១៧. ស្ថានភាពកុមារនៅកម្ពុជា។
ទន្ទឹមនោះ ឯកឧត្តម លេង ផាលី ក៏បានថ្លែងអំណរគុណចំពោះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា ឯកឧត្តមអគ្គបណ្ឌិតសភាចារ្យ អូនព័ន្ធ មុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ មូលនិធិសហប្រជាជាតិសម្រាប់ប្រជាជន (UNFPA) ភ្នាក់ងារអភិវឌ្ឍអន្តរជាតិអាឡឺម៉ង់ (GIZ) ទីភ្នាក់ងារអភិវឌ្ឍន៍អន្តរជាតិស៊ុយអែត (SIDA) រដ្ឋាភិបាលសាធារណរដ្ឋប្រជាមានិតចិន និងដៃគូអភិវឌ្ឍទាំងអស់ដែលបានជួយនៅក្នុងសកម្មភាពផ្សេងៗរបស់ជំរឿនទូទៅប្រជាជននៅព្រះរាជាណាចក្រកម្ពុជាឆ្នាំ២០១៩។ បន្ថែមពីនោះ ឯកឧត្តមក៏សូមថ្លែងអំណរគុណដល់ មូលនិធិសហប្រជាជាតិសម្រាប់ប្រជាជន (UNFPA)
ភ្នាក់ងារអភិវឌ្ឍអន្តរជាតិអាឡឺម៉ង់ (GIZ) មូលនិធិសហប្រជាជាតិសម្រាប់កុមារ (UNICEF) ធនាគារអភិវឌ្ឍន៍អាស៊ី(ADB) និងសហគមន៍អឺរ៉ុប (EUs) ដែលបានផ្ដល់ថវិកានិងបច្ចេកទេសសម្រាប់រួមចំណែកក្នុងការវិភាគលើរបាយការណ៍ទាំងនេះ។
ថ្លែងក្នុងឱកាសនោះ លោក ពិន ប្រាកដ លើកឡើងថា យោងតាមទិន្នន័យជំរឿនទូទៅប្រជាជនកម្ពុជាឆ្នាំ២០១៩ ខេត្តសៀមរាប មានប្រជាជនសរុបចំនួន ១.១៦៦.៤៩៣នាក់ ក្នុងនោះស្រីចំនួន ៥៩០.១៥៤នាក់។ ទន្ទឹមនោះ យោងតាមទិន្នន័យមូលដ្ឋានឃុំសង្កាត់ បានបង្ហាញថា អត្រាភាពក្រីក្រក្នុងខេត្តមាន១៣.៩២% នៅឆ្នាំ២០១៩ បានថយចុះមកនៅត្រឹម១០.៩១% នៅឆ្នាំ២០២១។ ជាមួយការកើនឡើងនៃកម្រិតជីវភាពប្រជាពលរដ្ឋនេះ ខេត្តសៀមរាប មានការរីកចម្រើនគួរឲ្យកត់សម្គាល់លើវិស័យផ្គត់ផ្គង់ទឹកស្អាត អគ្គិសនី និងសេវាកម្មផ្សេងៗ ពិសេសគឺការកែលម្អហេដ្ឋា- រចនាសម្ព័ន្ធផ្លូវថ្នល់ចំនួន ៣៨ខ្សែ និងការកែលម្អដងស្ទឹងសៀមរាប ដែលជាអំណោយថ្លៃថ្លាមិនអាចកាត់ថ្លៃរបស់ សម្តេចតេជោ ហ៊ុន សែន ដែលបានបញ្ចប់ជាស្ថាពរនៅឆ្នាំ២០២១កន្លងទៅ។ ទាំងនេះជាសមទ្ធផលប្រវត្តិសាស្រ្តដែលជួយលើកមុខមាត់ខេត្តសៀមរាប ដែលជាគោលដៅទេសចរណ៍ដ៏ល្បីល្បាញរបស់ព្រះរាជាណាចក្រកម្ពុជា និងនៅលើពិភពលោកទាំងមូល។
អត្ថបទ និង រូបភាព៖ លោក ស៊ាន សុផាត
កែសម្រួល៖ លោក សេង ផល្លី
