នៅសាលាខេត្តសៀមរាប នាព្រឹកថ្ងៃទី២៨ ខែកក្កដា ឆ្នាំ២០២២នេះ មន្ទីរបរិស្ថានខេត្តសៀមរាប បានបើកកិច្ចប្រជុំបូកសរុបលទ្ធផលការងារប្រចាំឆមាសទី១ ឆ្នាំ២០២២ និងលើកទីសដៅអនុវត្តការងារបន្តសម្រាប់ឆមាសទី២ ក្រោមអធិបតីភាព ឯកឧត្តម សៅ សុភាព រដ្ឋលេខាធិការក្រសួងបរិស្ថាន លោក អ៊ឹង គឹមលាង អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាលខេត្ត ដោយមានការចូលរួមពីប្រតិភូក្រសួង ថ្នាក់ដឹកនាំមន្ទីរអង្គភាពពាក់ព័ន្ធ រួមនឹងលោកលោកស្រី តំណាងរដ្ឋបាលក្រុងស្រុកទាំង១២ ថ្នាក់ដឹកនាំ មន្រ្តីរាជការនៃមន្ទីរបរិស្ថានខេត្តជាច្រើនរូប។
កិច្ចប្រជុំបូកសរុបលទ្ធផលការងារនេះដែរ គឺដើម្បីធ្វើបទបង្ហាញពីសកម្មភាព លទ្ធផលការងារដែលសម្រចបាន និងបញ្ហាដែលបានជួបប្រទះ ក្នុងកំឡុងពេលអនុវត្តផែនការសកម្មភាពឆមាសលើកទី១ ឆ្នាំ២០២២កន្លងមក ដើម្បីជ្រាបជាព័ត៌មាន និងចែករំលែកបទពិសោធន៍ពីគ្នាទៅវិញទៅមក ម្យ៉ាងវិញទៀតអាចទទួលបាននូវអនុសាសន៍ណែនាំល្អៗបន្ថែមទៀត ដែលជាធាតុចូលសម្រាប់រៀបចំផែនការសកម្មភាពការងារឆ្នាំបន្ត ដើម្បីឲ្យទទួលបាននូវសមិទ្ធិផលថ្មីៗ កាន់តែច្រើន និងកាន់តែប្រសើរឡើងថែមទៀត។
លោក អ៊ឹង គឹមលាង មានប្រសាសន៍ថា ទោះបីជាស្ថិតក្នុងបរិបទ នៃការរាតត្បាតជាសាកលរបស់ជំងឺកូវីដ-១៩ និងបានជះឥទ្ធិពលដោយផ្ទាល់ និងប្រយោលមកលើប្រទេសកម្ពុជា ជាពិសេសខេត្តសៀមរាប ដែលជាគោលដៅចម្បងក្នុងវិស័យទេសចរណ៍ក៏ដោយ ក៏មន្ទីរបរិស្ថានខេត្ត បានខិតខំអនុវត្តការងារទទួលបាន លទ្ធផលជាច្រើនគួរជាទីមោទនៈ។ លទ្ធផលទាំងអស់នេះ ពុំមែនផ្តល់អត្ថប្រយោជន៍សម្រាប់តែមន្ទីរបរិស្ថានខេត្តប៉ុណ្ណោះទេ ថែមទាំងបានឆ្លើយតប ទៅនឹងលទ្ធផលនៃការអនុវត្តសេចក្តីសម្រេចអង្គសន្និបាតបូកសរុបលទ្ធផលការងារប្រចាំឆ្នាំ២០២១ និងលើកទិសដៅការងារឆ្នាំ២០២២ របស់រដ្ឋបាលខេត្តសៀមរាប និងបានផ្តល់ប្រយោជន៍រួមដល់ប្រជាជនទូទាំងខេត្តសៀមរាបផ្ទាល់តែម្តង។ ក្នងុនោះមន្ទីរបរិស្ថានខេត្តបាននឹងកំពុងសម្របសម្រួល ក្នុងការអនុវត្តសកម្មភាពការងារចម្បងៗ មួយចំនួនទៀតពាក់ព័ន្ធ ទៅនឹងការរៀបចំកំណត់បែងចែកតំបន់គ្រប់គ្រង ការបោះបង្គោលព្រំប្រទល់ ការរៀបចំផែនការគ្រប់គ្រង និងចុះបញ្ជីដីរដ្ឋនៅតាមបណ្តាតំបន់ការពារធម្មជាតិក្នុងភូមិសាស្ត្រខេត្តសៀមរាប ក្នុងនោះបញ្ហាសំរាមក៏ជាបញ្ហាមួយដែលអាជ្ញាធរខេត្ត រួមនឹងស្ថាប័នពាក់ព័ន្ធកំពុងយកចិត្តទុកដាក់ផងដែរ។
មានប្រសាសន៍បិទកិច្ចប្រជុំក្នុងឱកាសនោះ ឯកឧត្តម សៅ សុភាព រដ្ឋលេខាធិការក្រសួងបរិស្ថាន បានសម្ដែងការកោតសរសើរចំពោះលទ្ធផលការងារដែលមន្ទីរ រួមនឹងថ្នាក់ដឹកនាំ មន្ត្រីរាជការទាំងអស់ សម្រេចបានក្នុងរយៈពេលឆមាសទី១ នឹងកំពុងអនុវត្តន៍បន្តសម្រាប់ឆមាសទី២ របស់មន្ទីរបរិស្ថានខេត្តសៀមរាប ទាំងការងាររដ្ឋបាលទូទៅ ជាពិសេសការងារជាអាទិភាពនោះ គឺការងារគ្រប់គ្រងបរិស្ថាន ការងារគ្រប់គ្រងសំរាម ការងារគ្រប់គ្រងព្រៃឈើ ការងារប្រែប្រួលអាកាសធាតុ ការគ្រប់គ្រងជីវៈចម្រុះ និងជីវៈសុវត្តិភាព ការងារអភិវឌ្ឍន៍សេដ្ឋកិច្ចបៃតង ការលើកកម្ពស់ផ្នែកវិទ្យាសាស្រ្ត និងបច្ចេកវិទ្យា និងការពង្រឹងក្របខណ្ឌកិច្ចសហប្រតិបត្តិការ សកល តំបន់ និងជាតិ ព្រមទាំងទិសដៅការងារឆ្នាំខាងមុខ។
ឯកឧត្ដម រដ្ឋលេខាធិការ ក៏បានជំរុញឱ្យមន្ទីរបន្តអនុវត្តនូវប្រសិទ្ធភាពដឹកនាំ សាមគ្គីភាពផ្ទៃក្នុង មានទទួលខុសត្រូវចំពោះតួនាទី និងភារកិច្ចការងារ អោយកាន់តែមានប្រសិទ្ធភាព និងប្រសិទ្ធិផលដូចជាកិច្ចការគាំពារបរិស្ថាន ការអភិរក្សជីវៈចម្រុះ ការគ្រប់គ្រងធនធានធម្មជាតិជាពិសេសការការពារ និងអភិរក្សធនធានធម្មជាតិនៅឧទ្យានជាតិព្រះជ័យវរ័្មន-នរោត្តម«ភ្នំគូលែន» ក្នុងខេត្តសៀមរាប។ ជាមួយនោះសម្រាប់មន្រ្តីឧទ្យានុរក្សទាំងអស់ ក៏ត្រូវសកហារគ្នាធ្វើការងារជាក្រុម សហការជាមួយអាជ្ញាធរពាក់ព័ន្ធ និងសហគមន៍ ពេលចុះល្បាត និងធ្វើការរាយការណ៍ជាបន្ទាន់ដល់ថ្នាក់ដឹកនាំ ដើម្បីធ្វើអន្តរាគមន៍ និងចាត់វិធានការដោះស្រាយបញ្ហាបទល្មើសធនធានធម្មជាតិ និងត្រូវគិតពីបញ្ហសុខភាពជាចម្បងផងដែរ៕
អត្ថបទ និង រូបភាព៖ លោក អ៊ុន ណារាជ្យ
