នៅថ្ងៃទី៣ ខែសីហា ឆ្នាំ២០២២នេះ លោក អ៊ឹង គឹមលាង អភិបាលរងខេត្ដសៀមរាប បានបង្ហាញថា សហគមន៍ទេសចរណ៍កំពង់ភ្លុក ក្នុងស្រុកប្រាសាទបាគង សហគមន៍ទេសចរណ៍កំពង់ឃ្លាំង ក្នុងស្រុកសូទ្រនិគម និងសហគមន៍ទេសចរណ៍ចុងឃ្នៀស ក្រុងសៀមរាប នឹងត្រូវដាក់ឱ្យចូលរួមប្រកួតប្រជែងយកជ័យលាភីតំបន់ទេសចរណ៍បរិស្ថានស្អាត សម្រាប់ឱ្យមានការទាក់ទាញអ្នកទេសចរនាពេលខាងមុខ។
មានប្រសាសន៍ក្នុងកិច្ចពិភាក្សាស្ដីពី ការវេចខ្ចប់កាកសំណល់ នៅសហគមន៍ទេសចរណ៍កំពង់ភ្លុក ស្រុកប្រាសាទបាគង ខេត្ដសៀមរាប លោក អ៊ឹង គឹមលាង បានណែនាំដល់អាជ្ញាធរមូលដ្ឋាន ត្រូវបង្កើតរចនាសម្ព័ន្ធគ្រប់គ្រងសំរាម សំណល់រឹង ឱ្យបានត្រឹមត្រូវនៅក្នុងតំបន់របស់ខ្លួន ទាំងនៅក្នុងរដូវវស្សា និងរដូវប្រាំង សម្រាប់ការប្រកួតប្រជែងខាងមុខ។ រចនាសម្ព័ន្ធនៃការគ្រប់គ្រងកាកសំណល់នេះ មានអ្នកទទួលទុកដាក់សំរាម អ្នកគ្រប់គ្រងពីការដឹកជញ្ជូនសំរាម និងការផ្សព្វផ្សាយពីបរិស្ថានស្អាតជាដើម។
លោកអភិបាលរងខេត្ត បន្ថែមថា សហគមន៍ទេសចរណ៍នីមួយៗ ត្រូវសហការគ្នាជាមួយអង្គការដៃគូរ និងប្រជាសហគមន៍ ព្រះសង្ឃ យុវជនស្ម័គ្រចិត្ដ ដោយបំផុសគំនិតឱ្យពួកគាត់ចេះស្រលាញ់បរិស្ថាន ដូចដើររើសសំរាម ដាក់ធុងសំរាមនៅតាមទូកទេសចរណ៍ និងដាក់ពាក្យស្លោកពីបរិស្ថានស្អាតនៅតាមផ្ទះផងដែរ។ លោកបានបន្ដថា ការគ្រប់គ្រងសំរាមនៅតំបន់ទេសចរណ៍បឹងទន្លេសាបបានល្អប្រសើរ នឹងទទួលបានបណ្ណសរសើរ ចាប់ពីថ្នាក់ឃុំរហូតដល់ថ្នាក់ខេត្ដ។
ព័ត៌មានជាតិ ថ្មីៗ
គួរជម្រាបថា តំបន់ទេសចរណ៍កំពង់ភ្លុក ជាតំបន់ទេសចរណ៍គំរូផ្នែកបរិស្ថានស្អាត ក្នុងចំណោមតំបន់ទេសចរណ៍ទាំងបីនៅបឹងទន្លេសាប។ សហគមន៍ទេសចរណ៍នេះដែរ ជារមណីយដ្ឋានទេសចរណ៍បែបធម្មជាតិ និងវប្បធម៌ មានទីតាំងស្ថិតនៅក្នុងភូមិគោកក្តុល ឃុំកំពង់ភ្លុក ស្រុកប្រាសាទបាគង ដែលមានចំងាយប្រមាណជា៣២គីឡូម៉ែត្រ ពីទីរួមខេត្តសៀមរាប។ សក្តានុពលទេសចរណ៍សំខាន់ៗនៅសហគមន៍នេះ រួមមាន អាហារធម្មជាតិ ព្រៃធម្មជាតិ ការជិះទូកលំហែកម្សាន្តលើផ្ទៃបឹងទន្លេសាប ស្វែងយល់ពីជីវភាពរស់នៅរបស់ប្រជាជននៅលើផ្ទៃទឹក។ល។
