នៅថ្ងៃទី៥ ខែសីហា ឆ្នាំ២០២២ រដ្ឋបាលខេត្តសៀមរាប មានរៀបចំកិច្ចប្រជុំសាមញ្ញលើកទី៣៩ អាណត្ដិទី៣ របស់ក្រុមប្រឹក្សាខេត្តសៀមរាប ដើម្បីអនុម័ត ពិភាក្សាការងារ និងពិនិត្យលើរបាយការណ៍ដែលបានអនុវត្ត ក្នុងខែកក្កដាឆ្នាំ២០២២ ដឹកនាំដោយឯកឧត្តម អ៊ាន ឃុន ប្រធានក្រុមប្រឹក្សាខេត្ត និង លោក លី សំរិទ្ឋ អភិបាលរងខេត្តតំណាងឯកឧត្តម ទៀ សីហា អភិបាលខេត្តសៀមរាប រួមនិងមន្ទីរ អង្គភាព រដ្ឋបាលក្រុង ស្រុកជុំវិញខេត្តតាមរយៈប្រព័ន្ធវីដេអូ Zoom ។
កិច្ចប្រជុំមានរបៀបវារៈចំនួន៣៖ ទី១ ពិនិត្យ ពិភាក្សា និងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី៣៨ របស់ក្រុមប្រឹក្សាខេត្ត អាណត្តិទី៣ កាលពីថ្ងៃ ទី១១ ខែកក្កដា ឆ្នាំ២០២២ ទី២- ពិនិត្យ ពិភាក្សា និងអនុម័តលើសេចក្ដីព្រាងរបាយការណ៍ប្រចាំខែកក្កដា ឆ្នាំ២០២២ ស្តីពីការអនុវត្តការងាររបស់រដ្ឋបាលខេត្ត និងទី៣បញ្ហាផ្សេងៗ។
ព័ត៌មានជាតិ ថ្មីៗ
នៅក្នុងកិច្ចប្រជុំនេះ សមាជិក សមាជិកាក្រុមប្រឹក្សាខេត្ត បានលើកឡើងនូវបញ្ហាមួយចំនួនដូចជា ការឈប់ ការចត និងការមិនគោរពស្លាកសញ្ញាចរាចរណ៍តាមដងផ្លូវក្នុងក្រុងសៀមរាប ការព្រួយបារម្ភលើសុខភាពសាធារណៈនិងជំងឺឆ្លងនានាក្នុងរដូវវស្សា បញ្ហាខ្វះការត្រួតពិនិត្យការប្រើប្រាស់ឧបករណ៍ឧស្ម័នហ្គាស(កំប៉ុង ឬធុងចាស់ៗ) និងហានិភ័យការកាយរណ្តៅដី។
ពាក់ព័ន្ឋនឹងបញ្ហាទាំងនេះ ក្នុងនាមអាជ្ញាធរខេត្ត លោក លី សំរិទ្ឋ លើកឡើងថា បញ្ហាសុវត្ថិភាព និងការធ្វើចរាចរណ៍តាមដងផ្លូវ ការដាក់ស្លាកសញ្ញាចរាចរណ៍នានានៅតាមដងផ្លូវ ជាពិសេសនៅលើផ្លូវ ៣៨ខ្សែដែលជាសមិទ្ឋផលថ្មីផងដែរ ត្រូវបានអាជ្ញាធរខេត្តនិងមន្ទីរជំនាញរៀបចំរួចហើយ។ លោកបានបានណែនាំដល់សមត្ថកិច្ច និងមន្ទីរជំនាញ ដែលពាក់ព័ន្ធ ត្រូវបន្តផ្សព្វផ្សាយនៅតាមដងផ្លូវ ដើម្បីបញ្ជ្រាបការយល់ដឹងដល់អ្នកប្រើប្រាស់ទ្រូងផ្លូវ ឱ្យគោរពច្បាប់ចរាចរណ៍ផ្លូវគោកទាំងអស់គ្នា សំដៅធ្វើយ៉ាងណាចៀសវាងការកកស្ទះភាព គ្មានសណ្តាប់ធ្នាប់។
លោក អភិបាលរងខេត្ត ក៏បានណែនាំដល់មន្ទីរសុខាភិបាល បន្តការផ្សព្វផ្សាយអប់រំដល់ប្រជាពលរដ្ឋ ដើម្បីការពារពីជំងឺឆ្លងគ្រប់ប្រភេទ និងបានស្នើដល់មន្ទីរឧស្សាហកម្ម រ៉ែ និងថាមពល រៀបចំផែនការ ចុះពិនិត្យ និងមានវិធានបង្ការជាមួយការប្រើប្រាស់ឧបករណ៍ឧស្ម័នគ្រប់ប្រភេទដើម្បីចៀសវាងនូវគ្រោះថ្នាក់ជាយថាហេតុ។ ទន្ទឹមនោះ ការជីរណ្តៅដីដែលមានជម្រៅជ្រៅ សូមមន្ទីរ អង្គភាពពាក់ព័ន្ឋ បន្តចុះពិនិត្យទៅលើអាជ្ញាបណ្ណឱ្យបានច្បាស់លាស់ផងដែរ។
ដោយឡែក ឆ្លៀតក្នុងឱកាសនោះ លោកអភិបាលរងខេត្ត បានលើកឡើងថា ចាប់ពីខែនេះទៅ អគ្គនាយកដ្ឋានរដ្ឋបាល ក្រសួងមហាផ្ទៃក្នុងក្របខណ្ឌ នៃកិច្ចសហប្រត្តិបត្តិការជាមួយអង្គការតម្លាភាពកម្ពុជា និងអង្គការអាក់សិនអេតកម្ពុជា បានប្រកាសបើកដំណើរឱ្យប្រើប្រាស់កម្មវិធីទូរស័ព្ទដៃសម្រាប់ទទួលមតិយោបល់ ពីប្រជាពលរដ្ឋ ដែលទាក់ទងនឹងការផ្តល់សេវារដ្ឋបាលនៅថ្នាក់ក្រោមជាតិ។
បូកសរុបក្នុងកិច្ចប្រជុំ ឯកឧត្តម អ៊ាន ឃុន បានថ្លែងកោតសរសើរចំពោះការខិតខំប្រឹងប្រែងក្នុងការដឹកនាំ និងបំពេញតួនាទីភារកិច្ចរបស់ជួរគណៈអភិបាលខេត្ត ក្រុង ស្រុក និងថ្នាក់ដឹកនាំតាមបណ្តាមន្ទីរ អង្គភាពនានាក្នុងខេត្ត ដែលបានខិតខំយកចិត្តទុកដាក់បំពេញការងារភារកិច្ចបានល្អក្នុងរយៈពេលកន្លងមក។ ឯកឧត្តមប្រធានក្រុមប្រឹក្សា បង្ហាញថា៖ សម្រាប់កិច្ចប្រជុំសាមញ្ញលើកទី៤០ ដែលតាមប្រតិទិនកិច្ចប្រជុំសាមញ្ញសម្រាប់រយៈពេល ១២ខែ គ្រោងនឹងរៀបចំនៅ ថ្ងៃទី៦ ខែកញ្ញា ឆ្នាំ២០២២ តាមរយៈប្រព័ន្ធបញ្ជូនរូបភាព និងសំឡេង(ZOOM) លើសេចក្ដីព្រាងរបៀបវារៈមួយចំនួនដូចជាពិនិត្យ ពិភាក្សា និងអនុម័តលើកំណត់ហេតុកិច្ចប្រជុំសាមញ្ញលើកទី៣៩ របស់ក្រុមប្រឹក្សាខេត្ត អាណត្តិទី៣ ដែលបានប្រជុំនាពេលនេះ។
អត្ថបទ និង វីដេអូ ៖ លោក យូ វង្ស និងលោក ស៊ាន សុផាត
កែសម្រួល៖ លោក សេង ផល្លី
