ព្រឹត្តិការណ៍កីឡាបាល់ទាត់មិត្តភាពវ័យចំណាស់មេគង្គ រួមមានកម្ពុជា ថៃ ឡាវ និងវៀតណាម ដែលរយៈពេល ៤ថ្ងៃ ចាប់ពីថ្ងៃទី៤ដល់ថ្ងៃទី៧ ខែសីហា ឆ្នាំ២០២២ បានបិទបញ្ចប់ហើយនៅព្រឹកនេះ ដោយក្រុមកីឡាបាល់ទាត់វ័យចំណាស់ខេត្តសៀមរាប តំណាងឱ្យព្រះរាជាណាចក្រកម្ពុជាទទួលបានជ័យលាភីលេខ១ ដោយយកឈ្នះក្រុមកីឡាករ កីឡាករថៃ ២ទល់នឹងសូន្យ។
ចំនួនក្រុមកីឡាបាល់ទាត់ដែលបានចូលរួមក្នុងការប្រកួតនេះទាំងអស់សរុប ៦ក្រុម ក្នុងនោះ ក្រុមកីឡាបាល់ទាត់របស់ប្រទេសកម្ពុជាមានមួយក្រុម ក្រុមកីឡាបាល់ទាត់របស់ប្រទេសថៃមានបីក្រុម ក្រុមកីឡាបាល់ទាត់របស់ប្រទេសឡាវមានមួយក្រុម និងក្រុមកីឡាបាល់ទាត់របស់ប្រទេសវៀតណាមមានមួយក្រុម។ ជាលទ្ធផល ក្រុមកីឡាបាល់ទាត់កម្ពុជាទទួលបានលេខមួយ ក្រុមទី៣នៃក្រុមកីឡាបាល់ទាត់ថៃទទួលបានលេខពីរ ក្រុមកីឡាបាល់ទាត់ឡាវទទួលបានលេខបី ក្រុមទី១នៃក្រុមកីឡាបាល់ទាត់ថៃទទួលបានលេខបួន ក្រុមទី២នៃក្រុមកីឡាបាល់ទាត់ថៃទទួលបានលេខ៥ និងក្រុមកីឡាបាល់ទាត់វៀតណាមទទួលបានលេខប្រាំមួយ។
មានប្រសាសន៍ក្នុងពិធីបិទការប្រកួតនោះ លោក អ៊ឹង គឹមលាង អភិបាលរងខេត្ត តំណាងឯកឧត្តម ទៀ សីហាអភិបាលខេត្តសៀមរាប លើកឡើងថា ការលេងកីឡាបាននាំមកនូវមិត្តភាព និងទំនាក់ទំនងល្អរវាងប្រជាជន និងប្រទេសនានា ជាពិសេសប្រទេសថៃ ឡាវ និងវៀតណាម ដែលជាប្រទេសជិតខាង និងបានចូលរួមនៅពេលនេះ។ ទន្ទឹមនោះ លោកអភិបាលរងខេត្ត សង្ឃឹមថាព្រឹត្តិការណ៍កីឡាបាល់ទាត់មិត្តភាពបែបនេះ នឹងរៀបចំឡើងនៅឆ្នាំក្រោយទៀត។
ក្នុងឱកាសនោះ ឯកឧត្តម តុប សុភ័ក្រ្ត រដ្ឋលេខាធិការក្រសួងទេសចរណ៍ បញ្ជាក់ថា ការប្រកួតតែងតែមានចំណាត់ថ្នាក់ ប៉ុន្តែសម្រាប់ការប្រកួតមិត្តភាពនេះ ចំណាត់ថ្នាក់ពុំបញ្ជាក់ពីការទទួលជ័យជំនះ ឬបរាជ័យឡើយ។ ពោល គឺក្នុងនាមប្រជាជន និងជាប្រទេសជិតខាងគឺយើងជោគជ័យទាំងអស់គ្នា ដោយរស់នៅក្នុងភាពសុខុដុមរមនា និងសន្តិភាពជាមួយគ្នាទៅវិញទៅមក។
ឯកឧត្តម រដ្ឋលេខាធិការ បានចាត់ទុកថា ការទទួលរៀបចំព្រឹត្តិការណ៍កីឡាបាល់ទាត់មិត្តភាពវ័យចំណាស់មេគង្គនាពេលនេះ គឺជាមោទកភាពរបស់កម្ពុជា ក៏ដូចខេត្តសៀមរាប ដែលជាទីក្រុងទេសចរណ៍ដ៏ធំមួយរបស់ប្រទេស ដើម្បីពង្រីកនូវផលិតផលទេសចរណ៍ និងបង្កើនកិច្ចសហប្រតិបត្តិការអន្តរជាតិនៅបណ្ដាប្រទេសតាមដងទន្លេមេគង្គ។ ព្រឹត្តិការណ៍នេះដែរ ក៏ជាការយកចិត្តទុកដាក់ខ្ពស់ពីសំណាក់រាជរដ្ឋាភិបាល ក្នុងផ្សព្វផ្សាយវិស័យទេសចរណ៍ តាមរយៈវិស័យកីឡាទេសចរណ៍ ក្រោយវិបត្តិនៃជំងឺកូវីដ-១៩ និង ទាក់ទាញចំណាប់អារម្មណ៍ ពីសំណាក់អ្នកស្នេហាវិស័យកីឡាជាតិ និងអន្តរជាតិ ដើម្បីអបអរសាទរដំណើរឆ្ពោះទៅការប្រកួតកីឡា SEA GAME – ASEAN PARA GAME 2023 ដែលកម្ពុជា ធ្វើជាម្ចាស់ផ្ទះផងដែរ។
អត្ថបទ និង វីដេអូ ៖ លោក ម៉ី សុខារិទ្ធ និង លោក ស៊ាន សុផាត
កែសម្រួល៖ លោក សេង ផល្លី
