កាលពីរាត្រីម្សិលមិញនេះ ក្រុមអ្នកធុរកិច្ចក្នុងខេត្តសៀមរាបប្រមាណជាង៣០រូប បានរៀបចំពិធីជួបជុំមួយ ដើម្បីបង្ហាញពីទំនាក់ទំនងអាជីវកម្ម ក៏ដូចជាធ្វើការផ្សព្វផ្សាយពីឱកាសសហការគ្នាទៅវិញទៅមក ក្នុងបង្កើនផលិតភាព ឱកាសការងារ ការអភិវឌ្ឍសេដ្ឋកិច្ច និងការកសាងសមត្ថភាពអ្នកធុរកិច្ចជំនាន់ក្រោយ។
លោក សុខ សារ៉ាត់ ប្រធានវេទិកាអង្គរក្លឹបខេត្តសៀមរាប លើកឡើងថា អត្ថប្រយោជន៍នៃការជួបជុំគ្នានាពេលនេះ គឺយើងបានស្គាល់មនុស្សជាច្រើន និងមិត្តភក្តិថ្មីៗ ទាំងជនជាតិខ្មែរ និងបរទេស ក្នុងការផ្សព្វផ្សាយពីអាជីវកម្មរបស់ខ្លួន ក៏ដូចជាបទពិសោធន៍ទៅវិញទៅមក។ សម្រាប់ខេត្តសៀមរាប មានអាជីវកម្មនៅក្នុងវិស័យសំខាន់ៗ និងមានសកម្មភាពយ៉ាងខ្លាំងក្លា ដូចជារមណីយដា្ឋនបុរាណ និងធម្មជាតិ សណ្ឋាគារ និងបដិសណ្ឋារកិច្ច ភោជនីយដ្ឋាន និងម្ហូបអាហារ សេវាដឹកជញ្ជូន ធនាគារនិងគ្រឹះស្ថានមីក្រូហិរញ្ញវត្ថុ និងអចលនវត្ថុ ជាដើម។
លោក សុខ សារ៉ាត់ បញ្ជាក់ថា នេះជាកម្មវិធីដំបូងនៃការជួបជុំអ្នកធុរកិច្ចក្នុងខេត្តសៀមរាប សម្រាប់អ្នកចូលរួមពួកគាត់នឹង ទទួលបានព័ត៌មានពីវិនិយោគនានារបស់ក្រុមហ៊ុនបរទេសក្នុង និងក្រៅប្រទេស តាមរយៈ Chamber នៃប្រទេសនីមួយៗប្រចាំនៅព្រះរាជាណាចក្រកម្ពុជា និងក្លិបអ្នកវិនិយោគមួយចំនួន ដែលបាននឹងកំពុងចុះអនុស្សរណៈយោគយល់គ្នា (MOU) ជាមួយនិងវេទិកាអង្គរក្លឹប ដែលសុទ្ធសឹងជាដំណឹងពីការអភិវឌ្ឍន៍ និងវឌ្ឍនភាពនានា សម្រាប់សមាជិកទាំងអស់។
អត្ថបទ និង វីដេអូ ៖ លោក ស៊ាន សុផាត
កែសម្រួល៖ លោក សេង ផល្លី
