ឯកឧត្តម ខៀវ កាញារីទ្ធ រដ្ឋមន្រ្តី នៅព្រឹកថ្ងៃទី០៨ ខែសីហា ឆ្នាំ២០២២ បានដឹកនាំបើកកិច្ចប្រជុំសាមញ្ញប្រចាំសប្តាហ៍ ដើមខែសីហា របស់ថ្នាក់ដឹកនាំក្រសួងព័ត៌មាន ដោយមានការចូលរួមផ្ទាល់ និងតាមរយៈប្រព័ន្ធ វីដេអូ ដើម្បីធ្វើការដកស្រង់បទពិសោធន៍ ការរៀបចំមណ្ឌលព័ត៌មាន ការថតផ្សព្វផ្សាយ ដំណើរការកិច្ចប្រជុំ រួមទាំងកិច្ចការងារសំខាន់ៗជាច្រើនទៀត ដែលទាក់ទងវិស័យព័ត៌មាន និងផ្សព្វផ្សាយ ក្រោមការគ្រប់គ្រងរបស់ក្រសួងព័តមាន។
សម្រាប់កិច្ចប្រជុំនេះដែរ ក៏ជាការដកស្រង់នូវរាល់បទពិសោធន៍ការងារអាស៊ាន ដោយបានបង្ហាញនូវចំណុចខ្លាំង និងចំណុចខ្វះខាតដែលទាមទារបំពេញបន្ថែម តាមរយៈកិច្ចសហការជាមួយ ក្រសួងស្ថាប័នពាក់ពន្ធ័ ពិសេសក្រសួងសេដ្ឋកិច្ច និងហិរញ្ញវត្ថុ អំពីតម្រូវការជាក់ស្តែង ដើម្បីអាចបំពេញការងារបានកាន់ស៊ីជម្រៅ និងប្រសិទ្ធិភាព គុណភាពខ្ពស់ សម្រាប់ត្រៀមចូលរួមនៅក្នុងកិច្ចប្រជុំកំពូលអាស៊ាន នាខែវិច្ឆិកា ឆ្នាំ២០២២ ខាងមុខ ព្រោះថានឹងមានថ្នាក់ដឹកកំពូលពិភពលោកអញ្ជើញមកចូលរួម ហើយអ្នកកាសែតជាតិ និងអន្តរជាតិ កាន់តែច្រើនជាងមុន ជាកិច្ចការដ៏មមាញឹក និងការចំណាយកាន់តែច្រើនជាង កិច្ចប្រជុំរដ្ឋមន្រ្តីការបរទេសអាស៊ាន។
ក្នុងឱកាសនោះដែរ ឯកឧត្តម ខៀវ កាញារីទ្ធ រដ្ឋមន្រ្តី បានថ្លែងការសរសើរចំពោះថ្នាក់ដឹកនាំ មន្រ្តីគ្រប់ផ្នែក នៃក្រសួងព័ត៌មានទាំងអស់ ដែលបានប្រឹងប្រែងបំពេញកិច្ចការងារបានយ៉ាងល្អ នៅក្នុងដំណើរការរៀបចំកិច្ចប្រជុំរដ្ឋមន្រ្តីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធជាច្រើនថ្ងៃមកនេះ ដែលកម្ពុជាធ្វើជាម្ចាស់ផ្ទះ ជាការបង្ហាញពីភាពចាស់ទុំក្នុងកិច្ចការងារប្រកបដោយបទពិសោធន៍ និងសមត្ថភាពគ្រប់គ្រាន់ក្នុងការទទួលខុសត្រូវ បំពេញកិច្ចការងារដោយរលូន និងជោគជ័យផងដែរ៕
ព័ត៌មានជាតិ ថ្មីៗ
