រាជរដ្ឋាភិបាលកម្ពុជា តាមរយៈក្រសួងសង្គមកិច្ច អតីតយុទ្ធជន និងយុវនីតិសម្បទា បាននាំយកអំណោយជាគ្រឿងឧបភោគបរិភោគ ជូនដល់លោកយាយ លោកតាចាស់ជរា ចំនួន ២៤៥គ្រួសារ នៅក្នុងស្រុកជីក្រែង ដើម្បីជួយសម្រាលទុក្ខលំបាកក្នុងគ្រាមានអាសន្ន ក្រោមអធិបតីភាពលោក នាក់ ណេរ៉ុន អភិបាលរងនៃគណៈអភិបាលខេត្តសៀមរាប ។
ពិធីនេះបានប្រារព្ធធ្វើឡើងនៅក្នុងបរិវេណវត្តខ្នារធ្នង់ ស្ថិតក្នុងភូមិគោករមាស ឃុំគោកធ្លកក្រោម ស្រុកជីក្រែង កាលពីព្រឹកថ្ងៃទី១០ ខែសីហា ឆ្នាំ២០២២ ។
លោក នាក់ ណេរ៉ុន អភិបាលរងខេត្ត មានប្រសាសន៍ថា នេះគឺជាកាតព្វកិច្ច និងការឈឺឆ្អាលរបស់ប្រមុខរាជរដ្ឋាភិបាលកម្ពុជា ក្នុងការយកចិត្តទុកដាក់អំពីសុខទុក្ខរបស់បងប្អូនប្រជាពលរដ្ឋដែលកំពុងរងគ្រោះ និងជួបការលំបាកនោះ ដែលតែងតែប្រតិបត្តិជាប់ជាប្រចាំគ្រប់កាលៈទេសៈ មិនប្រកាន់ពណ៌សម្បុរ ជាតិសាសន៍ គណបក្សនយោបាយណាមួយឡើយ។
លោក នាក់ ណេរ៉ុន បន្តថា រាជរដ្ឋាភិបាលកម្ពុជា នីតិកាលទី៦ នៃរដ្ឋសភា ដែលមានសម្តេចតេជោ ហ៊ុន សែន ជាប្រមុខដឹកនាំដ៏ឆ្នើម បាននឹងកំពុងបន្តពុះពារជំនះរាល់ការលំបាក និងឧបសគ្គនានា ដឹកនាំជោគវាសនាកម្ពុជា ដើម្បីឈានទៅសម្រេចបាននូវសមិទ្ធផលបន្ថែមទៀត ក្នុងកិច្ចអភិវឌ្ឍសេដ្ឋកិច្ចសង្គមសំដៅកាត់បន្ថយភាពក្រីក្ររបស់ប្រជាពលរដ្ឋ តាមរយៈការជំរុញឱ្យមានស្ថិរភាព កំណើនសេដ្ឋកិច្ចជាតិ ការពង្រឹងសន្តិភាព ស្ថិរភាពនយោបាយ និងបង្កើតកិច្ចសហប្រតិបត្តិការអន្តរជាតិ ជាមួយបណ្តាប្រទេសនានា នៅក្នុងសកលលោកផងដែរ ។
ព័ត៌មានជាតិ ថ្មីៗ
លោក គង់ សំអឿន ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប បានឲ្យដឹងថា អនុវត្តតាមយុទ្ធសាស្ត្រចតុកោណរបស់រាជរដ្ឋាភិបាល ដែលសម្ដេចតេជោ ហ៊ុន សែន ជានាយករដ្ឋមន្ត្រី ក្រសួងសង្គមកិច្ច អតីតយុទ្ធជន និងយុវនីតិសម្បទា ដែលមានឯកឧត្តម វង សូត ជារដ្ឋមន្ត្រី មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត បានអនុវត្តបានយ៉ាងខ្ជាប់ខ្ជួនតាមផែនការយុទ្ធសាស្ត្រ អភិវឌ្ឍន៍វិស័យសង្គមកិច្ច អតីតយុទ្ធជន និងយុវនីតិសម្បទា លើគម្រោងកម្មវិធីការងារ (២០១៩ – ២០២៣) និងអនុវត្តយ៉ាងម៉ឺងម៉ាត់នូវទិសដៅការងារអាទិភាពសំខាន់ៗ មួយចំនួន ដើម្បីឈានទៅរកការសម្រេចនូវជោគជ័យជាផ្លែផ្កា ដើម្បីជាផលប្រយោជន៍បម្រើប្រជាជន ។
លោក គង់ សំអឿន បន្តថា តាមរយៈនៃសកម្មភាពនាថ្ងៃនេះ បានបង្ហាញយ៉ាងច្បាស់អំពីការយកចិត្ត ទុកដាក់របស់រាជរដ្ឋាភិបាល ក្នុងការជួយដល់ជនរងគ្រោះ និងជនងាយរងគ្រោះគ្រប់ប្រភេទក្នុងសង្គម ជាពិសេស កុមារកំព្រា កុមារងាយរងគ្រោះ ស្ត្រី ជនចាស់ជរា ជនពិការ អតីតយុទ្ធជន និងអតីតមន្ត្រីរាជការស៊ីវិល ទទួលបាននូវសិទ្ធិយ៉ាងពិតប្រាកដដោយផ្អែកលើមូលដ្ឋានមិនបោះបង់ មិនរើសអើង បណ្តុះបណ្តាលវិជ្ជាជីវៈ សមាហរណកម្មទៅសហគមន៏វិញ ដោយមានការចូលរួមពីគ្រប់ភាគីដៃគូរអភិវឌ្ឍន៏ជាដើម។
សូមបញ្ជាក់ថា អំណោយដែលបងប្អូនប្រជាពលរដ្ឋទទួលបាននាពេលនេះ គឺក្នុងម្នាក់ៗ រួមមាន៖ កន្ទេល១ មុង១ សំពត់១ អង្ករ១ការ៉ុង មី១កេស ភួយ១៕
អត្ថបទ និង រូបភាព៖ លោក ស៊ាន សុផាត
កែសម្រួល៖ លោក លីវ សាន្ត
