ឯកឧត្តម ហ៊ុន ម៉ានី បានមានប្រសាន៍ថា ឯកឧត្តម មិនដែលធ្លាប់រំពឹងថា នឹងមានសៀវភៅដែលសរសេរអំពីខ្លួនឯងនោះទេ ហើយឯកឧត្តមចាត់ទុកថា សៀវភៅ «ក្តីសង្ឃឹមហ៊ុនម៉ានី» គឺអាចមានប្រយោជន៍ឲ្យមហាជនស្គាល់ ហ៊ុន ម៉ានី កាន់តែច្បាស់ ក្រៅពីជាកូននាយករដ្ឋមន្ត្រីមួយរូបនោះ។ឯកឧត្តម ហ៊ុន ម៉ានី បានមានប្រសាសន៍បែបនេះ នៅក្នុងកិច្ចពិភាក្សា មួយនៅក្រុងសៀមរាប នាថ្ងៃទី១០ ខែសីហា ឆ្នាំ២០២២ ក្រោមប្រធានបទ “ក្តីសង្ឃឹម ហ៊ុនម៉ានី”។
ឯកឧត្តម ហ៊ុន ម៉ានី បន្តថា ក្រៅពីឲ្យមហាជនស្គាល់ សៀវភៅនេះក៏បានធ្វើឲ្យឯកឧត្តមស្គាល់ខ្លួនឯងកាន់តែច្បាស់ និងស្វែងយល់ពីសកម្មការងាររបស់ខ្លួន ថាតើការធ្វើសកម្មភាពរបស់ខ្លួនបានជះឥទ្ធិពលអ្វីខ្លះលើមនុស្សជុំវិញខ្លួន និងសង្គមជាតិ។ហើយតាមរយៈសកម្មភាពរបស់ឯកឧត្តម ដែលមានចងក្រងក្នុងសៀវភៅនេះ ឯកឧត្តមជឿជាក់ថា នឹងចែករំលែកមនសិកាស្នេហាជាតិដល់យុវជនជំនាន់ក្រោយ និងចាប់ផ្តើមសកម្មភាពរបស់ខ្លួនក្នុងនាមជាយុវជនខ្មែរមួយរូបដើម្បីបុព្វហេតុជាតិកម្ពុជា។
ឯកឧត្តម ហ៊ុន ម៉ានី សមាជិករដ្ឋសភា និងជាប្រធានសហភាពសហព័ន្ធយុវជនកម្ពុជា ។ ឯកឧត្តម ជាកូនទី៤ ក្នុងចំណោមបងប្អូន៥នាក់ របស់សម្តេចអគ្គមហាសេនាបតីតេជោហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។ ឯកឧត្តមហ៊ុន ម៉ានី បញ្ជាក់ថា សម្រាប់ក្តីសង្ឃឹមរបស់ហ៊ុន ម៉ានី ទោះក្នុងឋានៈតួនាទីអ្វីក៏ដោយ គឺត្រូវបន្តបេសកម្មរបស់សម្តេចតេជោក្នុងការរកសេចក្តីសុខ សេចក្តីចម្រើនជូនជាតិកម្ពុជា៕
អត្ថបទ និង រូបភាព៖ លោក ជា ស្រស់
