ក្រុមអ្នកចូលចិត្តកីឡាជិះកង់ ប្រមាណជាង ១,០០០នាក់ បានរួមគ្នាបង្កើតព្រឹត្តិការណ៍ជិះកង់លើកទី៨ របស់ខ្លួនឡើងវិញ នៅក្រុងសៀមរាប នាព្រឹកថ្ងៃទី១៤ ខែសីហា ឆ្នាំ២០២២ ក្រោមប្រធានបទ “ជិះកង់ដើម្បីបរិស្ថាន និងសុខភាពកុមារ”។ ព្រឹត្តិការណ៍នេះរៀបចំឡើងក្នុងគោលបំណងរៃអង្គាសថវិកា ពីសាធារណជន វិស័យឯកជន និងស្ថាប័ននានា ដើម្បីទ្រទ្រង់ដល់ដំណើរការរបស់មន្ទីរពេទ្យកុមារអង្គរ ដែលមានបេសកកម្មព្យាបាល និងជួយសង្រ្គោះអាយុជីវិតរបស់កុមារកម្ពុជា ប្រកបដោយគុណភាព ក្តីមេត្តាករុណា និងមិនគិតកម្រៃ។
លោកវេជ្ជបណ្ឌិត ងួន ច័ន្ទភក្រ្តា នាយកមន្ទីរពេទ្យកុមារអង្គរ បានបញ្ជាក់ថា ព្រឹត្តិការណ៍ជិះកង់នាពេលនេះ គឺជាសកម្មភាពមនុស្សធម៌ដ៏ពិសេសមួយរបស់ប្រជាពលរដ្ឋទូទៅ ក្នុងការចូលរួមថែរក្សាបរិស្ថាន និងសុខភាព ជាពិសេសគឺការចូលរួមចំណែកក្នុងការបរិច្ចាកនូវថវិការ ជូនមន្ទីរពេទ្យកុមារអង្គរ ដើម្បីជួយសង្គ្រោះអាយុជីវិតកុមារកម្ពុជា។ លោក បន្តថា បច្ចុប្បន្នមន្ទីរពេទ្យកុមារអង្គរ កំពុងមានភាពមមាញឹកក្នុងការជួយសង្គ្រោះ និងព្យាបាលជំងឺដល់កុមារ ដែលកំពុងមានការកើនឡើងឥតឈប់ឈរដោយអ្នកជំងឺធ្ងន់ធ្ងរ ហើយក្នុងនោះមានតម្រូវការព្យាបាលដោយឯកទេសជំនាញ មានចំនួនកាន់តែច្រើន ដោយជំងឺទាំងនោះមានដូចជា ជំងឺមហារីក តម្រងនោម ប្រព័ន្ធប្រសាទ ជំងឺទារក និងជំងឺមួយចំនួនទៀត។
ព័ត៌មានជាតិ ថ្មីៗ
លោកវេជ្ជបណ្ឌិត បានបញ្ជាក់បន្ថែមថា ព្រឹត្តិការណ៍ជិះកង់នាពេលនេះដែរ ក៏ជាការបង្ហាញឲ្យសាធារណជនទូទៅបានឃើញពីការចូលរួម និងយកចិត្តទុកដាក់ របស់ប្រជាពលរដ្ឋគ្រប់ទិសទី ក៏ដូចជាបណ្ដាក្រុមហ៊ុន និងស្ថាប័ននានា ជុំវិញសកម្មភាពមនុស្សធម៌ ក្នុងការជួយសង្គ្រោះនូវអាយុជីវិតកុមារកម្ពុជាយើង។
តំណាងឲ្យក្រុមអ្នកជិះកង់នាពេលនេះ លោក ឆាយ សុភាព បានបង្ហាញថា ព្រឹត្តិការណ៍ជិះកង់សម្រាប់ពេលនេះពិតជាមានសារសំខាន់ណាស់ ខណ:ខេត្តទេសចរណ៍ សៀមរាប-អង្គរ ជាប៉ូលសេដ្ឋកិច្ចមួយដ៏សំខាន់សម្រាប់កម្ពុជា ដែលបានទាក់ទាញនូវរាល់វត្តមានភ្ញៀវទេសចរណ៍ជាតិ និងអន្តរជាតិ ឲ្យចូលមកកំសាន្តជាបន្តបន្ទាប់ ក្រោយពីស្ថានភាព ជំងឺកូវីដ-១៩ មានភាពធូរស្រាល។ លោកបន្តថា ព្រឹត្តិការណ៍នេះដែរ មិនត្រឹមតែជួយផ្សព្វផ្សាយ និងរៃអង្គាសថវិការជួយដល់មន្ទីរពទ្យកុមារអង្គរតែម្យ៉ាងទេ តែព្រឹត្តិការណ៍នេះ ក៏ជយយជំរុញកំណើនភ្ញៀវទេសចរ អភិវឌ្ឍន៍ធនធានមនុស្ស ក្នុងវិស័យកីឡាទេសចរណ៍ ក្នុងការទាក់ទាញចំណាប់អារម្មណ៍ ពីសំណាក់អ្នកស្នេហាវិស័យកីឡាជាតិ និងអន្តរជាតិ ជាពិសេសស្របតាមយុទ្ធសាស្ត្រផ្សព្វផ្សាយទាក់ទាញភ្ញៀវទេសចរជាតិ និងអន្តរជាតិឆ្នាំ ២០២៣ “Visit Camboida Next 2023” ព្រឹត្តិការណ៍នេះ ក៏នឹងចូលរួមលើកស្ទួយវិស័យកីឡានៅកម្ពុជា ដើម្បីអបអរសាទរដំណើរឆ្ពោះទៅការប្រកួតកីឡា SEA GAMES – ASEAN PARA GAMES 2023 ដែលកម្ពុជា ធ្វើជាម្ចាស់ផ្ទះផងដែរ។ សកម្មភាព និងព្រឹត្តិការណ៍ទាំងនេះ កើតមានឡើងបាន គឺដោយសារតែយើងមានសុខសន្តិភាព ហើយបើយើងគ្មានសុខសន្តិភាពទេ នោះយើងក៏គ្មានការរីកចម្រើនដែរ។
សូមជម្រាបជូនថា ព្រឹត្តិការណ៍ជិះកង់នេះ បានប្រើបា្រស់ពេលវេលាជាងកន្លះថ្ងៃ ជាមួយនឹងកម្មវិធីកំសាន្តសប្បាយផ្សេងៗទៀតផងដែរ ដើម្បីជាការទាក់ទាញអ្នកចូលរួម ហើយការរៃអង្គាសមូលនិធិសប្បុរស ដើម្បីចូលរួមគាំទ្រដល់មន្ទីរពេទ្យកុមារអង្គរខេត្តសៀមរាប ដែលកំពុងប្រតិបត្តិការមនុស្សធម៌ ពិនិត្យព្យាបាលជំងឺកុមារដោយឥតគិតថ្លៃ ខណ:ក្នុង១ថ្ងៃៗមន្ទីរពេទ្យមួយនេះ បានទទួលកុមារពិនិត្យព្យាបាលជំងឺប្រមាណជា ៥០០នាក់ ហើយបញ្ហាប្រឈមចំពោះមុខនោះ គឺការលំបាកស្វែងរកថវិកា ដើម្បីបន្តប្រតិបត្តិការ៕
អត្ថបទនិងរូបភាពលោកអ៊ុន ណារាជ្យ កែសម្រួលដោយ លីវ សុខុន!!!
