មន្ទីរផែនការខេត្តសៀមរាប នៅព្រឹកថ្ងៃទី១៦ ខែសីហា ឆ្នាំ២០២២ បានបើកកិច្ចប្រជុំណែនាំពីការធ្វើបច្ចុប្បន្នភាពទិន្នន័យសហគមន៍ ឆ្នាំ២០២២ ដើម្បីធ្វើការពិនិត្យ និងណែនាំបន្ថែមពីការប្រមូលទិន្នន័យធ្វើបច្ចុប្បន្នភាពទិន្នន័យសហគមន៍ ដែលកិច្ចប្រជុំនេះធ្វើឡើងដោយមានការចូលរួមពីលោកប្រធានមន្ទីរ លោកលោកស្រីអភិបាលរងក្រុងស្រុក តំនាងថ្នាក់ដឹកនាំមន្ទីរ អង្គភាពជុំវិញខេត្ត រួមនឹងតំណាងសហគមន៍ និងអង្គការសង្គមស៊ីវិលក្នុងខេត្តមួយចំនួនទៀត។
មានប្រសាសន៍ក្នុងឱកាសនោះ លោក ហាក់ សុធារ៉ា ប្រធានមន្ទីរផែនការខេត្តសៀមរាប បានបញ្ជាក់ថា កើតបង្កើតសហគមន៍ គឺសំដៅទៅលើមនុស្សមួយក្រុម ដែលរស់នៅក្នុងតំបន់តែមួយ ឬក្នុងភូមិសាស្ត្រមួយ ដែលមានគោលបំណងប្រហាក់ប្រហែលគ្នាក្នុងការអភិវឌ្ឍមូលដ្ឋាន ដោយធ្វើការរួមគ្នាលើការងារអ្វីមួយ ហើយទទួលបាននូវប្រយោជន៍រួម។ ចំពោះគោលបំណងនៃកិច្ចប្រជុំនាពេលនេះ គឺដើម្បីប្រមូលចងក្រងចំនួន និងប្រភេទសហគមន៍ នៅក្នុងខេត្តសៀមរាប សម្រាប់ផ្តល់ការណែនាំដល់អ្នកប្រើប្រាស់ទាំងអស់ ជាពិសេសស្ថាប័នពាក់ព័ន្ធ រដ្ឋបាលថ្នាក់ក្រោមជាតិ អង្គការជាតិ និងអន្តរជាតិ ដើម្បីធ្វើការអភិវឌ្ឍ សហគមន៍ក្រីក្រនៅតាមមូលដ្ឋាន។ កិច្ចប្រជុំនេះដែរ ក៏នឹងធ្វើការត្រួតពិនិត្យ និងណែនាំបន្ថែមពីការធ្វើបច្ចុប្បន្នភាពទិន្នន័យ ជូនទៅដល់អ្នកពាក់ព័ន្ធទាំងអស់ អំពីសកម្មភាព និងរបាយការណ៍ តាមរយៈការប្រមូលទិន្នន័យ ដើម្បីដឹងកាន់តែច្បាស់ពីការចង់ក្រងជាសហគមន៍ របស់ប្រជាពលរដ្ឋ ក្នុងទីតាំង និងមូលដ្ឋានដែលខ្លួនរស់នៅ បង្កឲ្យមានភាពងាយស្រួល ក្នុងការចងក្រងសហគមន៍ថ្មី និងការគ្រប់គ្រងសហគមន៍ ឲ្យបានល្អប្រសើរ។
លោក ហាក់ សុធារ៉ា ក៏បានឲ្យដឹងដែរ សម្រាប់ឆ្នាំ២០១៩ កន្លងទៅ ទូទាំងខេត្តសៀមរាបមានសហគមន៍ចំនួន ៣៤០សហគមន៍ ត្រូវបានបង្កើតឡើង ដើម្បីភ្ជាប់ទំនាក់ទំនង និងមានទទួលស្គាល់ពីស្ថាប័នរដ្ឋ និងអាជ្ញាធរមូលដ្ឋាន ក្នុងនោះរួមមាន៖ សហគមន៍កសិកម្ម ៤៨សហគមន៍ ,សហគមន៍ព្រៃឈើ ៦២សហគមន៍ ,សហគមន៍ជលផល ២២សហគមន៍ ,សហគមន៍តំបន់ការពារធម្មជាតិ ១០សហគមន៍ ,សហគមន៍ប្រើប្រាស់ទឹក ៤សហគមន៍ ,សហគមន៍ទេសចរណ៍ធម្មជាតិ ១០សហគមន៍ ,សហគមន៍មន្ទីរអប់រំ យុវជន និងកីឡារ ១៧៩សហគមន៍ និងសហគមន៍សំណង់លំនៅឋានបណ្ដោះអាសន្ន ៥សហគមន៍។
លោកប្រធានមន្ទីរបញ្ជាក់ដែរថា កិច្ចប្រជុំនេះដែរក៏ជាការផ្សព្វផ្សាយបន្ថែម ក៏ដូចជាការពិភាក្សាគ្នា រវាងសហគមន៍ និងអង្គការដៃគូ ក្នុងការសហការអភិវឌ្ឍន៍ និងកែលម្អនូវរាល់បញ្ហានានា ដែលកើតមានឡើងក្នុងសហគមន៍នោះ ដែលជាបញ្ហាដែលអ្នកពាក់ព័ន្ធ ត្រូវចូលរួមដោះស្រាយឲ្យទទួលបានជោគជ័យ។ ក្នុងនោះក៏សូមឲ្យអ្នកចូលរួមទាំងអស់ត្រូវយកចិត្តទុកដាក់ខ្ពស់ ក្នុងការពិភាក្សា ផ្តល់ជាមតិយោបល់ និងសម្របសម្រួល ជាមួយភាគីអ្នកពាក់ព័ន្ធ ព្រមទាំងលើកឡើងនូវគន្លឹះសំខាន់ៗ ដើម្បីឲ្យដំណើរនៃការរៀបចំ និងប្រមូលទិន្នន័យ របាការណ៍ជាក់លាក់ ដាក់ជូនមកមន្ទីរ ដើម្បីងាយស្រួលក្នុងការពិនិត្យ និងចងក្រងនៅសហគមន៍ទាំងនោះ ឲ្យក្លាយជាសហគមន៍ដែលមានការគ្រប់គ្រងច្បាស់លាស់ផងដែរ៕
អត្ថបទ និង រូបភាព៖ លោក អ៊ុន ណារាជ្យ
