កាលពីរសៀលថ្ងៃទី១៦ ខែសីហា ឆ្នាំ២០២២នេះ ប្រជាពលរដ្ឋមានជីវភាពក្រីក្រចំនួន ២០គ្រួសារ រស់នៅក្នុងស្រុកអង្គរធំ ខេត្តសៀមរាប បានទទួលអំណោយពីសមាគមចលនាយុវជនកម្ពុជា ក្រុម១៥៧ សាខាខេត្តសៀមរាប ដោយក្នុងមួយគ្រួសារៗ ទទួលបាន៖ អង្ករ ២៥គីឡូក្រាម ទឹកត្រី ១យួរ ទឹកស៊ីអ៊ីវ ១យួរ ត្រីខ ១យួរ និងគ្រឿងទេសមួយចំនួនទៀត។
លោក សឹង្ហ សំរិទ្ធិ អនុប្រធានសមាគមចលនាយុវជនកម្ពុជា ក្រុម១៥៧ សាខាខេត្ត មានប្រសាសន៍ថា សមាគមចលនាយុវជនកម្ពុជា ក្រុម១៥៧ គឺជាចលនាមួយដែលមិនគិតពីផលចំណេញ់ផ្ទាល់ខ្លួន អព្យាក្រឹត មិនរអើង មិនប្រកាន់ពូជសាសន៍ ពណ៍សម្បុរ សាសនា គឺជាចលនាក្នុងគោលបំណង បម្រើផលប្រយោជន៍សាធារណៈ ដើម្បីបំផុសស្មារតីដល់យុវជនទូទាំងប្រទេសឲ្យចេះស្រឡាញ់គ្នា សាមគ្គីគ្នា ដើម្បីប្រមូលផ្តុំគ្នាចូលរួមចំណែក ជាមួយរាជរដ្ឋាភិបាល កសាងប្រទេសជាតិឲ្យកាន់តែរីកចំរើន។ ហើយចំពោះអំណោយដែលយកមកប្រគល់ជូននាពេលនេះដែរ គឺជាសកម្មភាពមនុស្សធម៍ ក្នុងចលនានៃការចែករំលែកធនធានផ្ទាល់ខ្លួន នឹងការកៀងគរថវិកាពីសមាជិកក្រុមការងារ រួមទាំងសប្បុរសជននានា ដើម្បីចូលរួមចំណែកជាមួយរាជរដ្ឋាភិបាល ក៏ដូចជាជួយសម្រួលដល់ជីវភាពរស់នៅរបស់បងប្អូនប្រជាពលរដ្ឋដែលមានជីវភាពខ្វះខាតប្រចាំថ្ងៃនេះ។
ក្នុងនាមឯកឧត្តម ហ៊ុន ប៉ូគា ប្រធានសមាគមចលនាយុវជនកម្ពុជា ក្រុម១៥៧ សាខាខេត្តសៀមរាប លោក សឹង្ហ សំរិទ្ធិ ក៏បានណែនាំសូមឲ្យបងប្អូនប្រជាពលរដ្ឋ ត្រូវបន្តយកចិត្តទុកដាក់ចំពោះការសម្អាតអនាម័យអោយបានខ្ពស់ ដើម្បីចៀសផុតពីជំងឺកូវីដ-១៩ ក៏ដូចជាជំងឺផ្សេងៗ ដោយអនុវត្តជាប្រចាំនូវរាល់វិធានការនានា ដែលដាក់ចេញដោយរាជរដ្ឋាភិបាល ក៏ដូចជាក្រសួងសុខាភិបាលឲ្យបានខ្ជាប់ខ្ជួនផងដែរ។
ក្នុងឱកាសនោះដែរ លោក ឡុង រដ្ឋារក្ស អភិបាលស្រុកអង្គរធំ តំណាងឲ្យប្រជាពលរដ្ឋទាំង ២០គ្រួសារ បានថ្លែងអំណរគុណដល់សមាគមចលនាយុវជនកម្ពុជា ក្រុម១៥៧ សាខាខេត្តសៀមរាប និងក្រុមការងារទាំងអស់ ដែលតែងតែបន្តសកម្មភាពមនុស្សធម៌ជាប្រចាំ ជាក់ស្តែងនាពេលនេះ បាននាំយកអំណោយ មកប្រគល់ជូនបងប្អូនប្រជាពលរដ្ឋទាំង ២០គ្រួសារដែលមានជិវភាពខ្វះខាតប្រចាំថ្ងៃនេះ។ លោកបញ្ជាក់ថា ពីមុនមកស្រុកអង្គរធំ គឺជាស្រុកដែលក្រជាងគេ នៅក្នុងខេត្តសៀមរាប តែបច្ចុប្បន្នឃើញថា ពីមួយឆ្នាំទៅមួយឆ្នាំ មានការរីកចំរើនជាបន្តបន្ទាប់ ក្រោមការដឹកនាំរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រី សម្តេច បានលះបងអាយុជីវិតសាច់ស្រស់ឈាមស្រស់ជូនប្រទេសជាតិមាតុភូមិយើង ក្នុងការកសាងប្រទេសពីបាទដៃទទេ រហូតដល់មានការរីកចំរើនដូចសព្វថ្ងៃនេះ៕
អត្ថបទ និង រូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
