ក្រោយឆ្លងកាត់វគ្គបណ្តុះបណ្តាលវិជ្ជាជីវៈកាត់ដេរអស់រយៈពេល ៨ខែ របស់គម្រោងសមាគមជីវិត និងក្តីសង្ឃឹម ក្រោមការជួយឧបត្ថម្ភពីសណ្ឋាគារផាកហៃយ៉ាត់ ក្នុងខេត្តសៀមរាប សិក្ខាកាមជាស្រ្តីចំនួន ២១នាក់ មកពីស្រុកមួយចំនួន ក្នុងខេត្តសៀមរាប ត្រូវបានទទួលវិញ្ញាបណ្ឌបត្របញ្ជាក់ការសិក្សា និងម៉ាស៊ីនដេរ ម្នាក់មួយគ្រឿង ដែលវគ្គបណ្តុះបណ្តាលនេះ បានរៀបចំពីធិបិទនៅថ្ងៃទី១៨ ខែសីហា ឆ្នាំ២០២២ នៅក្នុងបរិវេណវត្តដំណាក់ សង្កាត់សាលាកំរើក ក្រុងខេត្តសៀមរាប។
ព្រះតេជគុណធម្មទិន្នោ ឡម លឿម នាយកប្រតិបត្តិសមាគមជីវិត និងក្តីសង្ឃឹម បានសំដែងនូវការដឹងគុណ ចំពោះសណ្ឋាគារផាកហៃយ៉ាត់ ដែលតែងតែឧបត្ថម្ភរហូតមក និងអរគុណដល់សប្បុរជននានា ដែលបានរួមចំណែកក្នុងកិច្ចការនេះ តាមលទ្ធភាព និងធនធាន។ ព្រះអង្គសង្ឃដីកាថា ដោយទទួលបានការគាំទ្រថវិកាពីសណ្ឋាគារផាកហៃយ៉ាត់ សាលាកាត់ដេររបស់សមាគម បានបើកវគ្គថ្មីជំនាន់ទី១៥ និង១៦ នេះឡើង ប៉ុន្តែវគ្គជំនាន់ទី១៥ មិនអាចរៀបចំកម្មវិធីបានដោយកត្តាពីរ គឺ១.កត្តាគោលការណ៍ទប់ស្កាត់ការរីករាលដាលនៃមេរោគនូវីដ១៥ និង ២.គ្មានថវិកាសម្រាប់ ទិញម៉ាស៊ីនដេរសម្រាប់សិស្ស ហើយខាងសណ្ឋគារបានស្នើសុំពន្យាទើបត្រូវពន្យាមកដល់ថ្ងៃនេះ។
ព្រះតេជគុណធម្មទិន្នោ ឡម លឿម មានសង្សដីកាបញ្ជាក់ថា ក្នុង ១៤វគ្គកន្លងមក ខាងមូលនិធិផាកហៃយ៉ាត់ បានទិញម៉ាស៊ីនដេរ ១០០ដុល្លារ សម្រាប់សិស្សម្នាក់១ ប៉ុន្តែក្នុងវគ្គ១៥ និង១៦ ម៉ាស៊ីនមានតម្លៃ និងគុណភាពខ្ពស់ជាងមុន យើងបានថវិកាពីមូលនិធិផាកហៃយ៉ាត់ គេផ្តល់ថវិកាទិញម៉ាស៊ីន ២៣០ដុល្លារ សម្រាប់សិស្សម្នាក់។ ចំពោះម៉ាស៊ីនដេរមួយគ្រឿងមានតម្លៃ ២៨០ដុល្លារ ហេតុនេះត្រូវការបដិភាគពីសិស្សម្នាក់ ៥០ដុល្លារទៀត។ បន្ថែមពីការស្នាក់នៅ និងហូបចុកដោយមិនគិតកម្រៃ ស្ត្រីដែលបានទទួលការបណ្តុះបណ្តាល ក៍បានទទួលការសិក្សាបន្ថែមលើភាសាអង់គ្លេស កុំព្យូទ័រ និងសិក្សាស្វែងយល់អំពីច្បាប់ លិខិតបទដ្ឋានផ្សេងៗ ជាមួយអង្គការដៃគូផងដែរ។
តំណាងសិក្ខាកាមដែលបានសិក្សា បានសម្តែងភាពរីករាយអរព្រះគុណអរគុណ និងថ្លែងការដឹងគុណយ៉ាងជ្រាលជ្រៅ ដល់ក្រុមការងារព្រះសង្ឃ ក្នុងសមាគមជីវិត និងក្តីសង្ឃឹមទាំងអស់ ជាពិសេសអាជ្ញាធរមូលដ្ឋាននិងអ្នកដឹកនាំសណ្ឋាគារ ផាកហៃយ៉ាត់ ដែលអ្នកទាំងអស់គ្នាបានជួយសម្របសម្រួលឱ្យពួកគាត់បានស្នាក់នៅ និងសិក្សាប្រកបដោយគុណភាព និងក្តីស្រឡាញ់បំផុត។ ពួកគាត់ថានឹងខិតខំយកចំណេះដឹងនេះ ទៅអនុវត្តក្នុងកិច្ចការអាជីវកម្មប្រចាំថ្ងៃឱ្យបានប្រសើរ តាមការផ្តាំផ្ញើរបស់រៀមច្បងទាំងឡាយ។
អ្នកស្រី រីណាម៉ារីនី អ្នកចាត់ការទូទៅនៃសណ្ឋាគារផាក់ហៃយ៉ាត់ បានផ្តាំផ្ញើរដល់ស្ត្រីដែលទើបទទួលបានជំនាញកាត់ដេរនាពេលនេះ ត្រូវចេះចាប់យកឱកាស និងប្រើប្រាស់បំណិនជីវិត ដើម្បីឈោងចាប់សិក្សាលើជំនាញ ឬប្រកបអាជីវកម្មផ្សេងៗបន្ថែមទៀត សម្រាប់លើកស្ទួយជីវភាពគ្រួសាររបស់ផងដែរ។ ថ្វីត្បិតតែយើងជាស្ត្រីតែយើងត្រូវមានភាពរឹងមាំ និងឈរលើស្មារតីម្ចាស់ការក្នុងការសម្រេចចិត្តធ្វើអ្វីមួយទៅតាមលទ្ឋភាពនិងសមត្ថភាពរបស់ខ្លួន។
ព្រះធម្មានុរ័ក្ខញាណ ស៊ុម ពិសិទ្ឋិ ព្រះរាជាគណៈថ្នាក់កិត្តិយស ព្រះសមុហ៍គណខេត្ត និងជាព្រះចៅអធិការវត្តប្រាសាទចាន់រង្សី ហៅវត្តគោកចាន់ ខេត្តសៀមរាប បានផ្តាំផ្ញើដល់ស្ត្រីរៀនជំនាញកាត់ដេរនៅពេលយកជំនាញទៅអនុវត្តការងារអាជីវកម្មត្រូវរិះរកវិធីសាស្ត្រកែខៃប្រើប្រាស់ឱ្យកាន់តែស្ទាត់ជំនាញ ព្រោះហេតុថាជោគជ័យ នៃការសិក្សានាពេលនេះមិនមែនបញ្ចប់នោះទេ ពោលគឺត្រូវសិក្សានិងស្វែងយល់លើជំនាញវិជ្ជាជីវៈផ្សេងៗបន្ថែមទៀត ទើបជីវិតបានជោគជ័យ។ ហើយត្រូវយកចំណេះ ទៅប្រើប្រាស់ក្នុងផ្លូវសុចរិតទៀងត្រង់ចៀសវាងការប្រកបអាជីវកម្មបន្លំបោកបញ្ឆោតកេងប្រវញ្ញ័អ្នកដទៃព្រោះវាជាអំពើនាំមកនូវបាបកម្ម។ នៅពេលយើងទៅដល់មូលដ្ឋាន ត្រូវចេះចែករំលែកចំណេះ ជំនាញដែលខ្លួនមានដល់អ្នកជិតខាង បងប្អូនកូនចៅ និងត្រូវមានការទទួលខុសត្រូវក្នុងការបំពេញការងារធ្វើខ្លួន ជាបុគ្គលដែលមានតម្លៃ ទាំងតម្លៃសម្រាប់សហគមន៍ និងខ្លួនឯង ដោយឈរលើគោលការណ៍គិតត្រូវ ធ្វើត្រូវ និងនិយាយត្រូវ។
ក្នុងរបាយការណ៍របស់ សមាគមជីវិតនិងក្តីសង្ឃឹម បង្ហាញថា៖គម្រោងសាលាបណ្តុះបណ្តាលវិជ្ជាជីវះកាត់ដេរ នេះចាប់ផ្តើមនៅឆ្នាំ២០០៦ ក្រោមការឧបត្ថម្ភពី សណ្ឋាគារឡាព និងសិន្តាមុន្នី ដែលក្រោយមកប្ដូរទៅជាសណ្ឋាគារផាកហៃយ៉ាត់។ គម្រោងនេះផ្តល់ការបណ្តុះបណ្តាលជំនាញវិជ្ជាជីវៈកាត់ដេរដល់ស្ត្រី និង យុវតីមានកម្រិតវប្បធម៌ទាប និងគ្មានជំនាញច្បាស់លាស់។ គម្រោងបានបញ្ចប់ចំនួន ១៦វត្តកន្លងទៅហើយ ដែលមានស្ត្រី និងក្មេងប្រមាណ ៣៣១នាក់ បានទទួលបណ្តុះបណ្តាល និង៨០ភាគរយ នៃពួកគេគឺបានប្រើប្រាស់ជំនាញ ដោយធ្វើការងារក្នុងស្ថាប័នផ្សេងៗទាំងនៅសៀមរាប និងរាជធានីភ្នំពេញ៕
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
