វគ្គបណ្ដុះបណ្ដាលស្ដីពីកាកបាទក្រហម និងវិជ្ជាសង្គ្រោះបឋម ដែលរៀនចំឡើងដោយសាខាកាកបាទក្រហមកម្ពុជាខេត្ត ជូនដល់ទីប្រឹក្សាយុវជនកាកបាទក្រហមកម្ពុជា ចំនួន ៤២នាក់ មកពី២១គ្រឹះសា្ថនសិក្សាក្នុងខេត្តសៀមរាប ដែលវគ្គបណ្ដុះបណ្ដាលនេះមានរយៈពេល ២ថ្ងៃគឺ ថ្ងៃទី១៧ និង១៨ ខែសីហា ឆ្នាំ២០២២ ត្រូវបានបិទបញ្ចប់ជាស្ថាពរ។
លោក ស៊ុ សំអន នាយកសាខាកាកបាទក្រហមកម្ពុជាខេត្តសៀមរាប បានបញ្ជាក់ថា វគ្គបណ្ដុះបណ្ដាលនេះរៀបចំឡើងនេះ ក្នុងគោលបំណងបង្កើនចំណេះដឹង ដល់ទីប្រឹក្សាយុជនកាកបាទក្រហមកម្ពុជា នៅតាមគ្រឹះស្ថានសិក្សា ក្នុងការបំពេញការងារភារកិច្ចជាប្រតិបត្តិករមនុស្សធម៌ជួយសង្គ្រោះដល់ជនរងគ្រោះ និងងាយរងគ្រោះនៅក្នុងសហគមន៍ ព្រមទាំងបណ្ដុះបណ្ដាលបន្ដដល់យុវជនកាកបាទក្រហមកម្ពុជា នៅតាមសាលារៀនប្រកបដោយគុណភាព និងប្រសិទ្ធភាព។ វគ្គបណ្ដុះបណ្ដាលនេះដែរបានផ្ដោតជាសំខាន់លើប្រធានបទចំនួន២ រួមមាន៖ ទី១.អំពីកាកបាទក្រហម៖ ប្រវត្តិកាកបាទក្រហម សមាសភាគកាកបាទក្រហម បដិរូមសញ្ញាសម្គាល់របស់ចលនា គោលការណ៍គ្រឹះរបស់ចលនា ប្រវត្តិកាកបាទក្រហមកម្ពុជា និងយុទ្ធសាស្រ្ត២០២១-២០៣០ របស់កាកបាទក្រហមកម្ពុជា និងទី២.អំពីវិជ្ជាសង្គ្រោះបឋម៖ គោលការគ្រឹះនៃការសង្គ្រោះ ស្ថានភាពដំណេកសុវត្ថិភាព សភាពសហ្ហុក ស្លាក់ លង់ទឹក ធ្លាក់ពីលើទីខ្ពស់ ឆក់ចរន្តអគ្គិសនី គ្រោះថ្នាក់ចរាចរណ៍ របួសគ្រប់ប្រភេទ ពុល ប្រកាច់ ហូរឈាម សន្លប់ CPR ការបាក់ឆ្អឹង និងការបញ្ជូនជនរងគ្រោះ។
ក្នុងពិធីបិទនោះដែរ លោក ស៊ុ សំអន ក៏បានថ្លែងអំណរគុណដល់សិក្ខាកាមទាំងអស់ ដែលបានចំណាយពេលវេលាចូលរួមវគ្គ និងយកអស់កម្លាំងកាយចិត្ត ខិតខំត្រងត្រាប់ស្ដាប់នូវរាល់បទបង្ហាញ និងចូលរួមហ្វឹកហាត់វិជ្ជាសង្គ្រោះបឋមយ៉ាងយកចិត្តទុកដាក់ ដើម្បីទទួលបាននូវចំណេះដឹងពិតប្រាកដ។ ជាមួយគ្នានោះ សូមឲ្យសិក្ខាកាមទាំងអស់ពេលវិលត្រឡប់ទៅវិញ ត្រូវយកចំណេះដឹងនេះ ទៅផ្សព្វផ្សាយបណ្តុះបណ្តាលបន្ត ជូនដល់យុវជនកាកបាទក្រហមកម្ពុជា នៅតាមសាលារៀនឱ្យបានទូលាយតាមដែលអាចធ្វើបាន ដើម្បីពង្រីកបន្តនូវវប្បធម៌ចែករំលែក និងជួយសង្គ្រោះគ្នា ឬយ៉ាងហោចណាស់ក៏អាចផ្សព្វផ្សាយ ឬជួយសង្គ្រោះដល់ក្រុមគ្រួសារយើងបាន ក្នុងករណីមានឧបទ្ទវហេតុផ្សេងៗកើតឡើងទៀតផង៕
#សាខាកាកបាទក្រហមខេត្ត
កែសម្រួល៖ លោក អ៊ុន ណារាជ្យ
