សមាគមទេសចរណ៍កម្ពុជា CATA បានចាប់ផ្ដើមបើកវគ្គបណ្ដុះបណ្ដាលពង្រឹងជំនាញ ដែលមានស្រាប់ក្នុងវិស័យទេសចរណ៍ និងបដិសណ្ឋារកិច្ច ដល់ប្រតិបត្ដិករទេសចរណ៍ ក្នុងខេត្តសៀមរាប ដើម្បីស្តារឡើងវិញវិស័យទេសចរណ៍ក្រោយវិបត្តិកូវីដ-១៩។ វគ្គបណ្ដុះបណ្ដាលនេះ នឹងធ្វើឡើងនៅថ្ងៃទី២២ ខែសីហាឆ្នាំ២០២២ខាងមុខនេះ នាខេត្ដសៀមរាប ។
លោកជំទាវ ឆាយ ស៊ីវលីន ប្រធានសមាគមទេសចរណ៍កម្ពុជា ហៅកាត់ថា CATA មានប្រសាសន៍នៅក្នុងពិធីបើកបណ្ដុះបណ្ដាលកាលថ្ងៃទី១៩ ខែសីហាឆ្នាំ២០២២ម្សិលមុិញនេះថា កម្មវិធីបណ្តុះបណ្តាលធ្វើឡើងដោយសង្កត់ធ្ងន់ទៅលើការពង្រឹងជំនាញដែលមានស្រាប់ និងរំលឹកឡើងវិញ សំរាប់បុគ្គលិក ដែលកំពុងបំរើការងារ ឬត្រូវបានបាត់បង់ការងារ ក្នុងវិស័យទេសចរណ៍ និងបដិសណ្ឋារកិច្ច ក្នុងសកម្មភាពស្តារវិស័យទេសចរណ៍ក្រោយវិបត្តិកូវីដ-១៩។ កម្មវិធីបណ្តុះបណ្តាលនេះត្រូវបានរៀបចំឡើងក្រោមកិច្ចសហការរវាងក្រសួងទេសចរណ៍(MOT)ជាមួយសមាគមទេសចរណ៍កម្ពុជា (CATA) និងគាំទ្រផ្នែកបច្ចេកទេសដោយទីភ្នាក់ងារប្រឹក្សាយោលបល់ជំនាញទេសចរណ៍អេធីភី(ATP Consultant) និងស៊ីអេចធី (CHT) ដែលបានទទួលជំនួយថវិការពីក្រសួងសេដ្ឋកិច្ច និងហិរញ្ញវត្ថុ តាមរយ:មូលនិធិអភិវឌ្ឍន៍ជំនាញ។លោកជំទាវ បន្ដថា កម្មវិធីសិក្សា និងមេរៀនបណ្តុះបណ្តាលត្រូវបានរៀបចំឡើងដោយផ្អែកលើសមត្ថភាពនៃជំនាញនីមួយៗ សម្រាប់បុគ្គលិកបម្រើការផ្នែកសណ្ឋាគារ និងភោជនីយដ្ឋាន ចំនួន៧០០នាក់ ផ្នែកទីភ្នាក់ងារ និងការីទេសចរណ៍ចំនួន ១៧៥នាក់ និងផ្នែក មគ្គុទ្ទេសក៍ទេសចរណ៍ចំនួន ២០០នាក់។
ដើម្បីធានាការបណ្តុះបណ្តាលជំនាញ គម្រោងបានធ្វើការ បណ្តុះបណ្តាលគ្រូបង្គោលចំនួន ៤៩រូប ដោយភ្នាក់ងារប្រឹក្សាយោលបល់ជំនាញទេសចរណ៍អេធីភី (ATP Consultant) ដើម្បីចូលរួមអនុវត្តការបណ្តុះបណ្តាលទៅកាន់សិក្ខាកាមជាង ១,០០០នាក់ ក្នុងរយ:ពេលចាប់ពីខែសីហា ដល់ខែតុលាឆ្នាំ២០២២នេះ។ ក្នុងដំណើរជ្រើសរើសសិក្ខាកាម សមាគមទេសចរណ៍កម្ពុជា និងក្រុមការងារអនុវត្តគម្រោងបានរៀបចំសិក្ខាកាមផ្សព្វផ្សាយដំបូងនៅថ្ងៃទី២២ ខែកក្កដា ឆ្នាំ២០២២ ដែលមកដល់ពេលនេះដំណើរការជ្រើសរើសសិក្ខាកាមបានចំនួន ១,០៧៥នាក់ ។លោកជំទាវ បានបញ្ជាក់ថា ដំណើរការអនុវត្តការបណ្តុះបណ្តាល នឹងធ្វើឡើងចាប់ពីថ្ងៃទី២២ ខែសីហា ឆ្នាំ២០២២ខាងមុខនេះ ក្នុងនោះការបណ្តុះបណ្តាលទៅកាន់បុគ្គលិកដែលបម្រើការក្នុងវិស័យទេសចរណ៍ចំនួន ១០ផ្នែក រួមមាន ផ្នែកទីភ្នាក់ងារទេសចរណ៍ និងការីទេសចរណ៍, ផ្នែកមគ្គុទ្ទេសក៍ទេសចរណ៍, ផ្នែកជួរមុខ, ផ្នែករៀបចំបន្ទប់, ផ្នែកបំរើម្ហូបអាហារ, ផ្នែកចុងភៅ, ផ្នែកធនធានមនុស្ស, ផ្នែកលក់ និងទីផ្សារ, ផ្នែកស្ប៉ា និងផ្នែកវិស្វកម្ម។
ឯកឧត្ដម ថោង ខុន រដ្ឋមន្ដ្រីក្រសួងទេសចរណ៍ បានបង្ហាញការគាំទ្រចំពោះវគ្គបណ្តុះបណ្តាលពង្រឹងសមត្ថភាពអ្នកបម្រើការក្នុងវិស័យទេសចរណ៍សរុបជាង ១ពាន់នាក់ នៅខេត្តសៀមរាបនេះ។ ឯកឧត្ដម បានបន្ដថា សមិទ្ធផល នៃកិច្ចសហប្រតិបត្តិការលើការជំរុញអភិវឌ្ឍធនធានមនុស្សក្នុងវិស័យទេសចរណ៍នៅថ្ងៃនេះ គឺជាជំហានថ្មីមួយទៀត នៃកិច្ចសហប្រតិបត្តិការ និងភាពជាដៃគូអភិវឌ្ឍន៍ ជាពិសេសតួនាទីដ៏មានតម្លៃរបស់ផ្នែកឯកជន ក្នុងការចូលរួមសម្រេចនូវផែនការបណ្តុះបណ្តាលជំនាញវិជ្ជាជីវ:ទេសចរណ៍ និងបដិសណ្ឋារកិច្ច ព្រមទាំងចូលរួមសម្រេចផែនការស្តារ និងអភិវឌ្ឍវិស័យទេសចរណ៍ក្នុង និងក្រោយដំណាក់កាលជំងឺកូវីដ-១៩។ ឯកឧត្ដម បានបញ្ជាក់ថា វគ្គបណ្តុះបណ្តាលពង្រឹងសមត្ថភាពអ្នកបម្រើការក្នុងវិស័យទេសចរណ៍នេះ គឺជាសកម្មភាពបំពេញបន្ថែមមួយនៅក្នុងសកម្មភាពជំរុញការអភិវឌ្ឍ និងស្តារជំនាញទេសចរណ៍ និងការអភិវឌ្ឍធនធានមនុស្ស ក្នុងវិស័យទេសចរណ៍ប្រកបដោយគុណភាព និងប្រសិទ្ធភាព៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!!
