ថ្លែងនៅខេត្តសៀមរាប កាលពីចុងសប្ដាហ៍កន្លងទៅនេះ ឯកឧត្ដម ថោង ខុន រដ្ឋមន្ដ្រីក្រសួងទេសចរណ៍លើកឡើងថា រាជរដ្ឋាភិបាលបានដាក់គោលដៅសម្រាប់ខេត្តសៀមរាបនឹងទទួលបានភ្ញៀវទេសចរអន្តរជាតិប្រមាណ៧លាននាក់ក្នុងមួយឆ្នាំនៅឆ្នាំ២០៣៥ ដោយផ្អែកលើគោលដៅទេសចរណ៍ទាំង៦របស់ខេត្តមួយនេះ។
ឯកឧត្តមរដ្ឋមន្ត្រី បញ្ជាក់ថាទោះបីពុំមានវិបត្តិកូវីដ១៩ ខេត្តសៀមរាប ក៏អាចផ្ទុកភ្ញៀវទេសចរណ៍បានដល់៧លាននាក់នោះដែរ។ ឯកឧត្តម បន្ថែមថា នេះដោយសារតែ ក្រុងសៀមរាប ជាទីក្រុងបេតិកភណ្ឌ ដែលមានការការពារហ្មត់ចត់ និងមិនអាចអភិវឌ្ឍន៍តាមការចង់បាននោះទេ។
ព័ត៌មានជាតិ ថ្មីៗ
ឯកឧត្តមរដ្ឋមន្ត្រី បញ្ជាក់បន្ថែមថា ដើម្បីជំរុញឱ្យខេត្តសៀមរាបឈានទៅទទួលបានអ្នកទេសចរណ៍អន្តរជាតិ ៧លាននាក់នៅឆ្នាំ២០៣៥ រាជរដ្ឋាភិបាលនឹងបង្កើតតំបន់សៀមរាបថ្មីមួយទៀត ដើម្បីសម្រួលដល់ការអភិវឌ្ឍ និងបញ្ចៀសផលប៉ះពាល់មួយចំនួនមកលើក្រុងសៀមរាប ដែលជាទីក្រុងបេតិកភណ្ឌ។ ទន្ទឹមនឹងការបង្កើតតំបន់សៀមរាបថ្មីនេះ វាក៏នឹងបង្កើតការងារដល់មនុស្សប្រមាណ៩០ម៉ឹននាក់ និងប្រាក់ចំណូលប្រមាណ៥ពាន់លានដុល្លារសម្រាប់ខេត្តសៀមរាប និងសេដ្ឋកិច្ចជាតិទាំងមូលផងដែរ។
គួរជម្រាបថា យោងតាមរបាយការណ៍ក្រសួងទេសចរណ៍ បង្ហាញថា គិតត្រឹមឆមាសទី២ ឆ្នាំ២០២២នេះ ទេសចរអន្តរជាតិចូលមកទស្សនាប្រទេសកម្ពុជាមានចំនួនជាង ៥០ម៉ឺននាក់ កើនឡើងក្នុងអត្រា ៣៩៤% ធៀបនឹងរយៈពេលដូចគ្នាឆ្នាំ២០២១។ ក្នុងនោះ គិតជាមធ្យមទេសចរអន្តរជាតិចូលមកប្រទេសកម្ពុជាមានប្រមាណ ៥,០០០ ទៅ៥,៦០០នាក់ ក្នុងមួយថ្ងៃ។ ដោយឡែកសម្រាប់ខេត្តសៀមរាបរយៈពេល ៧ខែ ក្នុងឆ្នាំ២០២២ ទទួលបានទេសចរអន្តរជាតិសរុបចំនួនជាង៨ម៉ឺននាក់ និង ជើងហោះហើរ ៥៥០លើក។
អត្ថបទ និង រូបភាព៖ លោក បូ សាវី
កែសម្រួល៖ លោក សេង ផល្លី
