នៅព្រឹកថ្ងៃទី ២២ ខែ សីហា ឆ្នាំ២០២២នេះ នៅសាលាខេត្តសៀមរាប មានបើកកិច្ចប្រជុំសាមញ្ញលើកទី៣៨ អាណត្តិទី៣ របស់គណៈកម្មាធិការពិគ្រោះយោបល់កិច្ចការស្ត្រីនិងកុមារខេត្តសៀមរាប ប្រចាំខែសីហា ឆ្នាំ២០២២ ដឹកនាំរបស់លោកជំទាវ ស៊ិន ណម សមាជិកក្រុមប្រឹក្សាខេត្ត និងជាប្រធានគណៈកម្មាធិការពិគ្រោះយោបល់ កិច្ចការស្ត្រី និងកុមារខេត្ត ដោយមានការចូលរួមពីលោក លោកស្រី ជាសមាជិក គណៈកម្មាធិការពិគ្រោះយោបល់កិច្ចការស្ត្រីនិងកុមារខេត្ត រួមទាំងអង្គការដៃគូរផងដែរ។
កិច្ចប្រជុំនេះមានគោលបំណង ធ្វើការអនុម័តលើសេចក្តីព្រាងកំណត់ហេតុ កិច្ចប្រជុំសាមញ្ញលើកទី៣៧ អាណត្តិទី៣ ប្រចាំខែកក្កដា ឆ្នាំ២០២២ និង លទ្ធផលការងារអនុវត្តបានប្រចាំខែសីហា ព្រមទាំងលទ្ធផលពីស្ថានភាពស្ត្រី យុវវ័យ កុមារ និង ជនរងគ្រោះ ក្នុងនោះពាក់ព័ន្ធលើវិស័យ អប់រំ , សុខភាព , អនាម័យ ទឹកស្អាត , សន្តិសុខស្បៀង , សង្គមកិច្ច , ពលកម្មកុមារ , សមភាពយេនឌ័រ និង សន្តិសុខសណ្តាប់ធ្នាប់ និង ការអនុម័ត លើកសេចក្តីព្រាងផែនការសកម្មភាពប្រចាំខែកញ្ញា ឆ្នាំ២០២២ផងដែរ។
យោងតាមលទ្ធផលនៃរបាយការណ៍ប្រចាំខែសីហា របស់គណៈកម្មាធិការពិគ្រោះ យោបល់កិច្ចការស្ត្រីនិងកុមារខេត្ត មាន ១០លើក ,ទាក់ទងអំពើហិង្សា និង យេនឌ័រ មាន១១ករណី ក្នុងនោះករណីរំលោភសេពន្ថវៈលើអនីតិជន ចំនួន ០៣ករណី , អំពើហិង្សាក្នុងគ្រួសារ ចំនួន០៨ករណី បានសហការជាមួយអាជ្ញាធរ អង្គការសង្គមស៊ីវិល ដោះស្រាយវិវាទគ្រួសារក្រៅប្រព័ន្ធតុលា។ ការងារសន្តិសុខស្បៀង មាន០២លើក និង វិស័យពលកម្មកុមារ មាន០៣លើក ព្រមទាំងបានលើកពីបញ្ហាប្រឈមមួយចំនួនទៀតផង ។ ក្នុងនោះដោយធ្វើការពិនិត្យ និង អនុម័តលើសេចក្តីព្រាងកំណត់ហេតុកិច្ចប្រជុំ សាមញ្ញលើកទី៣៨អាណត្តិទី៣ និង លទ្ធផលនៃការអនុវត្តប្រចាំខែ ព្រមទាំងស្ថានភាពស្ត្រី យុវវ័យ កុមារ និង ជនងាយរងគ្រោះ តាមវិស័យពាក់ព័ន្ធ ដោយផ្តោតលើវិស័យ អប់រំ ,សុខភាព ,អនាម័យទឹកស្អាត , សន្តិសុខស្បៀង , សង្គមកិច្ច ពលកម្មកុមារ ,សមភាពយេនឌ័រ និង សន្តិសុខសណ្តាប់ធ្នាប់សង្គម ។ ក្នុងនោះដែរអង្គប្រជុំបាន អនុម័តលើសេចក្តីព្រាងផែនការសកម្មភាពប្រចាំខែ កញ្ញា ឆ្នាំ២០២២ ចំនួន ៤៣ចំណុច សម្រាប់អនុវត្តបន្តផងដែរ ។
មានប្រសាសន៍បូកសរុបកិច្ចប្រជុំនោះលោកជំទាវ ស៊ិន ណម បានធ្វើការថ្លែងអំណរគុណ និង វាយតម្លៃខ្ពស់ ដល់សមាជិកសមាជិកា នៃគណៈកម្មាធិការដែលបានអនុវត្តប្រចាំខែសីហា ដោយទទួលបានលទ្ធផលគួឲ្យកត់សម្គាល់ ដោយ មានកិច្ចសហការល្អពីអាជ្ញាធរ និង អង្គការដៃគូ ព្រមទាំងបានកាត់បន្ថយនូវរាល់បទល្មើស ដែលតែងកើតឡើងលើស្ត្រី និង អនីតិជន ។ ក្នុងនោះលោកជំទាវ ក៏បានលើកនូវចំណុចសំខាន់ៗមួយចំនួន ដែលជាទិសដៅសម្រាប់ ការអនុវត្តនៅខែបន្តទៀតផង។ លោកជំទាវក៏បានធ្វើការស្នើសុំឲ្យមានកិច្ចសហការជាមួយអង្គការដៃគូរ ព្រមទាំងរៀបចំបើកវគ្គបណ្តុះបណ្តាល ការកំណត់អត្តសញ្ញាណជនរងគ្រោះ នៅថ្នាក់ក្រុង ស្រុក និង ដល់ក្រុមយុវជន ក្នុងការធ្វើចំណាកស្រុកប្រកបដោយសុវត្ថិភាព និង ផ្សព្វផ្សាយបន្តដល់យុវជននៅតាម សាលារៀនទាំង១២ ក្រុង ស្រុក ។ លោកជំទាវក៏បានលើក របៀបវារៈកិច្ចប្រជុំក្នុងខែ កញ្ញាខាងមុខ ដើមី្បធ្វើការពង្រឹងទៅលើកការអនុវត្ត ច្បាប់ ការផ្តល់សេវាកម្ម ដល់ជនរងគ្រោះដោយអំពើហិង្សាទាក់ទងនឹងយេនឌ័រ ព្រមទាំងពង្រឹងសមត្ថភាព ក្រុមការងារនៅថ្នាក់ក្រុង ស្រុក ឃុំសង្កាត់ ពាក់ព័ន្ធនឹងការអនុវត្តតួនាទី ភារកិច្ច និង ច្បាប់ពាក់ព័ន្ធ ។ លោកជំទាវក៏បានកោតសរសើរផងដែរ ចំពោះការយកចិត្តទុកដាក់ និង កិច្ចសហការរបស់អង្គរ ការដៃគូ ចំពោះភាពខ្វះខាត លើវិស័យអប់រំ នៅតាមបណ្តាមូលដ្ឋាន និងតំបន់ដាច់ស្រយាលជាដើម តែទទួលបានការផ្គត់ ផ្គង់គាំទ្រពីអង្គការដៃគូរ៕
អត្ថបទ និង រូបភាព៖ លោក ម៉ី សុខារិទ្ធ
