នារសៀលថ្ងៃទី២៣ ខែសីហា ឆ្នាំ២០២២នេះ ព្រះគ្រូធម្មវិសុទ្ឋិរង្សី ឡាច ចន្ថា ចៅអធិការវត្តដំណាក់ រួមជាមួយគណ:កម្មការវត្ត ដឹកនាំដោយមហាឧបាសកពុទ្ធសាសនូបត្ថម្ភ ង៉ែត យ៉ិន ព្រមទាំងមានការនិមន្ត និងអញ្ជើញចូលរួមពី ព្រះសមុហ៍គណខេត្ត ព្រះរាជាគណ: ព្រះចៅអធិការវត្តមួយចំនួនក្នុងក្រុងសៀមរាប និងលោក សាម ឡន ចៅសង្កាត់សាលាកំរើករួមជាមួយក្រុមការងារសង្កាត់ផងដែរ បានសហការធ្វើសង្ឃគហ:ទាន ជូនដល់គ្រួសារប្រជាពលរដ្ឋ ចំនួន២៣គ្រួសារមកពីភូមិមួយចំនួនក្នុងសង្កាត់នេះ ដោយពួកគាត់ជួបការលំបាកក្នុងជីវភាព ដើម្បីជួយរំលែកការលំបាកទៅតាមលទ្ធភាព ដែលអាចធ្វើបាន ក្នុងអំឡុងពេលសកលលោកទាំងមូល ក៏ដូចជាកម្ពុជាផងដែរ ជួបនូវវិបត្តិជំងឺឆ្លងកូវីដ-១៩។ ព្រះចៅអធិការវត្តតែងតែបានសហការជាមួយចៅអធិការវត្តជាច្រើនទៀត ក្នុងខេត្តសៀមរាប ដើម្បីស្វែងរកកៀងគរការឧបត្ថម្ភពីសប្បុរសជនជិតឆ្ងាយសម្រាប់ផ្តល់ជូនគ្រួសារ ដែលងាយរងគ្រោះដូចជាចាស់ជរាគ្មានទីពឹង ជនមានពិការភាព ស្ត្រីម៉េម៉ាយមានជំងឹ ដែលពួកគាត់ជួបបញ្ហាលើជីវភាពប្រចាំថ្ងៃ។ នេះបើតាមសង្ឃដីកា ព្រះគ្រូធម្មវិសុទ្ឋិរង្សី ឡាច ចន្ថា ចៅអធិការវត្តដំណាក់។
សម្ភារ:អំណោយសម្រាប់ពេលនេះ បានមកការចូលរួមបរិច្ចាករបស់សប្បុរជនចំណុះជើងវត្ត និងមួយផ្នែកបានពីការសន្សំសំចៃរបស់ចៅអធិការ និងគណ:កម្មការវត្តដំណាក់ ដែលទទួលបានពីការប្រគេនរបស់ទាយក ទាយិកា នាពេលកន្លងមក។ ព្រះគ្រូចៅអធិការ មានសង្ឃដីកាបន្តថា ចាត់ទុកការផ្តល់អំណោយនេះ គឺបង្ហាញពីការផ្តល់ឱ្យគ្នាទៅវិញទៅមកនូវក្តីស្រឡាញ់រាប់អាន និង មេត្តាករុណា ដល់គ្នាទៅវិញទៅមកក្នុងកាល:ទេស: ដែលយើងទាំងអស់គ្នាកំពុងជួបនូវបញ្ហាប្រឈមនឹងជំងឺកូវីដ-១៩។
ព្រះធម្មារុ័ក្ខញណ ស៊ុម ពិសិទ្ធិ ព្រះសមុហ៍គណខេត្ត និងជាព្រះចៅអធិការវត្តប្រាសាទចន្ទរង្សី ហៅវត្តគោកចាន់ ឃុំអំពិល ស្រុកប្រាសាទបាគង បានបង្ហាញនូវព្រះទ័យយកចិត្តទុកដាក់របស់ព្រះភិក្ខុសង្ឃ ពេលឃើញពុទ្ធបរិស័ទជួបការលំបាកព្រះសង្ឃ ក៏បារម្ភ និងជួយរំលែកទុក្ខគ្នាទៅវិញទៅមក ក្នុងនាមជា មិត្តរួមជាតិ រួមសាសន៍។ ព្រះអង្គ បន្តថា៖
ភាពខ្វះខាត និងទុក្ខលំបាករបស់ប្រជាពុទ្ធបរិស័ទក៏ជាទុក្ខលំបាករបស់ព្រះសង្ឃដែរ ព្រោះថា ព្រះសង្ឃអាស្រ័យភោជន៍និងចតុបច្ច័យពីប្រជាពុទ្ធបរិស័ទ ហេតុនេះបើពួកគាត់ជួបទុក្ខលំបាកហើយព្រះសង្ឃក៏មិនអាចនៅស្ងៀមបានដែរគឺតែងតែប្រមូលគៀរគរសម្ភារ: ស្បៀងអាហារយកមកចែកជូនទៅតាមលទ្ធភាព ដែលក្រុមព្រះសង្ឃមាន។ ក្នុងពេលប្រជាពុទ្ធបរិស័ទមានជីវភាពធូរធារ ទីអារាម និងចង្ហាន់នានាសម្រាប់ព្រះសង្ឃក៏បរិបូរណ៍ទៅតាមនោះដែរ។ ហេតុនេះទាមទារឱ្យយើងទាំងអស់គ្នាត្រូវមានចិត្តសន្តោស ជ្រោមជ្រែងញោមញាតិ ដោយព្រហ្មវិហារធម៌បួន មេត្តា ករុណា មុទិតា និងឧបេក្ខា ទៅតាមលទ្ធភាព ដែលព្រះសង្ឃអាចជួយបាន។
លោក សាម ឡន ចៅសង្កាត់សាលាកំរើក បានមានប្រសាសន៍ថ្លែងអំណរព្រះគុណនូវការយកព្រះទ័យទុកដាក់របស់ព្រះសង្ឃ និងគណ:កម្មការវត្តនេះ សម្រាប់ជួយសម្រួលដោះស្រាយការលំបាកដល់បងប្អូនប្រជាពលរដ្ឋ ដែល ពួកគាត់មួយចំនួនពិតជាជួបការលំបាកក្នុងជីវភាពប្រាកដមែន។ លោកចៅសង្កាត់បន្តថា៖ បើទោះជារាជរដ្ឋាភិបាលបើកដំណើរការប្រទេសឡើងវិញជាមួយនឹងយុទ្ធសាស្ត្រ ការរស់តាមគន្លងថ្មីជាមួយកូវីដ-១៩ក្តី ក៏គ្រួសារខ្លះនៅជួបផលប៉ះពាល់ទៅនឹងជីវភាពរបស់ពួកគាត់ផងដែរ។ តែទោះជាយ៉ាងណាក្តី ក៏អាជ្ញាធរសង្កាត់តែងតែខ្វល់ខ្វាយ និងគិតគូរគៀងគរការចូលរួមពីសប្បុរសជននានាទោះតិចក្តីច្រើនក្តី យកមកឧបត្ថម្ភជូនដល់ពួកគាត់ជាបន្តបន្ទាប់ដែរ ដោយម្តងគ្រួសារនេះបាន ម្តងគ្រួសារនោះបាន ជាដើម។ លោក សាម ឡន បានអំពាវនាវឱ្យប្រជាពលរដ្ឋទាំងអស់ត្រូវរស់ប្រកបដោយអនាម័យ ជាពិសេសរួមគ្នាអនុវត្តឱ្យបានខ្ជាប់ខ្ជួននូវសេចក្តីណែនាំរបស់រដ្ឋបាលខេត្ត សេចក្តីអំពាវនាវនានា របស់ក្រសួងសុខាភិបាល និងវិធានការរបស់រាជរដ្ឋាភិបាល ៣ការពារនិង៣កុំ ក្នុងការទប់ស្កាត់ដល់ការឆ្លងជំងឺកូវីដ-១៩។
សម្ភារ: និងស្បៀងអាហារ ក្នុងមួយគ្រួសារទទួលបាន: អង្ករ ៥០គ.ក្រ, មី ១កេស, ទឹកត្រី ២ដប, ទឹកស៊ីអុីវ ១យួរ, ត្រីខ ១២កំប៉ុង, អំបិល ១គ.ក្រ, ស្ករស ១គ.ក្រ, ទឹកសុទ្ធ ១យួរ, សម្ភារ:ផ្ទះបាយមួយឈុត និងថវិកាចំនួន ៧ម៉ឺនរៀលផងដែរ៕
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!! សូមឯកឧត្តមមេត្តាជ្រាប សូមអរគុណ ។
