លេខាធិការដ្ឋាននៃគណៈកម្មាធិការខេត្ត ប្រយុទ្ធប្រឆាំងអពើជួញដូរមនុស្ស (គ.ខ.ប.ជ) នៅព្រឹកថ្ងៃទី២៤ ខែសីហា ឆ្នាំ២០២២នេះ បានរៀបចំបើកកិច្ចប្រជុំ ប្រចាំខែសីហា ឆ្នាំ២០២២ ដើម្បីធ្វើការត្រួតពិនិត្យ និងតាមដាននូវរាល់ការអនុវត្តសកម្មភាពប្រយុទ្ធប្រឆាំងអំពើជួញដូរមនុស្សពេញ។ កិច្ចប្រជុំនេះធ្វើឡើង នៅសាលប្រជុំសាលាខេត្តសៀមរាប ក្រោមការដឹកនាំដោយលោកស្រី យូ សុភា អភិបាលរងខេត្ត និងជាអនុប្រធានអចិន្ត្រៃយ៍ គ.ខ.ប.ជ ដោយមានការចូលរួមពី តំណាងមន្ទីរអង្គភាព អភិបាលរងក្រុង អធិការក្រុង-ស្រុក និងអង្គការដៃគូជាតិ អន្តរជាតិជាច្រើនរូប។
ក្នុងកិច្ចប្រជុំនេះដែរក្រុមការងាបានធ្វើការពិនិត្យ លើសេចក្តីព្រាងរបាយការណ៍ប្រចាំខែសីហា កន្លងមកដែលអនុវត្តដោយមន្ទីរ រដ្ឋបាលក្រុង-ស្រុក និងអង្គការដៃគូ ដែលបានផ្តល់ជូនមកក្រុមការងារលេខាធិការដ្ឋាន ដើម្បីធ្វើការបូកសរុប និងដាក់ជូនអង្គប្រជុំពិនិត្យផ្ទៀងផ្ទាត់មុនដាក់ជូនទៅគណៈអភិបាលខេត្ត ក្រុមប្រឹក្សាខេត្ត និងគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ពិនិត្យបន្ត។ បន្ទាប់ពីពិនិត្យលើរបាយការណ៍រួចមក អង្គប្រជុំក៏បានពិភាក្សាលើបញ្ហាកុមារតាមម្តាយ នៅក្នុងពន្ធនាគារ ដើម្បីឱ្យកុមារទទួលបានការសិក្សាក្នុងថ្នាក់មត្តេយ្យសហគមន៍, បញ្ហានៃការផ្តល់សេវានៅមន្ទីរពេទ្យកុមារអង្គរដល់កុមារ, នីតិវិធីនៃការតាមដាន ដំណើរការរឿងក្តី នៅនីតិវិធីតុលាការ, ការរៀបចំវគ្គបណ្តុះបណ្តាលស្តីពី ការផ្តល់សេវាសាធារណៈជូនប្រជាពលរដ្ឋពាក់ព័ន្ធនឹងអត្រានុកូលដ្ឋាន និងការបន្តសុពលភាពអត្តសញ្ញណប័ណ្ណ សម្រាប់យកទៅប្រើប្រាស់ការងារប្រចាំថ្ងៃ និងបានពិភាក្សាលើការរៀបចំកិច្ចប្រជុំយុត្តិធម៌ព្រហ្មទណ្ឌ។
មានប្រសាសន៍ក្នុងឱកាសនោះ លោកស្រី យូ សុភា ប្រធានអង្គប្រជុំបានជំរុញឱ្យសមាជិកទាំងអស់ ពិសេសរដ្ឋបាលក្រុង-ស្រុក និងអង្គការដៃគូពាក់ព័ន្ធ ត្រូវបង្កើនការត្រួតពិនិត្យ និងយកចិត្តទុកដាក់ឲ្យបានខ្ពស់ ទៅលើកុមារក្រីក្រ ពិសេសកុមារដែលទើបវិលត្រឡប់មកពីការធ្វើចំណាកស្រុកពីក្រៅប្រទេស ដោយជំរុញឲ្យគណៈកម្មការទ្រទ្រង់សាលាជួបប្រជុំជាមួយអាណាព្យាបាល ដើម្បីពិនិត្យទៅលើការចូលរួមជាបដិភាគរបស់អាណាព្យាបាល សម្រាប់គាំទ្រលើអាហារពេលព្រឹកសម្រាប់កុមារ និងសម្ភារសិក្សាកុមារនៅតាមសាលារៀន។ ជាមួយគ្នានោះដែរ ក៏សូមឲ្យអ្នកពាក់ព័ន្ធទាំងអស់ ត្រូវត្រួតពិនិត្យការងារឲ្យច្បាស់លាស់ ជាពិសេសបញ្ហាតួលេខនីមួយៗ ពាក់ព័ន្ធនឹងករណីអ្វីមួយដែលបានកើតឡើងកន្លងមក យើងត្រូវស្គាល់ឲ្យច្បាស់ ពីតួនាទីរៀងៗខ្លួន ដើម្បីងាយស្រួលក្នុងការសហការណ៍គ្នាបានល្អប្រសើរថែមទៀត៕
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
