វគ្គបណ្ដុះបណ្ដាលជំនាញឌីជីថលចាំបាច់ ជូនមន្ត្រីរាជការក្នុងខេត្តសៀមរាប សរុបចំនួន ១០៦នាក់ មកពី៣០មន្ទីរ-អង្គភាព ដែលមានរយៈពេល ៨៨ម៉ោង សិក្សាតាមរយៈប្រព័ន្ធអនឡាញ(Google meet) និងសិក្សាផ្ទាល់រយៈពេល ៥ថ្ងៃ ចាប់ពីថ្ងៃទី២២ ដល់២៦ ខែសីហា ឆ្នាំ២០២២ បានបញ្ចប់ហើយនៅរសៀលនេះ។
វគ្គបណ្ដុះបណ្ដាល សហការរៀបចំដោយមន្ទីរប្រៃសណីយ៍ និងទូរគមនាគមន៍ ខេត្តសៀមរាប និង វិទ្យាស្ថានអភិបាលកិច្ចឌីជីថលនៃបណ្ឌិត្យសភាឌីជីថលកម្ពុជានេះ បង្កើតឡើងក្នុងគោលបំណង កសាងមូលធនមនុស្សឌីជីថលឆ្លើយតបទៅនឹងតម្រូវការការងារបច្ចុប្បន្ន និងអនាគត ដែលស្របតាមតម្រូវការ និងនិន្នាការវិវត្តន៍នៃបច្ចេកវិទ្យាពិភពលោក។ ជាមួយនោះ ការជំរុញអក្ខរកម្មឌីជីថល និងធ្វើឲ្យប្រសើរឡើងនៃការសិក្សាជំនាញឌីជីថល នឹងជួយគាំទ្រដល់ការអនុវត្តក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ និងគោលនយោបាយរដ្ឋាភិបាលឌីជីថលកម្ពុជា ២០២២-២០៣៥ ដែលគោលនយោបាយនេះ មានចក្ខុវិស័យ អភិវឌ្ឍន៍វិស័យឌីជីថលឱ្យក្លាយជាកម្លាំងចលករជំរុញល្បឿនបរិវត្តកម្មរដ្ឋាភិបាល សេដ្ឋកិច្ច និងសង្គមឌីជីថល ដើម្បីលើកកម្ពស់នវានុវត្តន៍ ឧត្តមភាពប្រកួតប្រជែងនៅលើឆាកអន្តរជាតិ និងការអភិវឌ្ឍប្រកបដោយម្ចាស់ការ ចីរភាព និងបរិយាបន្ន។
ថ្លែងក្នុងវគ្គបណ្ដុះបណ្ដាលនេះ លោក សុខ សីហា ប្រធានមន្ទីរប្រៃសណីយ៍ និងទូរគមនាគមន៍ ខេត្តសៀមរាប បានឱ្យដឹងថា នេះលើកទី៣ហើយ សម្រាប់ការបណ្តុះបណ្តាលជំនាញឌីជីថលចាំបាច់ ជូនមន្ត្រីរាជការក្នុងខេត្តសៀមរាប ក្រោមការយកចិត្តទុកដាក់របស់ថ្នាក់ដឹកនាំក្រសួងប្រៃសណីយ៍ និងទូរគមនាគមន៍ និងបណ្ឌិត្យសភាឌីជីថលកម្ពុជា សហការជាមួយមន្ទីរប្រៃសណីយ៍ និងទូរគមនាគមន៍ ខេត្តសៀមរាប។ ជាមួយនឹងចំណេះឌីជីថលនេះដែរ នឹងចូលរូមអភិវឌ្ឍបុគ្គលខ្លួនឯង ឱ្យដើរស្របតាមអភិបាលកិច្ចឌីជីថលនៅកម្ពុជា និងជួយគាំទ្រដល់ការអនុវត្តក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ និងគោលនយោបាយរដ្ឋាភិបាលឌីជីថលកម្ពុជា ២០២២-២០៣៥។
សូមជម្រាបថាវគ្គបណ្តុះបណ្តាលនេះសិក្សាលើ ១៣មុខវិជ្ជានិងបែងចែកជា ៣ម៉ូឌុល ដូចជា៖
-ម៉ូឌុល A1៖ជាកម្មវិធីអក្ខរកម្មឌីជីថល គឺការយល់ដឹងលើការប្រើប្រាស់និងការថែទាំកុំព្យូទ័រ ទាំងឧបករណ៍ កម្មវិធី និងមុខងារជាច្រើននៅលើអ៊ីនធឺណែត ចេះកំណត់អត្តសញ្ញាណ ស្វែងរកវាយតម្លៃនិងប្រើប្រាស់ព័ត៌មានប្រកបដោយប្រសិទ្ឋភាពថែមទាំងយល់ដឹងអំពីវិធីការពារសុវត្ថិភាព និងឯកជនភាពរបស់ខ្លួននិងអ្នកដទៃ។
-ម៉ូឌុល A2៖ ជាកម្មវិធីឌីជីថលសម្រាប់ការងាររដ្ឋបាល ជាកម្មវិធីឱ្យអ្នកសិក្សាចេះបង្កើតនិងរៀបចំឯកសារ តារាងបញ្ជីនិងបច្ចេកទេសវិភាគទិន្នន័យបានល្អ លឿន និងមានប្រសិទ្ឋិភាពខ្ពស់ដោយប្រើប្រាស់កម្មវិធីក្នុងកុំព្យូទ័រ ទូរស័ព្ទឆ្លាតSmart phone និងបច្ចេកវិទ្យាក្លោដ (Cloud)ព្រមទាំងជំនាញក្នុងការបង្កើតមាតិកាឌីជីថល។
-ម៉ូឌុល A3៖សេដ្ឋកិច្ចឌីជីថល ជាកម្មវិធី ទទួលបានចំណេះដឹងសំខាន់ៗយ៉ាងទូលំទូលាយអំពីការប្រើប្រាស់បច្ចេកវិទ្យាឌីជីថល រួមទាំងគោលនយោបាយ អភិបាលកិច្ចឌីជីថល និងរដ្ឋាភិបាលឌីជីថលសម្រាប់អភិវឌ្ឍសង្គម-សេដ្ឋកិច្ចកម្ពុជា។
អត្ថបទ និង រូបភាព៖ លោក យូ វង្ស
កែសម្រួល៖ លោក សេង ផល្លី
