នៅព្រឹកថ្ងៃទី២៦ ខែសីហា ឆ្នាំ២០២២ ក្រុមការងារឥស្សរជនឆ្នើមថ្នាក់ជាតិ សាខាសៀមរាប បានចុះជួបសួរសុខទុក្ខ និងនាំយកអំណោយមនុស្សធម៌ប្រគល់ជូនដល់អ្នកផ្ទុកមេរោគអេដស៍ចំនួន១២នាក់ ក្នុងនោះស្រី៦នាក់ មកពីឃុំចំនួន៥ នៃស្រុកស្រីស្នំ។
មានប្រសាសន៍នៅទីស្នាក់ការអនុសាខាកាកបាទក្រហមកម្ពុជា ស្រុកស្រីស្នំ ឯកឧត្តមវេជ្ជបណ្ឌិត ក្រុស សារ៉ាត់ សមាជិកគណៈកម្មាធិការសាខាកាកបាទក្រហមកម្ពុជា ខេត្តសៀមរាប និងសហការី ក្នុងនាមក្រុមការងារឥស្សរជនឆ្នើមថ្នាក់ជាតិ សាខាសៀមរាប បាននាំយកនូវប្រសាសន៍សួរសុខទុក្ខ របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិនៃវេទិកាភាពជាអ្នកដឹកនាំប្រចាំតំបន់អាស៊ី-ប៉ាស៊ីហ្វិក ឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា និងឯកឧត្តម ទៀ សីហា ប្រធានគណៈកម្មាធិការសាខា ជូនដល់បងប្អូនអ្នកផ្ទុកមេរោគអេដស៍ និងអ្នកជំងឺអេដស៍ ព្រមជាមួយការក្រើនរំលឹកដល់បងប្អូនទាំងអស់បន្តថែរក្សាសុខភាពផ្ទាល់ខ្លួន រស់នៅដោយមានអនាម័យ និងទៅទទួលសេវាថែទាំ និងព្យាបាលដោយថ្នាំប្រឆាំងមេរោគអេដស៍ឱ្យបានទៀងទាត់ពេលវេលា នៅតាមមណ្ឌលសុខភាព ឬមន្ទីរពេទ្យបង្អែកខេត្តសៀមរាប តាមការណាត់របស់លោកគ្រូពេទ្យ។
ឆ្លៀតក្នុងឱកាសនោះ ក្រុមប្រតិបត្តិសាខា ក៏បានធ្វើការផ្សព្វផ្សាយនូវសារចំនួន ៦ចំណុចរបស់ឥស្សរជនឆ្នើមថ្នាក់ជាតិមាន ដើម្បីបញ្ឈប់ការរើសអើងអ្នកមានផ្ទុកមេរោគអេដស៍ ជំងឺអេដស៍ និងសមាជិករបស់ពួកគេ និងបញ្ជ្រាបការយល់ដឹងពីការចម្លងមេរោគអេដស៍ និងជំងឺផ្សេងៗទៀត រួមមាន៖
១. ប្រជាពលរដ្ឋ យុវជន និងយុវនារី ត្រូវស្វែងយល់ចំណេះដឹងថ្មីៗពីការចម្លងមេរោគអេដស៍ ក្នុងគ្រួសារ សហគមន៍ និងសង្គមជាតិ ដើម្បីបញ្ចប់ជំងឺអេដស៍នៅឆ្នាំ២០២៥ តាមការគ្រោងទុក។
២. ក្នុងករណីសង្ស័យថាបានប្រឈម នឹងការឆ្លង ត្រូវស្វែងរកសេវាផ្តល់ប្រឹក្សា និងសេវាធ្វើតេស្តឈាម ដើម្បីទទួលបានសេវាថែទាំ និងព្យាលទាន់ពេលវេលា។
៣. ចំពោះស្រ្តីមានផ្ទៃពោះត្រូវស្វែងរកសេវាថែទាំ និងពិនិត្យផ្ទៃពោះឲ្យបានត្រឹមត្រូវ និងទៀងទាត់តាមការណែនាំរបស់បុគ្គលិកពេទ្យ។
៤. ត្រូវបញ្ចប់ការរើសអើងគ្រប់រូបភាពចំពោះអ្នកផ្ទុកមេរោគអេដស៍ និងអ្នកជំងឺអេដស៍
៥. ត្រូវការពារជាប្រចាំតាមរយៈការប្រើប្រាស់ស្រោមអនាម័យចំពោះប្រជាពលរដ្ឋទាំងឡាយដែលមានមុខរបរប្រឈមខ្ពស់នឹងការឆ្លងមេរោគអេដស៍។
៦.ទន្ទឹមនឹងនោះសូមបងប្អូនប្រជាពលរដ្ឋយកចិត្តទុកដាក់ចំពោះជំងឺរាតត្បាតជាសកលកូវីដ-១៩ ហើយត្រូវការពារឲ្យបានខ្ជាប់ខ្ជួនរស់នៅតាមគន្លងប្រក្រតីភាពថ្មី ប្រកាន់ខ្ជាប់នូវវិធានការសុខាភិបាល”៣ការពារ ៣កុំ” និងចូលរួមចាក់វ៉ាក់សាំងបង្ការជំងឺកូវីដ-១៩ ដូសមូលដ្ឋាន និងដូសជំរុញឲ្យបានគ្រប់ៗគ្នា។ ក្នុងរដូវគ្រុនឈាមនេះគ្រួសារនីមួយៗ ត្រូវប្រុងប្រយ័ត្នកុមារតូចៗកុំឲ្យមូសខ្លាខាំ ពេលថ្ងៃត្រូវដេកក្នុងមុង ត្រូវអនាម័យលំនៅដ្ឋាន ជុំវិញផ្ទះដើម្បីបំបាត់ជម្រកមូសខ្លា។
សូមជម្រាបថា អំណោយមនុស្សធម៌ ដែលបានផ្តល់ជូនអ្នកផ្ទុកមេរោគអេដស៍នីមួយៗមាន៖ មុង១ ភួយ១ សារុង១ ក្រមា១ អាវយឺត២ អង្ករ៣០គីឡូក្រាម មី១កេស ត្រីខ១យួរ ទឹកត្រី១យួរ និងថវិកា៥ម៉ឺនរៀល៕
អត្ថបទ និង រូបភាព៖ សាខាកាកបាទក្រហមកម្ពុជាខេត្តសៀមរាប
កែសម្រួល៖ លោក សេង ផល្លី
