គណៈបញ្ជាការឯកភាពរដ្ឋបាលខេត្តសៀមរាប នៅព្រឹកថ្ងៃទី២៩ ខែសីហា ឆ្នាំ២០២២ បានបើកកិច្ចប្រជុំមួយដើម្បីធ្វើការពិនិត្យពិភាក្សាទៅលើបញ្ហាមួយចំនួនក្នុងខេត្ត ជាពិសេសបញ្ហានៃការប្រមូលផ្តុំរបស់ប្រជាពលរដ្ឋជាង ១ម៉ឺននាក់ ដែលជាអ្នកគាំទ្រលើ លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ ដោយបានបំផុសបំផុលប្រជាពលរដ្ឋទាំងក្នុង និងក្រៅប្រទេស ថានឹងមានគ្រោះរញ្ជួយផែនដី កើតមានទឹកជំនន់ក្នុងពេលឆាប់ៗនេះ ដោយឱ្យប្រជាពលរដ្ឋ នាំគ្នាប្រញាប់ប្រញ៉ាល់រត់មកជ្រកកោននៅម្តុំដីចំការរបស់ខ្លួន ស្ថិតនៅភូមិសសី ឃុំត្បែង ស្រុកបន្ទាយស្រី ខេត្តសៀមរាប។
កិច្ចប្រជុំនេះធ្វើឡើងក្រោមអធិបតិភាពឯកឧត្តម ទៀ សីហា អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តសៀមរាប ដោយមានការចូលរួមពីសំណាក់ ឯកឧត្តម លោកជំទាវ លោក លោកស្រី អភិបាលរងខេត្ត, ថ្នាក់ដឹកនាំស្ថាប័នក្នុងខេត្ត, នាយក នាយករងរដ្ឋបាលសាលាខេត្ត , នាយក-នាយករងទីចាត់ការសាលាខេត្ត, មេបញ្ជាការ មេបញ្ជាការរងកងកម្លាំងប្រដាប់អាវុធទាំងបី, អភិបាលក្រុង ស្រុក ប្រធាន-អនុប្រធានមន្ទីរ អង្គភាពជុំវិញខេត្ត និងមន្ត្រីពាក់ព័ន្ធជាច្រើនរូប។
គួររំលឹកថា កាលពីថ្ងៃទី២៦ ខែសីហា ឆ្នាំ២០២២ លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ បានបំផុសបំផុលប្រជាពលរដ្ឋទាំងក្នុង និងក្រៅប្រទេស ថានឹងមានគ្រោះរញ្ជួយផែនដី កើតមានទឹកជំនន់ក្នុងពេលឆាប់ៗនេះ ដោយឱ្យប្រជាពលរដ្ឋ នាំគ្នារត់មកជ្រកកោននៅម្តុំដីចំការរបស់ខ្លួន ក្នុងស្រុកបន្ទាយស្រី ហើយមកដល់ពេលនេះមិនទាន់រំសាយនៅឡើយទេ ដែលនេះជាហេតុបង្កការព្រួយបារម្ភដល់គណៈបញ្ជាការឯកភាពរដ្ឋបាលខេត្តអំពីសុខទុក្ខ សុខុមាលភាពរបស់ប្រជាពលរដ្ឋនិងបរិស្ថាន អនាម័យសាធារណៈទូទៅផងដែរ ដែលទាមទារចាំបាច់ អាជ្ញាធរ សមត្ថកិច្ចនិងមន្ត្រីជំនាញពាក់ព័ន្ឋគ្រប់លំដាប់ថ្នាក់ ត្រូវយកចិត្តទុកដាក់ និងសហការគិតគូរដោះស្រាយ។
ជាក់ស្ដែងកាលពីថ្ងៃទី២៧ ខែសីហានេះ ឯកឧត្តមាន ទៀ សីហា រួមនឹងឯកឧត្តម ហ៊ុន ម៉ានិត អគ្គនាយកនៃអគ្គនាយកដ្ឋានស្រាវជ្រាវចារកិច្ចនៃក្រសួងការពារជាតិ បានចុះទៅពិនិត្យម្ដងមកហើយ ព្រមទាំងបានបណែនាំឲ្យលោក ខឹម វាសនា បញ្ឈប់សកម្មភាពជួបជុំ និងប្រមូលផ្ដុំក្រុមប្រជាពលរដ្ឋនោះជាបន្ទាន់ ក៏ប៉ុន្តែការណែនាំនោះ ត្រូវបានលោក ខឹម វាសនាបដិសេធ ដោយស្នើសុំពន្យាពេលរហូតដល់ថ្ងៃទី៣០ ខែសីហា ឆ្នាំ២០២២។ ជាមួយគ្នាណោះដែរ ឯកឧត្តម ទៀ សីហា បានចាត់ទុកសកម្មភាពរបស់លោក ខឹម វាសនា ថាកំពុងធ្វើឲ្យប្រជាពលរដ្ឋចលាចល និងខាតបង់ប្រយោជន៍ផ្ទាល់ខ្លួន នៅទន្ទឹមដែលមានពលករខ្មែរ នៅកូរ៉េរាប់ពាន់នាក់ បានសម្រុកមកជួបជុំតាមការលើកឡើងរបស់លោកនេះ។
ក្នុងកិច្ចប្រជុំនោះដែរ ឯកឧត្តមអភិបាលខេត្ត បានជំរុញដល់គ្រប់អង្គភាពមន្ទីរស្ថាប័ន សហការរួមគ្នាផ្អែកលើជំនាញដើម្បីពិនិត្យទៅលើទិដ្ឋភាពផ្នែកច្បាប់ សុខុមាលភាពសង្គម អនាម័យបរិស្ថានសាធារណៈ បញ្ហាជំងឺរាតត្បាត និងផលប៉ះពាល់សំខាន់ៗជាច្រើនទៀត ព្រោះធ្វឲ្យអ្នកចូលរួមអាចខាតបង់ពេលវេលា ប្រកបអាជីវកម្ម ខាតបង់ការសិក្សារបស់កូនចៅពួកគាត់ជាដើម។ល។ ក្នុងនោះគណបញ្ជាការឯកភាពរដ្ឋបាលខេត្តសៀមរាបនឹងត្រៀម ដើម្បីរៀបចំវិធានការច្បាប់ប្រឆាំងនឹងសកម្មភាពប្រមូលផ្ដុំ របស់ក្រុមលោក ខឹម វាសនា បើប្រសិនជាហួសពេលកំណត់ហើយមិនព្រមរំសាយទេនោះ។
អត្ថបទ និងរូបភាព៖ លោក យូ វង្ស ,លោក ស៊ាន សុផាត
កែសម្រួល៖ លោក អ៊ុន ណារាជ្យ
