ប្រជាពលរដ្ឋក្រីក្រលំបាកទាំងជីវភាពប្រចាំថ្ងៃ និងគ្មានផ្ទះសម្បែងជ្រកកោនមួយគ្រួសារ ស្ថិតក្នុងភូមិពាក់ស្នែងថ្មី ឃុំពាក់ស្នែង ស្រុកអង្គរធំ ខេត្តសៀមរាប ទទួលបានផ្ទះមួយខ្នងរបស់គម្រោងនិរន្តរភាពសហគមន៍របស់សមាគមជីវិត និងក្តីសង្ឃឹម ក្រោមការឧបត្ថម្ភថវិកាពីសប្បុរសជនមួយក្រុមពីសហរដ្ឋអាមេរិក ដែលមានឈ្មោះថា “ទាំងអសគ្នាយើងអាចផ្លាស់ប្តូរពិភពលោក (Together We Can Change the World)” ដឹកនាំដោយលោក ស្កត់ ហ្វ្រៃម៉ែន (Scott Friedman) ដោយចំណាយថវិកាសរុបចំនួន ២,០០០ដុល្លារអាមេរិក។
សូមជម្រាបថា ផ្ទះដែលបានប្រគល់ជូនប្រជាពលរដ្ឋនេះ មានទំហំ ៥x៧ម៉ែត្រ សង់អំពីស៊ីម៉ង់ និងឥដ្ឋផ្ទាល់ដី ប្រក់សង្កសីសាងសង់នៅលើទីតាំងដីដែលមានស្រាប់ ក្រោយពីចំណាយពេល ៥ថ្ងៃ បានសាងសង់រួចរាល់ជាស្ថាពរ នឹងធ្វើការប្រគល់ជូនដល់គ្រួសារលោក ស៊ីន ឌី អ្នកស្រី ម៉ី អ៊ាន ដែលជាគ្រួសារក្រីក្រ និងមានមុខរបរមិនច្បាស់លាស់ នៅភូមិពាក់ស្នែងថ្មី ឃុំពាក់ស្នែង ស្រុកអង្គរធំ នារសៀលថ្ងៃទី២៨ ខែសីហា ឆ្នាំ២០២២ ក្រោមការនិមន្តចូលរួមពីព្រះសង្ឃ ដែលជាក្រុមការងារសមាគម អាជ្ញាធរមូលដ្ឋាន និងអ្នកជិតខាងជាច្រើននាក់។
ព្រះភិក្ខុធម្មទិន្នោ ឡម លឿម នាយកប្រតិបត្តិសមាគមជីវិត និងក្តីសង្ឃឹម មានសង្ឃដីការថា ការដាក់ឈ្មោះផ្ទះនេះថា ផ្ទះសន្តិភាព ដោយមានគោលបំណងឱ្យសមាជិកគ្រួសារ ជាពិសេសឪពុក និងម្តាយ និងអាណាព្យាបាលដែលជាអ្នកឃុំគ្រងគ្រួសារ រស់នៅដោយភាពសុខដុមរមនា គ្មានអំពើហិង្សា និងគ្មានការប្រព្រឹត្តល្បែងពាលាផ្សេងៗ ជាគ្រួសារដែលពោរពេញដោយក្តីស្រឡាញ់ គោរពឱ្យតម្លៃ នឹងចេះមើលថែរក្សាគ្នាដោយល្អពោល គឺជាគ្រួសារពោរពេញដោយសុភមង្គលនិងសន្តិភាព។
ព្រះអង្គបានបញ្ជាក់ថា ដើម្បីទទួលបានផ្ទះគ្រួសារនោះ ត្រូវគោរពលក្ខខណ្ឌរបស់សមាគមចំនួន៦ គឺ ១.ត្រូវឈប់ ឬកាត់បន្ថយការសេពក្រឿងស្រវឹង, ២.ត្រូវឈប់ប្រព្រឹត្តអំពើហិង្សាក្នុងគ្រួសារប្រសិនបើធ្លាប់មានប្រព្រឹត្តកន្លងមក, ៣.បើធ្លាប់ប្រព្រឹត្តល្បែងស៊ីសង និងអំពើអបាយមុខផ្សេងៗ ត្រូវបញ្ឈប់ជាបន្ទាន់, ៤.ត្រូវខិតខំធ្វើការងាររកចំណូលផ្គត់ផ្គង់គ្រួសារ, ៥.ត្រូវបញ្ជូនកូនឱ្យទៅរៀនឱ្យបានគ្រប់គ្នា អប់រំទូន្មានកូន លើកទឹកចិត្តកូនៗឱ្យខិតខំសិក្សារៀនសូត្រ និង៦.ត្រូវចេះសម្អាតបរិស្ថានក្នុង និងក្រៅផ្ទះឱ្យបានស្អាតជាប្រចាំ។ លុះគ្រួសារគោរពតាមលក្ខខណ្ឌនេះបានល្អទើបសមាគមសម្រេចសាងសង់ផ្ទះជូន។
គួរឲ្យដឹងថា គិតចាប់ពីឆ្នាំ២០០៥មកដល់ពេលនេះ ក្នុងស្រុកអង្គរធំ ទទួលបានផ្ទះពីសមាគមជិវិត និងក្តីសង្ឃឹម ចំនួន ៣៥ខ្នងហើយ ព្រោះស្រុកអង្គរធំនេះ ស្ថិតនៅក្នុងគោលដៅអាទិភាពរបស់គម្រោងសមាគមផងដែរ៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
