ថ្ងៃទី២៥ ខែសីហា ឆ្នាំ២០២២ នៅសណ្ឋាគារអង្គរប៉ារ៉ាឌី ខេត្តសៀមរាប អាជ្ញាធរសវនកម្មជាតិមានរៀបចំសិក្ខាសាលាស្តីពី “ការផ្សព្វផ្សាយច្បាប់ស្តីពីសវនកម្ម និងស្តង់ដារសវនកម្មសាធារណៈ នៃព្រះរាជាណាចក្រកម្ពុជា” ជូនថ្នាក់ដឹកនាំ និងមន្ត្រី នៅតាមមន្ទីរជំនាញ និងអង្គភាពពាក់ព័ន្ធ ព្រមទាំងកងកម្លាំងប្រដាប់អាវុធ និងថ្នាក់ដឹកនាំក្រុង/ស្រុក និង ឃុំ/សង្កាត់ នៃរដ្ឋបាលខេត្តសៀមរាប សរុបចំនួន ១៨២ នាក់ ក្រោមអធិបតីភាព ឯកឧត្តមបណ្ឌិត សួន សិទ្ធី អគ្គសវនកររង និងតំណាងលោកជំទាវបណ្ឌិត សោម គីមសួគ៌ អគ្គសវនករ នៃអាជ្ញាធសវនកម្មជាតិ និង មានការចូលរួមពី ឯកឧត្តម លី ទឹង សមាជិកក្រុមប្រឹក្សាខេត្ត និង លោក អ៊ឹង គឹមលាង អភិបាលរងខេត្តសៀមរាប។
ថ្លែងក្នុងឱកាសនោះ លោក អ៊ឹង គឹមលាង លើកឡើងថា សម្រាប់រដ្ឋបាលខេត្តសៀមរាប ការរៀបចំសិក្ខាសាលានាពេលនេះគឺជាឱកាសដ៏វិសេសមួយ ក្នុងការស្វែងយល់អំពី ច្បាប់ និងស្តង់ដារសវនកម្មសាធារណៈ នៃព្រះរាជាណាចក្រម្ពុជា ដើម្បីរួមចំណែកធ្វើទំនើបកម្មសវនកម្មលើវិស័យសាធារណៈ ក្នុងគោលដៅចូលរួមពង្រឹងសមត្ថភាពស្ថាប័ន និងបង្កើនជំនឿទុកចិត្តពីអង្គភាពរងសវនកម្ម និងសាធារណរជន។
ក្នុងរដ្ឋបាលខេត្ត លោកអភិបាលរងខេត្ត តាមរយៈសិក្ខាសាលានេះ លោកជឿជាក់ថា សិក្ខាកាម នឹងខិតខំស្វែងយល់នូវចំណុចសំខាន់ៗ និងដកស្រង់យកបទពិសោធន៍ថ្មីៗពីច្បាប់នេះ សម្រាប់យកទៅអនុវត្តន៍ជាក់ស្ដែងនៅក្នុងអង្គភាពរបស់ខ្លួន ឱ្យកាន់តែមានប្រសិទ្ធភាពខ្ពស់។
ថ្លែងបើកសិក្ខាសាលានេះ ឯកឧត្តមបណ្ឌិត សួន សិទ្ធី គូសបញ្ជាក់ថា អង្គសិក្ខាសាលានាពេលនេះ មានគោលដៅចូលរួមពង្រឹងនិងបង្កើនសមត្ថភាព ដល់មន្ត្រីរាជការដែលបំពេញការងារនៅរដ្ឋបាលថ្នាក់ក្រោមជាតិ ដើម្បីគាំទ្រយន្តការអនុវត្តការងារសវនកម្មប្រកបដោយកម្លាភាព គណនេយ្យភាព ប្រសិទ្ធភាព និងស័ក្កសិទ្ធភាព ក្នុងការសម្រេចគោលបំណងធ្វើឱ្យមានអភិបាលកិច្ចល្អ និងចូលរួមចំណែកកាត់បន្ថយ និងទប់ស្កាត់នូវរាល់កំហុសឆ្គងលើការគ្រប់គ្រង និងប្រើប្រាស់ថវិកាជាតិ ការគ្រប់គ្រងធនធាន ទ្រព្យសម្បត្តិរដ្ឋដើម្បីឈានទៅបង្កើនជំនឿទុកចិត្តពីប្រជាពលរដ្ឋ។ ឯកឧត្តមបន្ថែមថា ការរៀបចំសិក្ខាសាលាផ្សព្វផ្សាយ នៅក្នុងខេត្តសៀមរាប មិនមែនឃាលើកទី១នោះទេ ហើយក៏មិនមែនធ្វើតែម្តងចប់នោះដែរ ។ ការផ្សព្វផ្សាយច្បាប់ត្រូវធ្វើជាប្រចាំ សំដៅជំរុញ ក្រើនរម្លឹកដល់អ្នកដែលអនុវត្តការងារប្រចាំថ្ងៃអាចចៀសផុតពីកំហុសឆ្គង។
មានមតិក្នុងឱកាសនោះដែរ ឯកឧត្តមបណ្ឌិត ព្រហ្ម វិចិត្រសុភ័ណ្ឌ អគ្គលេខាធិការរង និងជាគ្រូឧទ្ទេសនាមនៃអាជ្ញាធរសវនកម្មជាតិ បានលើកឡើងនូវ ៤ ចំណុច សំខាន់ៗ រួមមាន៖ ទី១-សាវតាស្ថាប័នអាជ្ញាធរ សវនកម្មជាតិ ទី២-ហេតុអ្វីត្រូវមានច្បាប់ស្តីពីសវនកម្មនៃព្រះរាជាណាចក្រកម្ពុជា ទី៣-ខ្លឹមសារនៃច្បាប់សវនកម្មនៃព្រះរាជាណាចក្រកម្ពុជា និង ទី៤-ស្តង់ដារសវនកម្មសាធារណៈនៃព្រះរាជាណាចក្រកម្ពុជា ជូនដល់សិក្ខាម។
គួរំលឹកផងដែរថា អាជ្ញាធរសវនកម្មជាតិ គឺជាស្ថាប័នសាធារណៈឯករាជ្យអំពីកិច្ចប្រតិបត្តិការការងារនិងមានភារកិច្ចធ្វើការត្រួតពិនិត្យ និងផ្តល់អនុសាសន៍កែតម្រូវ លើរាល់កំហុសឆ្គងរបស់អង្គភាពរងសវនកម្មព្រមទាំងធ្វើរបាយការណ៍ស្តីពីលទ្ធផលការងារ ជូនស្ថាប័ននីតិបញ្ញត្តិ ពោលគឺ រដ្ឋសភា និងព្រឹទ្ធសភា និងចម្លងជូនរាជរដ្ឋាភិបាល និងរបាយការណ៍សវនកម្មត្រូវបានផ្សព្វផ្សាយជាសាធារណៈ។
អត្ថបទ និង រូបភាព៖ លោក យូ វង្ស និង លោក ជា ស្រស់
កែសម្រួល៖ លោក សេង ផល្លី
