ប្រជាពលរដ្ឋជាច្រើនគ្រួសារដែលមានលំនៅឋានក្នុងតំបន់រមណីយដ្ឋានអង្គរ បានបង្ហាញការពេញចិត្ត និងផ្ដល់កិច្ចសហការល្អ ជាមួយក្រុមការងារតម្រង់ទិស ក្នុងការវាស់វែងកំណត់ព្រំដីរបស់ខ្លួន ដែលបានស្នាក់នៅកន្លងមក ជាពិសេសពួកគាត់ក៏បង្ហាញការពេញចិត្តចំពោះទីតាំងថ្មី ដែលអាជ្ញាធរបានរៀបចំឲ្យពួកគាត់ សម្រាប់ជាការសាងសង់លំនៅដ្ឋានថ្មី ដែលជាការដោះដូរចេញពីតំបន់ឧទ្យានអង្គរ។
ប្រជាពលរដ្ឋ រស់នៅក្នុងភូមិបន្ទាយឈើ សង្កាត់ទឹកវិល ជាប់នឹងតំបន់បារាណ៍ខាងលិច នៅថ្ងៃទី២៣ ខែសីហា បានលើកឡើងថា ពួកគាត់រស់នៅក្នុងភូមិនេះ តាមរយៈការផ្ទេរកេរមរតកដីធ្លីពីឪពុកម្ដាយក្រោយឆ្នាំ១៩៧៩ ហើយអ្នកខ្លះមកដល់ពេលនេះ រស់នៅជាង ១០ឆ្លាំ ខ្លះរហូត ៤០ឆ្នាំមកហើយ ដោយមិនបានទិញ ពីក្រុមឈ្មួញនោះទេ។ ពួកគាត់ថា អ្នកភូមិខ្លះមានតែដីផ្ទះ និងខ្លះទៀតមានទាំងដីផ្ទះ និងដីស្រែ ប៉ុន្ដែបើអាជ្ញាធរតម្រូវឱ្យមានការដោះដូរ ពួកគាត់ក៏ពេញចិត្ដ ប៉ុន្ដែសូមឲ្យមានភាពសមស្របណាមួយ ដើម្បីឱ្យពួកគាត់មានមុខរបរ ការបង្កបង្កើនផលផ្សេងៗ ដើម្បីចិញ្ចឹមជីវិតគ្រួសារផង។
បើយោងតាមសេចក្ដីប្រកាសព័ត៌មានរបស់ក្រសួងដែនដី នគររូបនីយកម្ម និងសំណង់ នៅថ្ងៃទី២៤ ខែសីហា ឆ្នាំ២០២២នេះបានបង្ហាញថា អនុវត្តតាមសេចក្តីសម្រេច របស់រាជរដ្ឋាភិបាលលេខ ២៦ សសរ ចុះថ្ងៃទី១៨ ខែមេសា ឆ្នាំ២០២២ ស្ដីពីការបង្កើតក្រុមការងារតម្រង់ទិស ដើម្បីដោះស្រាយបញ្ហាសំណង់ខុសច្បាប់ និងដីធ្លី ក្នុងតំបន់រមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា ក្រសួងរៀបចំដែនដី បានចាត់បញ្ចូនក្រុមការងារបច្ចេកទេសចំនួន ៦៨ក្រុម ដែលមានមន្ត្រីជំនាញសរុប ៧៨១រូប ចុះសហការជាមួយមន្ត្រីរបស់ក្រសួងវប្បធម៌ និងវិចិត្រសិល្បៈ ចំនួន ៣៥២រូប ដោយសហការជាមួយមន្ត្រីមូលដ្ឋាន ចំណុះរដ្ឋបាលខេត្តសៀមរាប ដើម្បីចុះវាស់វែង កំណត់និយាមកាក្បាលដី និងអត្តសញ្ញាណអ្នកកាន់កាប់ដី និងសំណង់ខុសច្បាប់ក្នុងតំបន់រមណីយដ្ឋានអង្គរ និងតំបន់ដទៃទៀតស្ថិតក្រោមការគ្រប់គ្រងរបស់អាជ្ញាធរជាតិអប្សរា។
សេចក្ដីប្រកាសដដែលបានបញ្ជាក់ថា គិតចាប់ពីថ្ងៃទី១៨ ដល់ថ្ងៃទី២៣ ខែសីហា ឆ្នាំ២០២២នេះ ក្រុមការងារបច្ចេកទេសបានធ្វើការវាស់វែងក្បាលដីបានចំនួន ២០.០៣១ក្បាលដី ក្នុងនោះក្បាលដីមានសំណង់ចំនួន ១២.៣១៥ក្បាលដី, ក្បាលដីគ្មានសំណង់ចំនួន ៦.៧៣៧ក្បាលដី មានទំហំសរុប ៤០.១១៨ហិកតា នៃទីតាំងទាំងបី ដែលស្ថិតក្រោមការគ្រប់គ្រងរបស់អាជ្ញាធរជាតិអប្សរា។ ជាមួយគ្នានោះក្រុមការងារបច្ចេកទេស បានរកឃើញអ្នកសាងសង់ និងកាន់កាប់ដី ចំនួន ១៧.៣២២ គ្រួសារ ប្រជាពលរដ្ឋស្ម័ត្រចិត្តរុះរើតួបលក់ដូរសរុបចំនួន ៤៤តូប ក្នុងនោះ ៣៤តូបលក់វត្ថុអនុស្សាវរីយ៍។ លិខិតដដែលបានបន្ថែមថា ប្រជាពលរដ្ឋដែលបានតាំងទីលំនៅខុសច្បាប់សរុបចំនួន ៦៨៩គ្រួសារ បានស្ម័គ្រចិត្តទៅរស់នៅតំបន់ថ្មី ក្នុងភូមិធម្មជាតិរុនតាឯក មាន ២៣៤គ្រួសារ ស្ថិតនៅភូមិទក្សិណត្បូង និង ៤៥៥គ្រួសារ ស្ថិតនៅភូមិត្រពាំងសេះ ហើយពួកគាត់នឹងត្រូវចូលរួមចាប់ឆ្នោតទទួលយកដីក្នុងទីតាំងថ្មី នាព្រឹកថ្ងៃទី២៥ ខែសីហា ឆ្នាំ២០២២នេះ នៅសាលាខេត្តសៀមរាប៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
