នៅរសៀលថ្ងៃទី១៩ ខែសីហា ឆ្នាំ២០២២ នៅសណ្ឋាគារប៉ាស៊ីហ្វីក ខេត្តសៀមរាប មានបើកវគ្គបណ្ដុះបណ្ដាលបំប៉នសមត្ថភាពជំនាញដល់និយោជិតក្នុងវិស័យបដិសណ្ឋារកិច្ច និងទេសចរណ៍ ជូនដល់បុគ្គលិកមកពីតាមបណ្ដាសណ្ឋាគារ និងភោជនីដ្ឋានមួយចំនួនក្នុងខេត្តសៀមរាបសរុបចំនួន ១២០នាក់។ វគ្គបណ្ដុះបណ្ដាលដែលមានរយៈពេល ១២ថ្ងៃនេះ រៀបចំដោយវិទ្យាស្ថានជាតិពហុបច្ចេកទេសអង្គរ ខេត្តសៀមរាប និងទទួលបានការគាំទ្រពីមូលនិធិអភិវឌ្ឍន៍ជំនាញ (SDF) ។
លោកបណ្ឌិត ម៉ប់ ស៊ីនួន នាយកវិទ្យាស្ថានជាតិពហុបច្ចេកទេសអង្គរ បានឲ្យដឹងថា វគ្គបណ្តុះបណ្តាលបំប៉នសមត្ថភាពជំនាញបដិសណ្ឋារកិច្ចនេះ នឹងត្រូវចែកចេញជា ៤ក្រុម សរុបចំនួន ៥០០នាក់ ដោយក្នុងមួយក្រុមមានចំនួន ១២០នាក់ ។ លោកបន្ថែមថា វគ្គបណ្តុះបណ្ដាលនេះដែរ ធ្វើឡើងក្នុងគោលបំណងជំរុញការយកចិត្តទុកដាក់ និងពង្រឹងសមត្ថភាពបន្ថែមដល់បុគ្គលិក ដែលបម្រើការក្នុងវិស័យទេសចរណ៍ ដើម្បីលើកកម្ពស់ជំនាញវិជ្ជាជីវៈទេសចរណ៍ ការស្តារសម្បទាវិជ្ជាជីវៈទេសចរណ៍ ការផ្ដល់សេវាកម្មដល់ភ្ញៀវប្រកបដោយក្រមសីលធម៌វិជ្ជាជីវៈ និងប្រណីតភាព ជាមួយការប្រាស្រ័យទាក់ទងគ្នាយ៉ាងល្អនៅកន្លែងធ្វើការផងដែរ។
ឯកឧត្តម ជា កុកហុង ប្រធានមូលនិធិអភិវឌ្ឍន៍ជំនាញ លើកឡើងថា ដោយសារវិបត្តិជំងឺកូវីដ-១៩ វិស័យទេសចរណ៍ក្នុងខេត្តសៀមរាបរងការប៉ះពាល់យ៉ាងខ្លាំង ទន្ទឹមនេះរាជរដ្ឋាភិបាល តាមរយៈក្រសួងសេដ្ឋកិច្ច និងហរិញ្ញវត្ថុ ដែលមានមូលនិធិអភិវឌ្ឍន៍ជំនាញ(SDF) បានបង្កើតឲ្យមានកម្មវិធីបណ្តុះបណ្តាលបំប៉នសមត្ថភាពជំនាញឡើងវិញ ជូនដល់និយោជិត ដែលបានផ្អាកការងារ ដើម្បីជួយគាំទ្រ និងសម្រួលដល់ការបង្កើននូវសមត្ថភាពជំនាញរបស់ពួកគាត់ក្នុងវិស័យទេសចរណ៍នេះ សម្រាប់ការត្រៀមបើកដំណើរការ ទទួលភ្ញៀវទេសចរណ៍ជាប្រក្រតីនាពេលដ៏ខ្លីខាងមុខនេះ។
ឯកឧត្តម ជា កុកហុង បង្ហាញថា គិតត្រឹមខែសីហា ឆ្នាំ២០២២ មូលនិធិអភិវឌ្ឍន៍ជំនាញ(SDF) បានដើរតួយ៉ាងសំខាន់ នៅក្នុងការផ្សារភ្ជាប់វិស័យឯកជន និងសាធារណៈ ក៏ដូចជាបានផ្តល់ថវិកាសហហិរញ្ញប្បទាន ដល់ដៃគូសហប្រតិបត្តិការពាក់ព័ន្ធសរុបជិត ៤លានដុល្លារអាមេរិក ស្មើនឹង ៩១គម្រោង ដែលមានសិក្ខាកាមសរុបចំនួនជាង ៧ពាន់នាក់ ក្នុងនោះមានស្ត្រី ៤១%។ ក្នុងនោះសមិទ្ធផលសំខាន់របស់មូលនិធិអភិវឌ្ឍន៍ជំនាញ(SDF) គឺការផ្លាស់ប្តូរឥរិយាបថ របស់វិទ្យាស្ថានបណ្តុះបណ្តាលបច្ចេកទេស ដែលបានចាប់ផ្តើមសហការជាមួយក្រុមហ៊ុន សហគ្រាសឯកជន ក្នុងការរៀបចំសំណើគម្រោងបណ្តុះបណ្តាលជំនាញ ដែលត្រូវនឹងតម្រូវការទីផ្សារការងារជាក់ស្តែង ក្នុងទម្រង់ចែករំលែកថ្លៃបណ្តុះបណ្តាល និងបង្កើនការបណ្តុះបណ្តាលនៅក្នុងសហគ្រាសផ្ទាល់ខ្លួនតែម្ដង។
ក្នុងឱកាសនោះ លោក នាក់ ណេរ៉ុន អភិបាលរងខេត្តសៀមរាប ក៏បានលើកឡើងដែរថា ទោះបីវិបត្តិជំងឺកូវីដ-១៩ បង្កផលប៉ះពាល់ដល់សេដ្ឋកិច្ចកម្ពុជាក្ដី ប៉ុន្តែរាជរដ្ឋាភិបាលនៅតែបន្តខិតខំ ជម្រុញការអភិវឌ្ឍ បង្កើនការយកចិត្តទុកដាក់កាន់តែខ្លាំងឡើងលើការកសាងប្រព័ន្ធគាំពារសង្គម ឲ្យកាន់តែរឹងមំាំបន្ថែមទៀត ជាពិសេស គឺការផ្តោតសំខាន់លើការកសាងភាពធន់ ដើម្បីឆ្លើយតបនឹងវិបត្តិនានា ជាក់ស្តែងក្របខណ្ឌយុទ្ធសាស្ត្រ និងកម្មវិធីស្តារ និងជម្រុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ២០២១-២០២៣ ដែលរាជរដ្ឋាភិបាលបានអនុម័ត និងដាក់ឲ្យប្រើប្រាស់កាលពីខែធ្នូ ឆ្នាំ២០២១កន្លងទៅ។
ជាក់ស្ដែងសម្រាប់វគ្គបណ្តុះបណ្តាលបំប៉នសមត្ថភាពជូនដល់និយោជិត ក្នុងវិស័យបដិសណ្ឋារកិច្ច និងទេសចរណ៍ នាពេលនេះ គឺជាសកម្មភាពរបស់រាជរដ្ឋាភិបាល បាននិងកំពុងបន្តយកចិត្តទុកដាក់ខ្ពស់ដល់ការត្រៀមរៀបចំបើក ឲ្យវិស័យទេសចរណ៍ក្នុងខេត្តសៀមរាប ដំណើរការប្រក្រតីឡើងវិញក្នុងពេលឆាប់ៗខាងមុខនេះ។ ក្នុងនោះសូមលើកទឹកចិត្តដល់បុគ្គលិកទាំងអស់ ត្រូវខិតខំយកចិត្តទុកដាក់សិក្សាស្វែងយល់ និងអនុវត្តន៍រំលឹកឡើងវិញ ដើម្បីយកចំណេះ ជំនាញទាំងនោះមកបំពេញការងាររបស់ខ្លួន ក្នុងនាមជាអ្នកផ្តល់សេវាកម្មបដិសណ្ឋារកិច្ច ប្រកបដោយគុណភាព ប្រសិទ្ធភាព និងមានចីរភាពជានិរន្តរ៍៕
អត្ថបទ និង រូបភាព៖ លោក អ៊ុន ណារាជ្យ
កែសម្រួល៖ លោក សេង ផល្លី
