លោក ស៊ុ សំអន នាយកសាខាកាកបាទក្រហមកម្ពុជាខេត្តសៀមរាប នៅព្រឹកថ្ងៃទី១៨ ខែសីហា ឆ្នាំ២០២២ បានដឹកនាំសហការី នាំយកអំណោយមួយចំនួន ទៅប្រគល់ជូនគ្រួសារសពកុមារ ២នាក់បងប្អូនបង្កើត ដែលបានស្លាប់ដោយសារលងទឹកប្រឡាយ កាលពីថ្ងៃទី១៧ ខែសីហា ឆ្នាំ២០២២ ស្ថិតក្នុងនៅភូមិថ្មជល់ ឃុំត្បែង ស្រុកបន្ទាយស្រី ខេត្តសៀមរាប។
ក្នុងឱកាសនោះ លោក ស៊ុ សំអន មានប្រសាសន៍ថា បន្ទាប់ពីទទួលបានព័ត៌មានពីការស្លាប់របស់កុមារីទាំង ២នាក់ ឯកឧត្តម ទៀ សីហា ប្រធានគណៈកម្មាធិការ សាខាកាកបាទក្រហមកម្ពុជាខេត្ត បានចាត់រូបលោក រួមនឹងក្រុមប្រតិបត្តិសាខាកាកបាទក្រហមកម្ពុជាខេត្ត និងអនុសាខាស្រុកបន្ទាយស្រី នាំយកអំណោយមកប្រគល់ជូនក្រុមគ្រួសារ និងសូមចូលរួមសំដែងនូវការរំលែកទុក្ខយ៉ាងក្រៀមក្រំជាមួយក្រុមគ្រួសារផង។ លោកបន្ថែមថា កាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន តែងគិតគូខ្ពស់បំផុតចំពោះសុខទុក្ខប្រជាពលរដ្ឋ ពិសេសជនរងគ្រោះដោយគ្រោះមហន្តរាយផ្សេងៗ ដោយមិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។
ចំពោះអំណោយដែលនាំយកមកប្រគល់ជូននាពេលនេះ មាន៖ អង្ករ ៦០គីឡូក្រាម មី២កេស ត្រីខ២យួរ ទឹកត្រី២យួរ មុង២ ភួយ២ សារុង២ ក្រមា២ និងថវិកា ៤សែនរៀល។ ជាមួយគ្នានេះដែរ អនុសាខាស្រុកបន្ទាយស្រី ក៏បានចូលរួមសម្ភារមួយចំនួនផងដែរ រួមមាន៖ អង្ករ ១០០គីឡូក្រាម មុង១ ភួយ១ សារុង១ ក្រមា១ កន្ទេល១ ខ្នើយ១ ទឹកត្រី២យួរ ទឹកស៊ីអ៊ី៤យួរ និងថវិកា ១សែនរៀល ជាមួយនោះកងពលធំអន្តរាគមន៍លេខ២ ក៏បានចូលរួមនូវសម្ភារ និងថវិកាមួយចំនួនផងដែរ។
#សាខាកាកបាទក្រហមខេត្ត
កែសម្រួល៖ លោក អ៊ុន ណារាជ្យ
