នៅសាលប្រជុំសាលាខេត្តសៀមរាប នាព្រឹកថ្ងៃទី១៦ ខែសីហា ឆ្នាំ២០២២នេះ មានបើកកិច្ចប្រជុំស្តីពីការចុះធ្វើអត្តសញ្ញាណប្រជាពលរដ្ឋដែលបានសាងសង់ និងកាន់កាប់ដីធី្ល ក្នុងតំបន់រមណីយដ្ឋានអង្គរ និង តំបន់ដទៃទៀត ស្ថិត ក្រោមការគ្រប់គ្រងរបស់អាជ្ញាធរជាតិអប្សរា ក្រោមកិច្ចដឹកនាំប្រជុំរបស់ឯកឧត្តម បេងហុង សុជាតិ ខេមរ៉ូ អគ្គនាយក លំនៅដ្ឋាន និង ជាប្រធានក្រុមការងារ ឯកឧត្តម ហង់ ពៅ អគ្គនាយកអាជ្ញាធរជាតិអប្សរា និង លោក លី សំរិទ្ធ អភិបាលរងនៃគណៈអភិបាលខេត្ត ដោយមានការចូលរួមពីសំណាក់អស់លោក លោកស្រីជាអគ្គនាយក ទីប្រឹក្សារបស់ក្រសួង និង គណៈអភិបាលខេត្ត អគ្គនាយករងអាជ្ញាធរជាតិអប្សរា ប្រធានមន្ទីររៀបចំដែនដីនគរូបនីយកម្ម សំណង់ និង សុរិយោ ដី មកពី៥រាជធានី ខេត្ត ,អាជ្ញាធរក្រុង ស្រុក មេឃុំ ចៅសង្កាត់ ពាក់ព័ន្ធតំបន់អប្សរា និង មន្ត្រីបច្ចេកទេសសុរិយោដីមកពី ៥រាជធានី ខេត្ត មន្ត្រីសាលាខេត្ត អាជ្ញាធរអប្សរាប្រមាណជា ១០០នាក់ចូលរួម ។
ឯកឧត្តម បេងហុង សុជាតិ ខេមរ៉ូ អគ្គនាយក លំនៅដ្ឋាន និង ជាប្រធានក្រុមការងារ បានបញ្ជាក់ថា គ្រប់ការងារដែលកម្លាំងជំនាញចុះទៅអនុវត្ត គឺធ្វើទៅតាមការកំណត់របស់គណៈកម្មការដែលបានធ្វើការណែនាំកន្លងមក ព្រមទាំង ត្រូវធ្វើការផ្សព្វផ្សាយព័ត៌មានឲ្យចូលជ្រៅដល់បងប្អូនប្រជាពលរដ្ឋ ដែលមានលំនៅដ្ឋាន កាន់កាប់ដីធ្លី ក្នុងតំបន់រមណីយដ្ឋានអង្គរ ឲ្យកាន់តែយល់ច្បាប់អំពីតម្លៃនៃសម្បត្តិបេតិកភណ្ឌពិភពលោក ដែលជាសម្បត្តិមនុស្សជាតិ។ ម៉្យាងទៀតក្រុម ការងារក៏ត្រូវកំណត់ការប្រមូលទិន្នន័យ និង បច្ចេកទេសនៃការវាស់វែង ឲ្យបានច្បាស់លាស់អំពីនិយានកាក្បាលដី និង អត្តសញ្ញាណអ្នកកាន់កាប់ដី និងសំណង់ខុសច្បាប់ ក្នុងតំបន់រមណីយដ្ឋានអង្គរ និងកន្លែងដទៃទៀត ស្ថិតក្រោមការគ្រប់គ្រងដោយអាជ្ញាធរជាតិអប្សរា ។ ម៉្យាងទៀតក៏ត្រូវ ធ្វើការចុះបញ្ជីក្បាលដីឲ្យបានច្បាស់លាស់ ដើមី្បធានាដល់ការកាន់កាប់គ្រប់គ្រងរបស់អាជ្ញាធរជាតិអប្សរា សម្រាប់ទៅពេលអនាគត។
ក្នុងនោះដែរឯកឧត្តមក៏បានសង្កត់ធ្ងន់ចំពោះមន្ត្រីជំនាញដែលចុះទៅអនុវត្តការងារនេះ ត្រូវមានកិច្ចរួម សហការជាមួយអាជ្ញាធរមូលដ្ឋាន ក្រុង ស្រុក ឃុំសង្កាត់ និងមេភូមិ សំខាន់ការចូលរួមរបស់ប្រជាពលរដ្ឋជាម្ចាស់អចលន ទ្រព្យទាំងនោះ និង គោរពឲ្យបាននូវអង្គការវិន័យ និងការចាត់តាំងតាមក្រុមនិមួយៗ ដោយពេលវេលាចុះអនុវត្តការងារនេះមានរយៈពេលតែ ១៥ថ្ងៃប៉ុណ្ណោះ ដែលចុះអនុវត្តចាប់ពីថ្ងៃទី ១៨ ខែសីហានេះទៅ ។
ក្នុងនោះដែរឯកឧត្តម ហង់ ពៅ អគ្គនាយកអាជ្ញាធរជាតិអប្សរា ក៏បានធ្វើការលម្អិតពីរបាយការណ៍ ស្ថានភាពនៃការ កាន់កាប់ និង ប្រើប្រាស់ដីខុសច្បាប់ ក្នុងតំបន់រមណីយដ្ឋានអង្គរ និង តំបន់គោលដៅអទិភាព និង តំបន់ពាក់ព័ន្ធ ។ ក្នុង នោះឯកឧត្តមបានបញ្ជាក់ថា ប្រាសាទអង្គរ គឺជារ៉ែប្រេងកាតមិនចេះរីងស្ងួតនៃព្រះរាជាណាចក្រកម្ពុជា ដែលការទាក់ទាញភ្ញៀវនៅគ្រប់មជ្ឈដ្ឋានលើពិភពលោកចូលមកទស្សនាកម្សាន្ត ដែលជាសំណង់ស្ថាបត្យកម្មគ្មានពីរនៅលើលោកនេះ។
តាមការបញ្ជាក់របស់ឯកឧត្តម សួន សុផា អគ្គនាយកសុរិយោដីនិងភូមិសាស្ត្រ និងជាអនុប្រធានក្រុមការងារ បានលើកពីការងារប្រមូលទិន្នន័យ និង បច្ចេកទេសនៃការវាស់វែង នៅក្នុងតំបន់រមណីយដ្ឋានអង្គរ ដោយមានក្រុមការងារ បច្ចេកទេសសុរិយោដី មកពីរាជធានីភ្នំពេញ , ខេត្តកំពង់ចាម , បាត់ដំបង , បន្ទាយមានជ័យ ,ខេត្តកំពង់ធំ និងខេត្តសៀមរាប ដោយបានបែងចែកជា ៣២ក្រុម ដោយមានសមាសភាពចូលរួម ពីមន្ត្រីរដ្ឋបាលខេត្ត អាជ្ញាធរជាតិអប្សរា និង មន្ត្រីសុរិយោដី ហើយមួយៗក្រុមបែងចែកជាក្រុមប្រមូលទិន្នន័យ និង វាស់វែង ដែលមានរយៈពេលតែ ១៥ថ្ងៃប៉ុណ្ណោះ ។
មានប្រសាសន៍នោះលោក លី សំរិទ្ធ អភិបាលរងនៃគណៈអភិបាលខេត្តសៀមរាប បានបញ្ជាក់ថា ការងារទាំងនេះក៏ យើងត្រូវបំពេញសមាសភាពផ្នែកកងកម្លាំង ដើមី្បធានានូវសុវត្ថិភាពដល់ការងារសន្តិសុខ សណ្តាប់ធ្នាប់ ព្រមទាំងរដ្ឋបាល ក្រុង ស្រុក ឃុំ សង្កាត់ ក្នុងការចុះធ្វើអត្តសញ្ញាណប្រជាពលរដ្ឋដែលបានសាងសង់ និងកាន់កាប់ដីធី្ល ក្នុងតំបន់រមណីយដ្ឋានអង្គរ ឲ្យបានដំណើរការទៅដោយរលូន ប្រកបដោយលទ្ធផលល្អ។ លោកអភិបាលរងខេត្ត ក៏បានថ្លែងអំណរគុណដល់ប្រមុខរាជរដ្ឋាភិបាន ដែលបានបង្កើតនូវក្រុមការងារតម្រង់ទិស ដើមី្ប ដោះស្រាយបញ្ហាសំណង់ខុសច្បាប់ និង ដីធ្លីក្នុងតំបន់រមណីយដ្ឋានអង្គរ និង តំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា ក្នុងការសម្រួលដល់សត្តិអារម្មណ៍របស់ប្រជាពលរដ្ឋ ព្រមទាំងឲ្យពួកគាត់កាន់តែយល់ច្បាប់អំពី តម្លៃនៃសម្បត្តិបេតិកភណ្ឌរបស់មនុស្សជាតិ និង ការផ្តល់ផលប្រយោជន៍ដល់ប្រជាពលរដ្ឋកម្ពុជាយើងផងដែរ៕
អត្ថបទ និងរូបភាព៖ លោក ម៉ី សុខារិទ្ធ
