លោក ពិន ប្រាកដ អភិបាលរងខេត្តសៀមរាប មានប្រសាសន៍ថា អាស្រ័យដោយមានថ្ងៃរំដោះ ៧ មករា ១៩៧៩ ជនរួមជាតិយើងបានចាត់ទុកថ្ងៃនេះ ជាថ្ងៃកំណើតទីពីរ និងបានចាប់ផ្តើមមានស្នាមញញឹម មានក្តីសង្ឃឹម មានការជឿជាក់ និងមានការរស់នៅដោយ សេរីភាពតាមចិត្តចង់គ្រប់ទីកន្លែង និងគ្រប់ពេលវេលា ដោយគ្មានអង្គការភ្នែកម្នាស់ តាមដាន និងគំរាមកំហែងកាប់សម្លាប់ជីវិតគ្រប់ពេលវេលាទៀតទេ ពោលគឺបងប្អូនប្រជាពុទ្ឋរិស័ទ ទទួលបានសេរីភាពខាងជំនឿ និងធ្វើបុណ្យទានបានគ្រប់ពេលវេលា និងគ្រប់ទីកន្លែងដោយគ្មានក្តីបារម្ភឡើយ។
លោកអភិបាលរងខេត្តថ្លែងយ៉ាងដូច្នេះកាលពីចុងសប្ដាហ៍កន្លងទៅនេះ ក្នុងពិធីប្រកាសឱ្យឡើងទីជាព្រះយសសិរីធម្ម ព្រះរាជាគណៈកិត្តិយស និងស្រោចស្រពសុគន្ធវារីចម្រើនព្រះជន្មាយុ ៦០ ឈានចូល៦១ ព្រះវស្សា ប្រគេនព្រះគ្រូឃោសាភិញាណ ចន្ទ សុវណ្ណ ព្រះចៅអធិការវត្តព្រះឥន្ទកោសីយ៍ រួមជាមួយពិធីប្រកាសព្រះរាជក្រឹត្យ ប្រកាសនីយបត្រតែងតាំង គ្រូសូធ្យស្តាំ ឆ្វេង វត្តព្រះឥន្ទកោសីយ៍ និងគ្រូសូធ្យស្តាំ ឆ្វេង វិន័យធរ វត្តព្រះឥន្ទកោសាក្នុងក្រុងសៀមរាប ព្រមទាំងពិធីប្រគេន និងជូនប្រគេនគ្រឿងឥស្សរិយយសដល់មន្ត្រីសង្ឃ និងពុទ្ឋសាសសនូបត្ថម្ភជាច្រើនរូបផងដែរ។
លោក ពិន ប្រាកដ បានបញ្ជាក់ថា ផ្តើមចេញពីចំណុចនេះ ដោយអនុវត្តគោលនយោបាយ ឈ្នះ ឈ្នះ និងក្រោមការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំប្រកបដោយគតបណ្ឌិត បាននាំមកនូវសន្តិភាព ស្ថេរភាព និងការអភិវឌ្ឍលើគ្រប់វិស័យទូទាំងប្រទេស ទាំងពុទ្ធចក្រ និងអាណាចក្រ ជាក់ស្តែងហេដ្ឋារចនាសម្ព័ន្ធខាងព្រះពុទ្ធសាសនាត្រូវបានអភិវឌ្ឍន៍ ឡើងវិញយ៉ាងឆាប់រហ័សគួរនឹកស្មានពុំដល់ ពិសេសព្រះពុទ្ធសាសនា ត្រូវបានកំណត់ ក្នុងរដ្ឋធម្មនុញ្ញថាជា «សាសនារបស់រដ្ឋ»។ ជាក់ស្ដែងការរៀបចំពិធីបុណ្យស្រោចស្រពសុគន្ធវារី ប្រគេន ព្រះចៅអធិការ នាពេលនេះ គឺជាការបញ្ជាក់ នៃការរីកចម្រើន និងស្ថិតស្ថេរគង់វង្សវិស័យព្រះពុទ្ធសាសនា នៅក្នុងព្រះរាជាណាចក្រកម្ពុជាយើង ផ្តើមចេញពីគាំទ្ររបស់ ពុទ្ធបរិស័ទ ដែលផុសចេញពីសណ្តានចិត្តដ៏ប្រពៃថ្លៃថ្លា របស់ប្រជាពុទ្ធបរិស័ទ ទាំងអស់ និងការខិតខំប្រឹងប្រែងរបស់អាជ្ញាធរមូលដ្ឋាន ព្រមទាំងលោកយាយ លោកតាទាំងអស់ ដែលជាពុទ្ធសាសនិក។
ព័ត៌មានជាតិ ថ្មីៗ
សម្តេចព្រះឧត្តមបញ្ញា កិត្តិបណ្ឌិត ដូង ផង់ ព្រះអនុប្រធានថេរសភានៃព្រះពុទ្ឋសាសនា និងជាអគារធិការរងពុទ្ឋិកសិក្សាជាតិ ជាព្រះចៅអធិការវត្តព្រែកប្រា មានសង្ឃដីកាថា ពិតប្រាកដប្រទេសយើងមានសន្តិភាព បងប្អូនប្រជាពុទ្ឋបរិស័ទអាចបំពេញបុណ្យនិងធ្វើអ្វីៗ ទៅតាមគោលបំណង និងសេចក្តីត្រូវការរបស់ខ្លួន ដោយគ្មានក្តីបារម្ភ បើគ្មានសន្តិភាពទេយើងក៍មិនអាចធ្វើអ្វីៗតាមតម្រូវការរបស់យើងបានឡើយ។ បុគ្គលគ្រប់រូបទាំងបុព្វជិត និងគ្រហាវាស្ថ បងប្អូនប្រជាពុទ្ឋបរិស័ទដែលគោរពជឿតាមព្រះពុទ្ឋសាសនា ចូរគោរពនិងប្រតិបត្តិតាមលំអានពុទ្ឋោវាទនៃព្រះសាស្តាព្រះពុទ្ឋបរមគ្រូនៃយើង៕
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
