កាលពីរសៀលថ្ងៃទី៣០ ខែសីហា ឆ្នាំ២០២២ម្សិលមិញនេះ មន្ត្រីសង្ឃក្រុងសៀមរាប ដឹកនាំដោយព្រះគ្រូប្រាសាទចន្ទរង្សី សាសនធរោ បណ្ឌិត ឡាច លាង ព្រះអនុគណក្រុងសៀមរាប និងជាព្រះចៅអធិការវត្តទេពពោធិវង្ស ហៅវត្តថ្មី ក្នុងក្រុងសៀមរាបខេត្តសៀមរាប បាននិមន្តនាំយកទេយ្យទាន គ្រឿងឧបភោគបរិភោគ និងថវិកាមួយចំនួន ប្រគល់ជូនដល់ប្រជាពលរដ្ឋ ដែលជួបការលំបាកនិងមានជីវភាពខ្វះខាតប្រចាំថ្ងៃ ចំនួន ២៥គ្រួសារ ក្នុងស្រុកស្រីស្នំ ក្នុងនោះនៅភូមិខ្វែក ក្នុងឃុំមោង ចំនួន១២គ្រួសារ និងភូមិគោកព្នៅ ក្នុងឃុំស្លែងស្ពាន ចំនួន១៣គ្រួសារ ដែលមួយគ្រួសារ ទទួលបាន ៖ អង្ករ ២៥គីឡូក្រាម , មីម៉ាម៉ា១កេស , អំបិល១គីឡូក្រាម , ប៊ីចេង១គីឡូក្រាម , ស្ករស១គីឡូក្រាម , ទឹកត្រី១យួរ , ទឹកស៊ីអ៉ីវ១យួរ , សារ៉ុង១ មោហ ថវិកាចំនួន៣ម៉ឺនរៀល ។
ព្រះគ្រូប្រាសាទចន្ទរង្សី បណ្ឌិត ឡាច លាង មានសង្ឃដីកា ថា អំណោយទាំងនេះ បានមកពីសទ្ឋាជ្រះថ្លារបស់ឧបាសក ឧបាសិកា ពុទ្ធបរិស័ទជិតឆ្ងាយ យកមកប្រគេនដល់ព្រះសង្ឃ រយ:កាលកន្លងមក ហើយព្រះសង្ឃលៃលកសន្សំទុក ដើម្បីសម្រាប់ធ្វើការចែករំលែកជូនដល់គ្រួសារជួបការលំបាកក្នុងជីវភាព នៅគ្រប់ទីកន្លែង ជាក់ស្តែងពេលនេះ តបតាមការស្នើសុំរបស់ក្រុមការងារយុវជនចុះជួយមូលដ្ឋានស្រុក ក៍ដូចជាអាជ្ញាធរមូលដ្ឋានបានសំណូមពរបើមានគ្រឿងឧបភោគបរិភោគអាចចែករំលែកបានសូមយកមកធ្វើសង្ឃគហៈទានដល់គ្រួសារខ្វះខាតក្នុងស្រុកស្រីស្នំនេះផង ហើយព្រះក្រុមសង្ឃក៏បានយល់ព្រមតាមសេចក្តីត្រូវការចាំបាច់ជាក់ស្តែងនាពេលនេះតែម្តង ព្រោះថា ទុក្ខលំបាក ភាពខ្វះខាតរបស់ពុទ្ធបរិស័ទ ក៏ដូចជាទុក្ខលំបាករបស់ព្រះសង្ឃដែរ ។
លោកស្រី ចាន់ សួយ អភិបាលរងស្រុកស្រីស្នំ បានថ្លែង អំណរព្រះគុណ ដល់ព្រះមន្ត្រីសង្ឃសាលាអនុគណក្រុង ព្រះថេរានុត្ថេរៈ ដែលបាននាំយកអំណោយជាគ្រឿងឧបភោគបរិភោគ និងថវិកា មកជូនដល់ប្រជាពលរដ្ឋ ក្នុងមូលដ្ឋានស្រុកស្រីស្នំនាពេលនេះ ដើម្បីការជួយសម្រាលជីវភាពដល់គ្រួសារទីទ័លខ្វះខាត ដែលអំណោយមនុស្សធម៌នេះ ជាគុណបំណាច់ដ៏ធំធេងណាស់សម្រាប់ប្រជាពលរដ្ឋ ដែលមានជីវភាពខ្វះខាតគឺអាចជួយសម្រាលនូវភាពខ្វះខាតបានមួយរយ:ពេលផងដែរ ។
លោកស្រី ក៏បានអំពាវនាវដល់សប្បុរសជនដទៃទៀត មេត្តាបន្តផ្តល់អំណោយជាមនុស្សធម៌ ឲ្យបានច្រើនបន្តទៀត ដើម្បីអាជ្ញាធរស្រុកមានលទ្ធភាព ផ្គត់ផ្គង់ និងចែកជូនដល់ប្រជាពលរដ្ឋ ដែលមានការខ្វះខាតជីវភាព ក្នុងការជួយសម្រាលទុក្ខលំបាកនៅក្នុងវិបត្តិជំងឺកូវីដ-១៩ ដែលមានទាន់ឃ្លាតទៅណានៅឡើយ ៕
អត្ថបទ និង រូបភាព៖ លោក យូ វង្ស ស៊ាង សុផាត
កែសម្រួល៖ លោក លីវ សាន្ត