កាលពីថ្ងៃទី៣០ ខែសីហា ឆ្នាំ២០២២ម្សិលមិញនេះ លោក អ៊ឹង គឹមលាង អភិបាលរងខេត្ត តំណាងដ៏ខ្ពង់ខ្ពស់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បាននាំយកអំណោយរបស់រាជរដ្ឋាភិបាល តាមរយៈក្រសួងសង្គមកិច្ច អតីតយុទ្ធជន និងយុវនីតិសម្បទា ជូនដល់ជនចាស់ជរាក្រីក្រចំនួន៣០០គ្រួសារ ស្ថិតនៅភូមិត្រពាំងត្រុំ ឃុំពពេល ស្រុកសូទ្រនិគម ដែលរៀបចំឡើងដោយ មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត សហការជាមួយរដ្ឋបាលស្រុកសូទ្រនិគម។
មានប្រសាសន៍ក្នុងឱកាសនោះ លោក អ៊ឹង គឹមលាង អភិបាលរងខេត្ត បានលើកឡើងថា ការផ្ដល់អំណោយជាស្បៀងអាហារជូនដល់ជនចាស់ជរាក្រីក្រចំនួន៣០០គ្រួសារក្នុងស្រុកសូទ្រនិគមនាពេលនេះ គឺជាការយកចិត្តទុកដាក់ជាខ្លាំងរបស់រាជរដ្ឋាភិបាល ដែលមានសម្ដេចតេជោ ហ៊ុន សែន ជានាយករដ្ឋមន្ត្រី ដែលជានិច្ចកាល សម្ដេចតែងតែបានគិតគូពីសុខទុក្ខ និង ជីវភាពរបស់នៅប្រចាំថ្ងៃរបស់បងប្អូនប្រជាពលរដ្ឋ ទូទៅក្នុងទូទាំងប្រទេស គ្រប់កាលៈទេសៈ មិនប្រកាន់ពណ៌សម្បុរ ជាតិសាសន៍ គណបក្សនយោបាយណាមួយឡើយ ដើម្បីជួយសម្រាលការលំបាក និងការជួយក្នុងគ្រាមានអាសន្ន ។
លោកបន្ថែមទៀតថា ក្រោមការដឹកនាំប្រកបដោយគិតបណ្ឌិត និងឈ្លាសវៃរបស់សម្តេចតេជោ ហ៊ុន សែន រាជរដ្ឋាភិបាលកម្ពុជាបានដាក់ចេញនូវចក្ខុវិស័យដ៏ត្រឹមត្រូវ ដើម្បីចូលរួមស្តារនូវវិស័យទេសចរណ៍របស់កម្ពុជា ក៏ដូចជាខេត្តសៀមរាបពីផលប៉ះពាល់ដែលបណ្តាលមកពីវិបត្តិនៃជំងឺកូវីដ-១៩ តាមរយៈការដាក់ចេញ និងអនុវត្តន៍បានដោយជោគជ័យនូវគោលនយោបាយចាក់វ៉ាក់សាំងកូវីដ-១៩ ជូនដល់ប្រជាពលរដ្ឋទាំងអស់នៅទូទាំងប្រទេស ដើម្បីបង្កើតឱ្យមានភាពស៊ាំនៅក្នុងសហគមន៍។
លោក អ៊ឹង គឹមលាង បន្តថា បើទោះបីជាស្ថិតនៅក្នុងដំណាក់កាលដ៏លំបាក នៃវិបត្តិជំងឺកូវីដ-១៩ ខ្លាំងក្លាយ៉ាងណាក៏ដោយ រាជរដ្ឋាភិបាលកម្ពុជា បានសម្រេចផ្តល់ជូននូវអំណោយដ៏ថ្លៃថ្លា នៃគម្រោងកែលម្អហេដ្ឋារចនាសម្ព័ន្ធផ្លូវ ៣៨ខ្សែ និងការកែលម្អមាត់ស្ទឹងសៀមរាប ក្នុងក្រុងសៀមរាប ជូនដល់ប្រជាពលរដ្ឋខេត្តសៀមរាប ការសាងសង់អាកាសយានដ្ឋានអន្តរជាតិសៀមរាបថ្មី ស្ថិតក្នុងឃុំតាយ៉ែក ស្រុកសូទ្រនិគម ខេត្តសៀមរាប ដែលបាននិងកំពុងសាងសង់ ហើយគ្រោងនឹងបញ្ចប់ នាថ្ងៃទី៣០ ខែមីនា ឆ្នាំ២០២៣ខាងមុខនេះ ហើយតាមរយៈសមិទ្ធផលទាំងនេះ បានលើកកម្ពស់សោភ័ណភាពក្រុងសៀមរាប កាន់តែមានសោភ័ណភាពស្រស់ស្អាត ជាចំណែកមួយដែលទាក់ទាញនូវភ្ញៀវទេសចរ និងវិនិយោគគិនជាតិ-អន្តរជាតិ ចូលមកទស្សនាកំសាន្ត នៅក្នុងខេត្តសៀមរាបកាន់តែច្រើន ដែលរាជរដ្ឋាភិបាលប្រសិទ្ធនាមថាជា «តារារះនាទិសឧត្ដរ» ព្រោះថា នឹងជំរុញកំណើនសេដ្ឋកិច្ច និងបង្កើនជីវភាពរស់នៅរបស់ប្រជាពលរដ្ឋក្នុងខេត្តសៀមរាប កាន់តែល្អប្រសើរថែមទៀត ៕
អត្ថបទ និង រូបភាព៖ លោក ស៊ាន សុផាត
កែសម្រួល៖ លោក លីវ សាន្ត
