នៅរសៀលថ្ងៃទី៣១ ខែសីហា ឆ្នាំ២០២២ សមាគមសហព័ន្ធអភិវឌ្ឍន៍ដីធ្លី និងសំណង់កម្ពុជា និងសមាគមសម្ព័ន្ធភាពកសិកម្ម និងបរិស្ថានកម្ពុជា មានរៀបចំពិធីសំណេះសំណាល ជាមួយថ្នាក់ដឹកនាំ និងសមាជិកសមាជិកា វិនិយោគិន ពាណិជ្ជករ អាជីវករ ធុរកិច្ចទីផ្សារបណ្ដាញ អ្នកជំនាញវិជ្ជាជីវៈ សមាគមសហព័ន្ធអភិវឌ្ឍន៍ដីធ្លី និងសំណង់កម្ពុជា និងសមាគមសម្ព័ន្ធភាពកសិកម្ម និងបរិស្ថានកម្ពុជា ក្នុងខេត្តសៀមរាប ដែលមានអ្នកចូលរួមប្រមាណជាង ៥០០នាក់
អញ្ជើញជាអធិបតី ក្នុងឱកាសនោះ ឯកឧត្តមសមូហកបណ្ឌិត ឡី សុភាព មានប្រសាសន៍ថា ការរៀបចំពិធីនេះឡើង មានគោលបំណងចែករំលែកនូវបទពិសោធន៍ ក៏ដូចជាចំណេះដឹងពាក់ព័ន្ធទៅនឹងការធ្វើអាជីវកម្មផ្សេងៗ និងប្រកាសពីសមាសភាព ថ្នាក់ដឹកនាំ សមាជិក និងផ្ដល់នូវលិខិតសរសើរ។
ឯកឧត្តមសមូហកបណ្ឌិត ឡី សុភាព លើកឡើងថាស្របតាមការអភិវឌ្ឍន៍នៅកម្ពុជា សមាគមសហព័ន្ធអភិវឌ្ឍន៍ដីធ្លី និងសំណង់កម្ពុជា និងសមាគមសម្ពន្ធភាពកសិកម្ម និងបរិស្ថានកម្ពុជា បានប្ដេជ្ញាពង្រឹងសមត្ថភាពបន្ថែមដល់សមាជិករបស់ខ្លួនទាំងអស់ ក្នុងការចូលរួមធ្វើកំណែទម្រង់នៃការអភិវឌ្ឍន៍ដីធ្លី និងសំណង់កម្ពុជា និងសមាគមសម្ពន្ធភាពកសិកម្ម និងបរិស្ថានកម្ពុជា ឲ្យទទួលបានប្រសិទ្ធភាព តាមគោលនយោបាយរបស់រាជរដ្ឋាភិបាលកម្ពុជា រួមទាំងច្បាប់ និងលិខិតបទដ្ឋានគតិយុត្តនានា ដែលមានជាធរមាន ខណៈឯកឧត្តមបានមើលឃើញបញ្ហាជាច្រើនក្នុងសកម្មភាពដីធ្លីនាពេលបច្ចុប្បន្ន។ ដោយឡែកនៅក្នុងឆ្នាំ២០១៩ រាជរដ្ឋាភិបាលកម្ពុជា បានរៀបចំច្បាប់ស្ដីពីការរៀបចំសំណង់ និងប្រកាសស្ដីអំពីការអភិវឌ្ឍន៍ដីធ្លី ប្រកាសស្ដីពីការគ្រប់គ្រងអាជីវកម្មអចលនវត្ថុ។ ក្រៅពីការរៀបចំច្បាប់ និងប្រកាសនេះហើយឯកឧត្តម និងសហការី បានចាប់ផ្ដើមបង្កើតសមាគមសហព័ន្ធអភិវឌ្ឍន៍ដីធ្លី និងសំណង់កម្ពុជា និងសមាគមសម្ពន្ធភាពកសិកម្ម និងបរិស្ថានកម្ពុជា ដើម្បីចូលរួមអនុវត្តន៍កំណែទម្រង់ក្នុងវិស័យនេះ ឲ្យស្របទៅតាមការអភិវឌ្ឍន៍របស់រាជរដ្ឋាភិបាល។
ឯកឧត្តមបញ្ជាក់ថា ការបង្កើតសមាគមអភិវឌ្ឍន៍ដីធ្លី និងសំណង់កម្ពុជា និងសមាគមសម្ព័ន្ធភាពកសិកម្ម និងបរិស្ថានកម្ពុជា គឺដើម្បីប្រមូលផ្ដុំអ្នកពាក់ព័ន្ធ និងប្រកបរបរលើវិស័យទាំងនេះនៅទូទាំងប្រទេស ធ្វើកែទម្រង់ក្នុងអាជីវកម្មរបស់ខ្លួនប្រកបដោយបរិយាបន្ន និងរដ្ឋបាលឯកភាព ព្រោះមិនដូច្នោះទេវិបត្តិដីធ្លីរវាងអ្នកលក់ និងអ្នកទិញ ភ្នាក់ងារអភិវឌ្ឍន៍ និងម្ចាស់ដី នឹងកើតឡើងឥតឈប់ ដែលវានឹងធ្វើឲ្យប៉ះពាល់ដល់ការអភិវឌ្ឍន៍សេដ្ឋកិច្ច និងសង្គម។ ជាក់ស្ដែងក្នុងខេត្តសៀមរាបបច្ចុប្បន្ន វិស័យដីធ្លីកំពុងមានសន្ទុះឥតឈប់ឈរ ប៉ុន្តែនេះក៏ជាការព្រួយបារម្ភមួយក្នុងវិស័យនេះផងដែរ ដោយសារតែអ្នកវិនិយោគមួយចំនួនជាអ្នកវិនិយោគខ្យល់ និងខុសច្បាប់។ ក្នុងនោះដែរការកាន់កាប់ដីដោយគ្មានច្បាប់អនុញ្ញាតក៏ជាបញ្ហាមួយដែរ ខណ:បច្ចុប្បន្នបញ្ហាប្រជាពលរដ្ឋរស់នៅ ក្នុងតំបន់អង្គរ ត្រូវបានអាជ្ញាធរកំពុងយកចិត្តទុកដាក់ ដោយធ្វើការផ្លាស់ប្តូរទីលំនៅទៅកាន់ទីតាំងថ្មី ដែលការងារនេះ សមាគមបានគាំទ្រទាំងស្រុង ហើយបញ្ហានេះក៏ជារឿងមួយដែលអ្នកវិនិយោគដីធ្លីគួរយកធ្វើជាបទពិសោធន៍ និងប្រុងប្រយ័ត្នផងដែរ។
ឯកឧត្តមបញ្ជាក់បន្ថែមថា ការកំណែទម្រង់ ជាមួយនិងការអភិវឌ្ឍន៍ក្នុងវិស័យមួយនេះ ត្រូវតែមានធនធានប្រកបដោយវិជ្ជាជីវៈ ដែលវាស្របតាមគោលនយោបាយសិក្សាពេញមួយជីវិត និងគោនយោបាយជាតិស្ដីពីការបណ្ដុះបណ្ដាលបច្ចេកទេស និងវិជ្ជាជីវៈ ដែលសមាគមក៏បានបណ្ដុះបណ្ដាលបន្ថែមទៅដល់មូលដ្ឋានផងដែរ។
ទន្ទឹមនោះ ឯកឧត្តមក៏បានណែនាំដល់សមាជិកសមាគមទាំងអស់ ត្រូវមានចរិយាធម៌នៅក្នុងខ្លួន ដូចជាឆន្ទៈ ស្មោះត្រង់ ខន្តី និងសេចក្តីអត់ធន់ កតញ្ញូ និងសេចក្តីដឹងគុណ ដោយត្រូវប្រកាន់ខ្ជាប់ខ្លួនជានិច្ចនៅពេលចេញទៅធ្វើការ ឬប្រកបរបរអាជីវកម្ម ហើយក៏ត្រូវប្រកាន់ភ្ជាប់នូវព្រហ្មវិហារធម៌ទាំង៤ ដែលរួមមាន មេត្តា ករុណា មុទិតា ឧបេក្ខា ដោយមានកិច្ចការអ្វីត្រូវចេះជំនុំគ្នាពភាក្សា ដឹកនាំកាន់ដៃគ្នាទៅរកការគិតដោយគតិ ហើយទីណាមានការប្រឹក្សាយោបល់ ទីនោះនឹងមានការរីកចម្រើន៕
អត្ថបទ និង រូបភាព៖ អ៊ុន ណារាជ្យ
កែសម្រួល៖ លោក សេង ផល្លី
