លោក ឃឹម ហ្វីណង់ អភិបាលស្រុកបន្ទាយស្រី ខេត្ដសៀមរាប បានឱ្យដឹងថានៅថ្ងៃទី០១ ខែកញ្ញា ឆ្នាំ២០២២នេះថា ក្រោយពីមានកិច្ចសន្យាបញ្ចប់ជួលដី ជាមួយម្ចាស់ដីជួល ដែលជាសមាជិកគណបក្សសម្ព័ន្ធដើម្បីប្រជាធិបតេយ្យ និងតំណាងលោក ខឹម វាសនា កន្លងមក ប្រជាពលរដ្ឋដែលប្រមូលជុំគ្នា នៅដីចំការលោក ខឹម វាសនា ពួកគាត់បានចាកចេញជាបន្ដបន្ទាប់ ដែលអាចប៉ាន់ប្រមាណប្រហែល ៥ពាន់នាក់ បើគិតចាប់ពីថ្ងៃទី៣០ ខែសីហា ដល់ថ្ងៃទី០១ ខែកញ្ញានេះ។ លោកបន្ដថា ការចាកចេញទៅលំនៅឋានវិញនេះ ភាគច្រើនជាមនុស្សចាស់ កូនក្មេង ពួកគាត់បានស្នាក់នៅយូរថ្ងៃ បណ្ដាលឱ្យផល់ប៉ះពាល់ដល់សុខភាព ព្រោះមុខមាត់គាត់មានសភាពស្លេកស្លាំងហើយអាចមានផ្ទុកជំងឺផ្សេងៗ ព្រោះបរិវេននៃការស្នាក់នៅរប់ស់ពួកគាត់ មានបរិស្ថានមិនបានល្អ ខ្វះអនាម័យ។
លោកអភិបាលស្រុកបានឲ្យដឹងទៀតថា អាជ្ញាធរបានត្រៀមរថយន្ដជាច្រើនគ្រឿង រួមមានរថយន្ដសាលាខេត្ដ រថយន្ដយោធាយោធភូមិភាគទី៤ និងយោធាកងពលធំ អន្ដរាគមន៍លេខ២ សម្រាប់ដឹកប្រជាពលរដ្ឋដែលពុំមានមធ្យោបាយធ្វើដំណើរត្រឡប់ទៅផ្ទះវិញ។ លោកថា ក្រោយពីកំណត់រយៈពេល ៥ថ្ងៃ ប្រជាពលរដ្ឋនៅតែបន្ដប្រមូលផ្ដុំនៅទីតាំងនេះទៀត អាជ្ញាធរនឹងមានវិធានបន្ថែមទៀត ដោយមានការផ្ដាច់ការចំអិនម្ហូបឱ្យអ្នកប្រមូលផ្ដុំ ផ្ដាច់ការទំនាក់ទំនងតាមវិទ្យុទាក់ទង ហើយនឹងឱ្យរុះរើរោងដោយខ្លួនឯង ព្រោះម្ចាស់ដីឈ្មោះ នី ចាន់ពិនិត្យ ជាសមាជិកគណបក្សសម្ព័ន្ធដើម្បីប្រជាធិបតេយ្យ និងជាម្ចាស់ដីជួលផង បានយល់ព្រមផ្ដិតមេដៃ បញ្ចប់ការជួលឱ្យការប្រមូលផ្ដុំគ្នាដោយខុសច្បាប់នេះ។
សូមបញ្ជាក់ថា ប្រជាពលរដ្ឋដែលបានប្រមូលផ្ដុំគ្នាតាមការឃោសនារបស់លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ មានជាង ១ម៉ឺន ៧ពាន់នាក់ ស្ថិតនៅលើផ្ទៃដីចំនួន ១២ហិកតា ស្ថិតក្នុងបរិវេណចម្ការ នៅភូមិថ្មជល់ ឃុំត្បែង ស្រុកបន្ទាយស្រី ខេត្តសៀមរាប។ ក្រោយពីមានការចេញលិខិត ផ្អាកការប្រមូលផ្ដុំ កាលពីថ្ងៃទី៣០ ខែសីហាកន្លងមក អាជ្ញាធរបានដាក់កម្លាំងសមត្ថកិច្ចចម្រុះមានកម្លាំងនគរបាល កងរាជអាវុធហត្ថនិងទាហានផង នៅលើដងផ្លូវខាងមុខកន្លែងប្រមូលផ្ដុំ ដើម្បីរារាំងអ្នកនាំចូលចំណីអាហារ ឬទំនិញផ្សេងទៅលក់នៅតំបន់ជួបជុំទៀត។ ប៉ុន្ដែយ៉ាងនេះក្ដី អាជ្ញាធរបានត្រៀមលក្ខណៈគ្រប់បែបយ៉ាង ដើម្បីជួយសង្គ្រោះដល់ប្រជាពលរដ្ឋ ដែលប្រមូលផ្ដុំគ្នាតាមការឃោសនាខុសច្បាប់របស់លោក ខឹម វាសនា នោះ៕
អត្ថបទ និងរូពភាព៖ លោក បូ សាវី
