ចៅក្រមស៊ើបសួរសាលាដំបូងខេត្តសៀមរាប បានសម្រេចឃុំខ្លួនស្ត្រីសកម្មជនរបស់គណបក្ស LDP ចំនួន ៦នាក់ ដាក់ពន្ធនាគារ ពីបទប្រឆាំងអ្នករាជការសាធារណៈ តាម មាត្រា ៥០៣ និង ៥០៥ នៃក្រមព្រហ្មទណ្ឌ។
លោក ថេង សំណាង ព្រះរាជអាជ្ញារង នៃអយ្យការអមសាលាដំបូងខេត្តសៀមរាប បានប្រាប់ឱ្យដឹងកាលពីវេលាម៉ោង ៦ ល្ងាចថ្ងៃទី០២ ខែកញ្ញា ឆ្នាំ២០២២នេះថា ស្ត្រីទាំង ៦នាក់ របស់គណបក្ស (LDP) ដែលសមត្ថកិច្ចឃាត់ខ្លួនបាននៅមុខ ចំការរបស់លោក ខឹម វាសនា នោះត្រូវបានសម្រេច ឱ្យឃុំខ្លួន បណ្តោះអាសន្នដាក់នៅពន្ធនាគារ ខេត្តសៀមរាបហើយ។
ព័ត៌មានជាតិ ថ្មីៗ
លោក បានបញ្ជាក់ថា ការឃាត់ខ្លួនមនុស្សចំនួន ៦នាក់ ដែលជាសកម្មជន អ្នកគាំទ្រគណបក្ស សម្ព័ន្ធដើម្បីប្រជាធិបតេយ្យ (LDP) ដែលបានបើករថយន្ត គេចពីបារ៉ាស់ទី១ រួចទៅបុកបារ៉ាសទី២ របស់សមត្ថកិច្ច និងប្រឆាំងសមត្ថកិច្ចកំពុងប្រតិបត្តិការ ហើយករណីខាងលើយើងចោទពីបទ “ប្រឆាំងអ្នករាជការសាធារណ: តាម មាត្រា ៥០៣ និង ៥០៥ នៃក្រមព្រហ្មទណ្ឌ។ លោកថាការឃាត់ខ្លួននេះ ធ្វើឡើងនៅល្ងាចថ្ងៃទី០១ ខែកញ្ញា ឆ្នាំ២០២២ ស្ថិតនៅចំណុចប៉ុស្តិ៍ហាម ឃាត់មុខ ដីចម្ការម្រេចរបស់លោកខឹម វាសនា ក្នុងឃុំត្បែង ស្រុកបន្ទាយស្រី ខេត្តសៀមរាប ។
បើតាម លោកវរសេនីយ៍ឯក ឡុង សំណាង អធិការស្រុកបន្ទាយស្រី បានប្រាប់ឱ្យដឹងនៅថ្ងៃទី០២ ខែកញ្ញា នេះថា ពិតជាមានការឃាត់មនុស្សចំនួន ៦នាក់ ពិតប្រាកដមែន នៅចំណុចប៉ុស្តិ៍ហាម ឃាត់ មុខដីចម្ការលោកខឹម វាសនា ក្នុងឃុំត្បែង ស្រុកបន្ទាយស្រី កាលពីល្ងាចថ្ងៃទី០១ ខែកញ្ញា ក្រោមការដឹកនាំបញ្ជាផ្ទាល់ពីព្រះរាជអាជ្ញា នៃអយ្យការអមសាលាដំបូង ខេត្តសៀមរាប។ មនុស្សដែលបានឃាត់ទាំង ៦នាក់នោះ រួមមាន: ទី១ -ឈ្មោះ ឈិត ស្រីឡាង, ទី២ -ឈ្មោះ ថុង ដារ៉ាស៊ី, ទី៣- ឈ្មោះ អ៊ី សូជីង, ទី៤ ឈ្មោះ ជុំ ខុម, ទី៥- ឈ្មោះ ភួង សម្ភស្សបូផា និង ទី៦- ឈ្មោះ កូវ ឡោ។ បន្ទាប់ពីបានឃាត់ខ្លួនហើយ អ្នកទាំង៦នាក់ ត្រូវបានបញ្ជូនមកកាន់ការិយាល័យ នគរបាលព្រហ្មទណ្ឌកម្រិតធ្ងន់ នៃស្នងការនគរបាលខេត្តសៀមរាប កាលពីល្ងាចថ្ងៃទី០១ ខែកញ្ញា ឆ្នាំ២០២២ ដើម្បីចាត់ការបន្តតាមនីតិវិធីច្បាប់។
លោក អធិការស្រុកបន្ទាយស្រី បានបញ្ជាក់ទៀតថា ការឃាត់ខ្លួននោះ គឺដោយសារមនុស្សស្រីទាំង ៦នាក់ បាន ជិះរថយន្តរួមគ្នាដឹកបន្លែចូលតំបន់ហាមឃាត់ហើយជននោះ បានជិះរថយន្តទៅបុកបារ៉ាស់របស់សមត្ថកិច្ចបាក់អស់២កន្លែងថែមទៀតផង។ ក្រោយ មកបានប្រើ ហិង្សាមកលើសមត្ថកិច្ច ថែម ទាំងធ្វើការរេរាំងក្នុងប្រតិបត្តិការ របស់សមត្ថកិច្ចផងដែរ ដោយមានទាំងជេរប្រមាថដល់សមត្ថកិច្ច ទើបសមត្ថកិច្ចអនុវត្តវិធានការច្បាប់។ បច្ចុប្បន្ន ស្ត្រី ទាំង ៦នាក់ ត្រូវបានលោក លោក ថេង សំណាង ព្រះរាជអាជ្ញារង នៃសាលាដំបូង ខេត្តសៀមរាប ឱ្យសមត្ថកិច្ចនាំខ្លួន ដឹកតាមរថយន្ត យកទៅដាក់ពន្ធនាគារ ស្ថិតនៅក្នុងសង្កាត់ជ្រាវ ក្រុងសៀមរាប ជាបណ្តោះអាសន្ន៕
អត្ថបទ និងរូបភាព៖ លោក ជា ស្រស់
កែសម្រួល៖ លោក លីវ សុខុន
