ព្រឹកថ្ងៃទី០៦ ខែកញ្ញា ឆ្នាំ២០២២ លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្ប: ជាប្រធានក្រុមប្រឹក្សាភិបាលអាជ្ញាធរជាតិអប្សរា និងជាអនុប្រធានក្រុមការងារតម្រង់ទិស ដើម្បីដោះស្រាយបញ្ហាសំណង់ និងដីធ្លីក្នុងតំបន់រមណីយដ្ឋានអង្គរ និងតំបន់ដទៃទៀតស្ថិតក្រោមការគ្រប់គ្រងរបស់អាជ្ញាធរជាតិអប្សរា បានអញ្ជើញចុះពិនិត្យការងាររៀបចំសម្អាតដីឡូត៍ សម្រាប់ប្រជាពលរដ្ឋដែលស្ម័គ្រចិត្តចាកចេញពីតំបន់រមណីយដ្ឋានអង្គរ ទៅកាន់ទីតាំងថ្មីស្ថិតនៅភូមិធម្មជាតិរុនតាឯក ស្រុកបន្ទាយស្រី ។
ក្នុងឱកាសនោះ លោកជំទាវបណ្ឌិតសភាចារ្យ ភឿង សកុណា បានជួបសំណេះសំណាលជាមួយអាជ្ញាធរស្រុកបន្ទាយស្រី អាជ្ញាធរឃុំ ក្រុមការងារដែលកំពុងបំពេញការងារក្នុងការសំអាត និងរៀបចំប្លង់ដីជូនប្រជាពលរដ្ឋ និងបានអញ្ជើញពិនិត្យនៅទីតាំងមួយចំនួន ព្រមទាំងបានកោតសរសើរចំពោះក្រុមការងារទាំងអស់ ដែលបានខិតខំយកអស់កម្លាំងកាយចិត្តក្នុងការអនុវត្តគម្រោងផែនការរបស់រាជរដ្ឋាភិបាល ដោយទទួលបានលទ្ធផលយ៉ាងធំធេង និងល្អប្រសើរជាទីបំផុត។
ជាមួយនោះ លោកជំទាវ ក៏បានជួបសំណោះសំណាល សួរសុខទុក្ខដល់លោកគ្រូ អ្នកគ្រូ ព្រមទាំងសិក្សានុស្សនៅសាលាបឋមសិក្សាហ៊ុន សែន រុនតាឯក ដែលមានទីតាំងស្ថិតនៅជាប់កន្លែងកំពុងរៀបចំសម្អាតដីឡូត៍ផងដែរ៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!! សូ
