នៅក្នុងកិច្ចប្រជុំពិសេសផ្នែកវប្បធម៌អាស៊ាន នៃសន្និសីទអន្តរជាតិស្តីពីការការពារ និងការទប់ស្កាត់ការចរាចរណ៍ជួញដូរសម្បត្តិវប្បធម៌ខុសច្បាប់៖ ទស្សនៈពីអាស៊ាន នៅខេត្តសៀមរាប ថ្ងៃទី៧ ខែកញ្ញា ឆ្នាំ២០២២នេះ ប្រធានអង្គការយូណេស្កូប្រចាំកម្ពុជា បង្ហាញថា ប្រទេសកម្ពុជាបានទទួលត្រឡប់មកវិញនូវសម្បត្តិវប្បធម៌ជាតិ ដែលត្រូវគេលួចចំនួន ៣០ ពីសហរដ្ឋអាមេរិកមកវិញ។
ថ្លែងនៅក្នុងកិច្ចប្រជុំធ្វើឡើងតាមរយៈ Video Conference និងចូលរួមដោយផ្ទាល់ក្រោមអធិបតីភាពលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងប្រធានរដ្ឋមន្ត្រីអាស៊ានទទួលបន្ទុក វប្បធម៌និង សិល្បៈ(AMCA) និងចូលរួមដោយឯកឧត្តម លោកជំទាវ រដ្ឋមន្ត្រីអាស៊ានទទួលបន្ទុកផ្នែកវប្បធម៌និងសិល្បៈ អ្នកតំណាងរដ្ឋាភិបាល និងឯកឧត្តម Ekkaphap Phantavong អគ្គលេខាធិការរងនៃសហគមន៍សង្គមវប្បធម៌អាស៊ាន ឯកឧត្តម សាដាអ៊ូម៉ា អាឡាម ប្រធានអង្គការយូណេស្កូប្រចាំកម្ពុជា បានកោតសរសើរដល់ប្រទេសកម្ពុជា ដែលជាប្រធានអាស៊ាន ចំពោះការដឹកនាំ និងការប្តេជ្ញាចិត្តក្នុងការលើកកម្ពស់ និងកិច្ចការពារសម្បត្តិបេតិកភណ្ឌវប្បធម៌។ ទន្ទឹមនោះ ឯកឧត្តម ក៏បានលើកឡើងពីសារៈសំខាន់នៃអនុសញ្ញា UNESCO ឆ្នាំ 1970 ស្តីពីមធ្យោបាយនៃការហាមឃាត់ និងទប់ស្កាត់ការនាំចូលខុសច្បាប់ និង ការនាំចេញ និងផ្ទេរកម្មសិទ្ធិនៃសម្បត្តិវប្បធម៌ ដែលត្រូវបានផ្តល់សច្ចាប័នដោយរាជរដ្ឋាភិបាលកម្ពុជា នៅថ្ងៃទី ២៦ ខែកញ្ញា ឆ្នាំ ១៩៧២ ស្របពេលជាមួយការប្រារព្ធខួបលើកទី ៥០ នៃការផ្តល់សច្ចាប័នរបស់កម្ពុជាលើអនុសញ្ញាឆ្នាំ UNESCO ១៩៧០តែម្តង។
ព័ត៌មានជាតិ ថ្មីៗ
ជាមួយនោះ លោកជំទាវបណ្ឌិតសភាចារ្យ ភឿង សកុណា មានប្រសាសន៍ថា៖ ការប្តេជ្ញាចិត្តរបស់អាស៊ានចំពោះកិច្ចការពារបេតិកភណ្ឌវប្បធម៌ គឺត្រូវបានដាក់បញ្ចូលក្នុងចក្ខុវិស័យសហគមន៍អាស៊ាន សេចក្តីថ្លែងការណ៍អាស៊ានស្តីពីបេតិកភណ្ឌវប្បធម៌ឆ្នាំ២០០០ ដំណោះស្រាយទីក្រុងវៀងច័ន្ទអាស៊ានឆ្នាំ២០១៦ សេចក្តីថ្លែងការណ៍អាស៊ានឆ្នាំ២០១៧ស្តីពីវប្បធម៌នៃការទប់ស្កាត់សម្រាប់សង្គមសន្តិភាព រួមបញ្ចូល ភាពធន់ សុខភាព និងសុខដុមរមនា និងការរៀបរាប់អំពីអត្តសញ្ញាណអាស៊ានឆ្នាំ២០២០។
លោកជំទាវ បញ្ជាក់ថា៖ ដើម្បីពង្រឹងបន្ថែមលើការប្តេជ្ញាចិត្តនេះ កម្ពុជាក្នុងនាមជាប្រធាន រដ្ឋមន្ត្រីអាស៊ានទទួលបន្ទុក វប្បធម៌និង សិល្បៈ(AMCA) និងជាប្រធានអាស៊ានក្នុងឆ្នាំ២០២២ មានការប្តេជ្ញាចិត្តជាមួយរដ្ឋសមាជិកអាស៊ាន ដើម្បីអភិវឌ្ឍផែនការសកម្មភាពប្រកបដោយសក្តានុពល និងបង្កើនយន្តការការពារសម្បត្តិវប្បធម៌នៅក្នុងតំបន់។ ក្នុងនោះ កម្ពុជាស្នើឱ្យអាស៊ានពង្រឹងកិច្ចសហប្រតិបត្តិការបន្ថែមទៀត ដើម្បីយើងអាចអភិវឌ្ឍន៍ការឆ្លើយតបប្រកបដោយប្រសិទ្ធភាព និងសម្របសម្រួល ចំពោះការការពារសម្បត្តិវប្បធម៌ និងកាត់បន្ថយផលប៉ះពាល់អាក្រក់នៃការជួញដូរទ្រព្យសម្បត្តិវប្បធម៌ខុសច្បាប់ ស្របពេលដែល កម្ពុជាកំពុងស្នើឱ្យមានសេចក្តីថ្លែងការណ៍រដ្ឋមន្ត្រីរួមមួយស្តីពីការការពារទ្រព្យសម្បត្តិវប្បធម៌ ក្នុងគោលបំណងធ្វើការរួមគ្នាដើម្បីបង្កើតយុទ្ធសាស្ត្ររយៈពេលវែងដែលដោះស្រាយបញ្ហាឫសគល់នៃការជួញដូរខុសច្បាប់លើទ្រព្យសម្បត្តិវប្បធម៌។
អត្ថបទ និងរូបភាព៖ លោក យូ វង្ស និង លោក បូ សាវី
កែសម្រួល៖ លោក សេង ផល្លី
