នៅរសៀលថ្ងៃទី៧ ខែកញ្ញា ឆ្នាំ២០២២ គណៈកម្មាធិការជាតិវាយតម្លៃទីក្រុងស្អាត ក្រសួងទេសចរណ៍ ក្រោមយុទ្ធនាការ “កម្ពុជាស្អាត កម្ពុជាបៃតង” បានសហការ ជាមួយរដ្ឋបាលខេត្តសៀមរាប និងអាជ្ញាធរទន្លេសាប បានបន្តចុះត្រួតពិនិត្យវឌ្ឍនភាពការងារ នៃសហគមន៍ទេសចរណ៍កំពង់ឃ្លាំង នៅស្រុកសូទ្រនិគម ដែលជាតំបន់ទេសចរណ៍លើទឹកមួយក្នុងចំណោម តំបន់ទេសចរណ៍ចំនួន៣ នៅបឹងទន្លេសាប ក្នុងភូមិសាស្ត្រខេត្ដសៀមរាប ដើម្បីដាក់បញ្ចូលក្នុងការប្រគួតប្រជែងបរិស្ថានស្អាត។
ក្នុងជំនួបពិភាក្សានៅសាលាឃុំកំពង់ឃ្លាំង លោក ចែម រ៉ាណែល អនុប្រធាននាយកដ្ឋានសេវាគាំពារទីក្រុងស្អាត និងជំរុញការប្រឡងប្រណាំង បានបង្ហាញថា តំបន់សហគមន៍កំពង់ភ្លុក សហគមន៍ចុងឃ្លៀស និងសហគមន៍កំពង់ឃ្លាំង គឺជាតំបន់ត្រូវបានដាក់បញ្ចូលទៅក្នុងដំណើការរៀបចំផែនការ Clean and Green។ តំបន់ទាំង៣នេះ ចាំបាច់ត្រូវមានការគាំទ្រ និងចុះតាមដាន ពីគណៈកម្មាធិការជាតិ វាយតម្លៃទីក្រុងស្អាត នៃក្រសួងទេសចរណ៍ និងសហការសម្របសម្រួលពីរដ្ឋបាលខេត្ត។
លើកឡើងក្នុងកិច្ចប្រជុំនោះ ក្នុងនាមរដ្ឋបាលខេត្ត លោក អ៊ឹង គឹមលាង អភិបាលរងខេត្តសៀមរាប បង្ហាញថា សម្រាប់តំបន់ទាំង៣នេះ មានការលំបាកខ្លាំងនៅរដូវវស្សា ដោយសារទឹកទន្លេជន់លិច ពុំមានទីទួលប្រមូលសំរាម ដែលនាំឱ្យប្រជាពលរដ្ឋរស់នៅលើផ្ទះបណ្ដែតទឹកបោះសំរាមចូលទៅក្នុងទឹក។
ដើម្បីចូលរួមទប់ស្កាត់ការបោះសំរាមចូលក្នុងទឹក និងលើកកម្ពស់បរិស្ថានទាំងរដូវប្រាំង និងវស្សា លោកអភិបាលរងខេត្ត បានណែនាំដល់ សហគមន៍ទាំងបី ដាក់ធុងសំរាមយ៉ាងតិច ១០ នៅតាមបណ្ដាភូមិនីមួយៗ ទៅតាមទីតាំងដែលអាជ្ញាធរបានកំណត់ ក្នុងឃុំរបស់ខ្លួន។ ទន្ទឹមនោះ អាជ្ញាធរ និងមន្ទីរ អង្គភាពពាក់ព័ន្ធ ត្រូវចូលរួមផ្សព្វផ្សាយដល់ប្រជាពលរដ្ឋ យកសំរាមទៅដាក់ក្នុងសំរាម និងញែកសំណល់កាកសំណល់ចេញពីគ្នា ជាពិសេសសំណល់ប្លាស្ទិច។
គួររំលឹកថា ក្នុងពិធីកិច្ចពិភាក្សាពីការវិចខ្ចប់កាកសំណល់ នៅសហគមន៍ទេសចរណ៍កំពង់ភ្លុក ស្រុកប្រាសាទបាគង ខេត្ដសៀមរាប កាលពីថ្ងៃទី០៣ ខែសីហាកន្លងទៅនេះ អាជ្ញាធរខេត្តបានណែនាំដល់ ប្រជាសហគមន៍ បង្កើតរចនាសម្ព័ន្ធនៃការគ្រប់គ្រងកាកសំណល់នេះ ដោយមានអ្នកទទួលទុកដាក់សំរាម អ្នកគ្រប់គ្រងពីការដឹកជញ្ជូនសំរាម និងការផ្សព្វផ្សាយពីបរិស្ថានស្អាត។ ចំពោះសហគមន៍ ដែលមានការគ្រប់គ្រងសំរាមនៅតំបន់ទេសចរណ៍បឹងទន្លេសាប បានល្អប្រសើរ នឹងទទួលបានបណ្ណសរសើរ ចាប់ពីថ្នាក់ឃុំរហូតដល់ថ្នាក់ខេត្ដ។
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក សេង ផល្លី
